ཐེ་ཝན་བོད་ཀྱི་སྐུ་ཚབ་དོན་གཅོད་མཆོག་དང་ཐེ་ཝན་གྱི་ངལ་རