ཨོ་བྷ་མ་མཆོག་གིས་༧གོང་ས་མཆོག་ལ་མཇལ་འཕྲད་གནང་རྒྱུ།
2016.06.15
རྒྱ་ནག་གིས་གནོན་ཤུགས་ལ་མ་བལྟོས་པར་དེ་རིང་ཕྱི་ཟླ་༦་པའི་ཚེས་༡༥་རེས་གཟའ་ལྷག་པའི་ཉིན་ཨ་མི་རི་ཀའི་སྲིད་འཛིན་སྐུ་ཞབས་ཨོ་བྷ་མ་Obama་མཆོག་གིས་བོད་ཀྱི་དབུ་ཁྲིད་༧སྤྱི་ནོར་༧གོང་ས་སྐྱབས་མགོན་ཆེན་པོ་སྲིད་འཛིན་གྱི་ཕོ་བྲང་དཀར་པོའི་ནང་གདན་ཞུ་དང་རྣམ་གཉིས་མཇལ་འཕྲད་གནང་གི་ཡོད་པ་རེད་།
ཨ་རིའི་སྲིད་འཛིན་སྐུ་ཞབས་ཨོ་བྷ་མ་Obama་མཆོག་གིས་དེ་སྔོན་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཐེངས་འགའ་ཤས་མཇལ་འཕྲད་ཞུས་མྱོང་ཡོད་པ་དང་། གྲོགས་པོ་ཡག་པོ་ཞིག་ཡིན་པ་གསུང་གི་ཡོད་པ་རེད། དེ་རིང་རེས་གཟའ་ལྷག་པའི་ཉིན་དབུ་ཁྲིད་རྣམ་གཉིས་ཀྱི་མཇལ་འཕྲད་དེ་ནི་རྒྱུན་ལྡན་ཞིག་དང་། གསར་འགོད་པ་སོགས་སུ་གཅིག་གཏོང་རྒྱུའི་འཆར་གཞི་མེད་ཅིང་། དེ་ནི་རྒྱ་ནག་གཞུང་ཁོང་ཁྲོ་མ་ལངས་བའི་ཐབས་ཇུས་ཤིག་ཡིན་པ་དང་། རྒྱ་ནག་གཞུང་ཕྱོགས་ནས་འཛམ་གླིང་གི་མཚན་སྙན་ཆེ་བའི་Nobel་ཞི་བདེའི་གཟེངས་རྟགས་བཞེས་མཁན་༧གོང་ས་སྐྱབས་མགོན་ཏཱ་ལའི་བླ་མ་མཆོག་ལ་བོད་ཁ་བྲལ་གྱི་ཕྱག་ལས་གནང་མཁན་ཡིན་པའི་ཉེས་འཛུགས་བྱེད་ཀྱི་ཡོད་པའི་སྐོར་ཧྥ་རན་སི་གསར་འགྱུར་ལས་ཁང་གིས་གནས་ཚུལ་སྤེལ་འདུག
དེ་རིང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་Lu Kang་གིས་གསར་འགོད་པར་། ༧གོང་ས་མཆོག་དང་ཨ་རིའི་སྲིད་འཛིན་མཇལ་འཕྲད་གནང་རྒྱུའི་གནད་དོན་ཐད་ངོ་རྒོལ་བྱས་ཏེ་ང་ཚོ་རྒྱ་ནག་གི་ཕྱོགས་ནས་མཇལ་འཕྲད་དེར་མཐའ་ཅིག་ཏུ་ངོ་རྒོལ་ཡོད་ལ་། གལ་ཏེ་མཇལ་འཕྲད་གནང་བ་ཡིན་ཚེ་དེ་ནི་བོད་རང་བཙན་འཐབ་རྩོད་བྱེད་མཁན་གྱི་ཁ་བྲལ་རིང་ལུགས་པར་ནོར་འཁྲུལ་གྱི་གོ་དོན་སྤྲད་པ་ཞིག་ཡིན་པ་མ་ཟད་། ཨ་རི་དང་རྒྱ་ནག་ཕྱོགས་གཉིས་པོའི་ཡིད་ཆེས་དང་མཉམ་ལས་ལ་གནོད་འཚེ་བཟོ་རྒྱུ་ཡིན་ལུགས་བཤད་ཡོད་པ་རེད།
ཨ་མི་རི་ཀའི་སྲིད་འཛིན་སྐུ་ཞབས་ཨོ་བྷ་མ་Obama་མཆོག་གིས་ན་ནིང་རྒྱལ་ས་Washington་དུ་ཚོགས་པའི་སྔ་དྲོའི་སྨོན་ལམ་གསོལ་སྟོན་ཐོག་༧གོང་ས་སྐྱབས་མགོན་ཆེན་པོ་མཆོག་གདན་འདྲེན་ཞུས་པ་མ་ཟད། ༧གོང་ས་མཆོག་ནི་འཛམ་གླིང་དེའི་ནང་བྱམས་བརྩེའི་ཉམས་ལེན་མཛད་མཁན་ཁྱད་དུ་འཕགས་པའི་མཚོན་དོན་ཞིག་ཡིན་པའི་སྐོར་གསུངས་ཡོད་པ་རེད།
གསར་འགོད་པ་གཡུ་སྒྲོན།