ཨོ་བྷ་མ་མཆོག་དང་༧གོང་ས་མཆོག་རྣམ་གཉིས་མཇལ་འཕྲད་གནང་བ།

དེ་ཡང་རྒྱ་ནག་གིས་གནོན་ཤུགས་ལ་མ་བལྟོས་པར་དེ་རིང་ཕྱི་ཟླ་༦་པའི་ཚེས་༡༥་རེས་གཟའ་ལྷག་པའི་ཉིན་གྱི་སྔ་དྲོར་ཨ་མི་རི་ཀའི་སྲིད་འཛིན་སྐུ་ཞབས་ཨོ་བྷ་མ་Obama་མཆོག་གིས་བོད་ཀྱི་དབུ་ཁྲིད་༧སྤྱི་ནོར་༧གོང་ས་སྐྱབས་མགོན་ཆེན་པོ་སྲིད་འཛིན་གྱི་ཕོ་བྲང་དཀར་པོའི་ནང་གདན་ཞུ་དང་རྣམ་གཉིས་མཇལ་འཕྲད་གནང་ཡོད་པ་རེད།
དེ་རིང་རེས་གཟའ་ལྷག་པའི་ཉིན་དབུ་ཁྲིད་རྣམ་གཉིས་ཀྱི་མཇལ་འཕྲད་དེ་ནི་རྒྱུན་ལྡན་ཞིག་དང་། གསར་འགོད་པ་སོགས་སུ་གཅིག་གཏོང་རྒྱུའི་འཆར་གཞི་མེད་ཅིང་། དེ་ནི་རྒྱ་ནག་གཞུང་ཁོང་ཁྲོ་མ་ལངས་བའི་ཐབས་ཇུས་ཤིག་ཡིན་པ་དང་། རྒྱ་ནག་གཞུང་ཕྱོགས་ནས་འཛམ་གླིང་གི་མཚན་སྙན་ཆེ་བའི་Nobel་ཞི་བདེའི་གཟེངས་རྟགས་བཞེས་མཁན་༧གོང་ས་སྐྱབས་མགོན་ཏཱ་ལའི་བླ་མ་མཆོག་ལ་བོད་ཁ་བྲལ་གྱི་ཕྱག་ལས་གནང་མཁན་ཡིན་པའི་ཉེས་འཛུགས་བྱེད་ཀྱི་ཡོད་པའི་སྐོར་ཧྥ་རན་སི་གསར་འགྱུར་ལས་ཁང་གིས་གནས་ཚུལ་སྤེལ་འདུག
ཨ་རིའི་སྲིད་འཛིན་སྐུ་ཞབས་ཨོ་བྷ་མ་Obama་མཆོག་གིས་དེ་སྔོན་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཐེངས་འགའ་ཤས་མཇལ་འཕྲད་ཞུས་མྱོང་ཡོད་པ་དང་། གྲོགས་པོ་ཡག་པོ་ཞིག་ཡིན་པ་གསུང་གི་ཡོད་པ་རེད།
ཁ་སང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་Lu Kang་གིས་གསར་འགོད་པར་། ༧གོང་ས་མཆོག་དང་ཨ་རིའི་སྲིད་འཛིན་མཇལ་འཕྲད་གནང་རྒྱུའི་གནད་དོན་ཐད་ངོ་རྒོལ་བྱས་ཏེ་ང་ཚོ་རྒྱ་ནག་གི་ཕྱོགས་ནས་མཇལ་འཕྲད་དེར་མཐའ་ཅིག་ཏུ་ངོ་རྒོལ་ཡོད་ལ་། གལ་ཏེ་མཇལ་འཕྲད་གནང་བ་ཡིན་ཚེ་དེ་ནི་བོད་རང་བཙན་འཐབ་རྩོད་བྱེད་མཁན་གྱི་ཁ་བྲལ་རིང་ལུགས་པར་ནོར་འཁྲུལ་གྱི་གོ་དོན་སྤྲད་པ་ཞིག་ཡིན་པ་མ་ཟད་། ཨ་རི་དང་རྒྱ་ནག་ཕྱོགས་གཉིས་པོའི་ཡིད་ཆེས་དང་མཉམ་ལས་ལ་གནོད་འཚེ་བཟོ་རྒྱུ་ཡིན་ལུགས་བཤད་ཡོད་པ་རེད།
