ཨ་རིའི་སྲིད་འཛིན་ཨོ་བྷ་མ་མཆོག་གིས་ཞེ་ཅིན་ཕེན་ལ་སྐུལ་མ་གནང་།

གསང་བ་རྐུ་འཁྱེར་གཙོས་ཨ་རྒྱ་གཉིས་དབར་མ་མཐུན་པའི་གནད་དོན་ཁག་སེལ་ཐབས་སུ་རྒྱ་ནག་གཞུང་གིས་ལས་དོན་མྱུར་པོ་སྤེལ་དགོས།
དེ་ཡང་ཨ་མི་རི་ཀ་དང་རྒྱ་ནག་ཕྱོགས་གཉིས་ཀས་རྒྱ་ནག་གི་སྲིད་འཛིན་ཞི་ཅིན་ཕིན་འདི་ལོའི་ཕྱི་ཟླ་༩་པའི་ནང་ཨ་མི་རི་ཀར་འཚམས་གཟིགས་ལ་ཕེབས་རྒྱུའི་གྲ་སྒྲིག་གནང་བཞིན་པའི་སྐབས་འདིར་ཨ་རིའི་སྲིད་འཛིན་ཨོ་བྷ་མ་མཆོག་ནས་དྲ་རྒྱ་བརྒྱུད་ནས་གསང་བ་རྐུ་འཁྱེར་གྱི་གནད་དོན་གཙོས་པའི་ཡུལ་གྲུ་གཉིས་དབར་མ་མཐུན་པའི་གནད་དོན་ཁག་སེལ་ཐབས་སུ་རྒྱ་ནག་གཞུང་གིས་ལས་དོན་མྱུར་པོ་སྤེལ་དགོས་སྐོར་ཞེ་ཅིན་ཕེན་ལ་སྐུལ་མ་གནང་འདུག
ཨ་མི་རི་ཀ་དང་རྒྱ་ནག་གཉིས་ཀས་དྲ་རྒྱ་བརྒྱུད་ནས་གསང་བ་རྐུ་ཁྱེར་བྱེད་ཀྱི་ཡོད་སྐོར་སྐྱོན་བརྗོད་བྱེད་རེས་བྱས་པའི་རྐྱེན་གྱིས་དངངས་འཚབ་ཁག་ཞི་ཐབས་བྱེད་བཞིན་པའི་སྐབས་འདིར་ཨ་རིའི་སྲིད་འཛིན་ཨོ་བྷ་མ་མཆོག་ནས་རྒྱ་ནག་གི་སྲིད་འཛིན་ཞི་ཅིན་ཕེན་ལ་ཁ་སང་ཞལ་པར་གནང་སྟེ། འདི་ལོ་ཁོང་ཨ་རིའི་ནང་གཟིགས་སྐོར་ཕེབས་རྒྱུར་དགའ་བསུ་ཞུ་རྒྱུའི་ངང་སྒུག་ཞུ་བཞིན་ཡོད་སྐོར་དང་། དྲ་རྒྱ་བརྒྱུད་ནས་གསང་བ་རྐུ་འཁྱེར་གྱི་གནད་དོན་གཙོས་པའི་ཡུལ་གྲུ་གཉིས་དབར་མ་མཐུན་པའི་གནད་དོན་ཁག་སེལ་ཐབས་སུ་རྒྱ་ནག་གཞུང་གིས་ལས་དོན་མྱུར་པོ་སྤེལ་དགོས་སྐོར་ཞེ་ཅིན་ཕེན་ལ་སྐུལ་མ་གནང་ལུགས་ཨ་རིའི་སྲིད་འཛིན་ལས་ཁུངས་ཕོ་བྲང་དཀར་པོས་བསྒྲགས་གཏམ་ཞིག་སྤེལ་འདུག རྒྱ་ནག་གཞུང་གིས་སེམས་འཚབ་བྱེད་ས་ཐེ་ཝན་དང་། བོད་ཀྱི་གནད་དོན་ལ་ཨ་རིའི་ངོས་ནས་དོ་སྣང་བྱེད་རྒྱུའི་རེ་བ་ཡོད་ལུགས་དང་རྒྱ་ནག་གི་ནང་སྲིད་གནད་དོན་ལ་ཐེ་བྱུས་བྱས་ཏེ་ཡུལ་གྲུ་གཉིས་ཀྱི་འབྲེལ་ལམ་ལ་དོ་ཕོག་མི་འགྲོ་བའི་རེ་བ་བྱེད་ཀྱི་ཡོད་ལུགས་སྲིད་འཛིན་ཞི་ཅིན་ཕེན་གྱིས་གསུངས་པ་རྒྱ་ནག་གཞུང་འབྲེལ་ཤིན་ཧ་གསར་ལས་ཁང་གིས་ལུང་འདྲེན་བྱས་འདུག ཨ་མི་རི་ཀས་ཐེ་ཝན་ལ་གོ་མཚོན་ལག་ཆ་ཚོང་འབྲེལ་བྱས་པར་རྒྱ་ནག་ཁོང་ཁྲོ་ལངས་ཡོད་པ་དང་། འདི་ཟླའི་ཚེས་༥་ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་འདི་ག་ཨ་མི་རི་ཀའི་རྒྱལ་ས་ཝ་ཤིན་ཀྲོན་ལ་ཚོགས་པའི་ཨ་རིའི་རྒྱལ་ཡོངས་གསོལ་སྟོན་ལ་ཇི་ལྟར་གསོལ་འདེབས་ཞུས་པ་བཞིན་ཆིབས་བསྒྱུར་བསྐྱངས་གནང་མཛད་སྐབས་ཨ་རིའི་སྲིད་འཛིན་ཨོ་བྷ་མ་མཆོག་ནས་ཕྱག་གཉིས་ཐལ་མོ་སྦྱར་ནས་གུས་བརྩི་ཆེན་པོ་ཞུས་པ་མ་ཟད། ༧མགོན་པོ་གང་ཉིད་ཀྱི་མཛད་འཕྲིན་ཁག་ལ་ཆེ་བསྟོད་ཆེན་པོ་ཞུས་པར་རྒྱ་ནག་གིས་སྐྱོན་བརྗོད་ཀྱང་ཞུས་ཡོད་པ་རེད།

གསར་འགོད་པ་བསོད་ནམས་ལྷ་མོ།