ཨ་མི་རི་ཀའི་སྲིད་འཛིན་སྐུ་ཞབས་ཨོ་བྷ་མ་Obama་མཆོག་གིས་ན་ནིང་རྒྱལ་ས་Washington་དུ་ཚོགས་པའི་སྔ་དྲོའི་སྨོན་ལམ་གསོལ་སྟོན་ཐོག་༧གོང་ས་སྐྱབས་མགོན་ཆེན་པོ་མཆོག་གདན་འདྲེན་ཞུས་པ་མ་ཟད། ༧གོང་ས་མཆོག་ནི་འཛམ་གླིང་དེའི་ནང་བྱམས་བརྩེའི་ཉམས་ལེན་མཛད་མཁན་ཁྱད་དུ་འཕགས་པའི་མཚོན་དོན་ཞིག་ཡིན་པའི་སྐོར་གསུངས་ཡོད་པ་རེད།
འདི་ཚེས་༡༤ ཉིན་ཨ་རིའི་གྲོས་ཚོགས་ཀྱི་དམངས་གཙོ་ཚོགས་པའི་དབུ་འཁྲིད་ལྕམ་ནན་སེ་ཕི་ལོ་སེ་ (Nancy Pelosi)་མཆོག་དང་། སྤྱི་མཐུན་ཚོགས་པའི་དབུ་ཁྲིད་དང་གྲོས་ཚོགས་གོང་མའི་ཚོགས་གཙོ་སྐུ་ཞབས་ཕུལ་ར་ཡན་ (Paul Ryan)་རྣམ་གཉས་ནས་༧གོང་ས་སྐྱབས་མགོན་ཆེན་པོ་མཆོག་དང་མཉམ་དུ་ཉིན་གུང་གསོལ་ཚིགས་ལྷན་བཞེས་གནང་ཡོད་འདུག
སྤྱི་ལོ་༢༠༡༤་ལོའི་ཟླ་༢་ཚེས་༢༡་ཉིན། བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། ཨ་མི་རི་ཀའི་སྲིད་འཛིན་བྷ་རཀ་ཨོ་བྷཱ་མ་རྣམ་གཉིས་དུས་ཡུན་ཆུ་ཚོད་གཅིག་ལྷག་ཙམ་རིང་ཨ་རིའི་སྲིད་འཛིན་གྱི་ཕོ་བྲང་དཀར་པོའི་ནང་མཇལ་འཕྲད་གནང་ཞིང་། ༧གོང་ས་༧སྐྱབས་མགོན་ཆེན་པོ་མཆོག་གིས་སྲིད་འཛིན་ཨོ་བྷཱ་མ་མཆོག་ལ་༧གོང་ས་མཆོག་གི་ཕུགས་དགོངས་གསུམ་སྟེ། འཛམ་གླིང་སྤྱིའི་བདེ་ཐབས་དང་སྒོས་སུ་མི་སྒེར་སྒེར་སོ་སོའི་བདེ་ཐབས་སླད་བྱམས་བརྩེ་དང་སྙིང་རྗེ། གཞན་འཁུར་སོགས་འགྲོ་བ་མིའི་རིན་ཐང་དར་སྤེལ་གཏོང་ཐབས་དང་། ཆོས་ལུགས་ནང་ཁུལ་མཐུན་བསྒྲིལ་གོང་འཕེལ། བོད་ཀྱི་ཐོུང་མ་ཡིན་པའི་ཆོས་དང་རིག་གཞུང་མི་ཉམས་རྒྱུན་འཛིན་ཡོང་ཐབས་བཅས་ཀྱི་ཐོག་མཛད་འཕྲིན་སྐྱོང་གནང་བཞིན་པའི་སྐོར་ངོ་སྤྲོད་གནང་ཡོད་པ་རེད།

གསར་འགོད་པ་ཀླུ་འབུམ་དང་གཡུ་སྒྲོན།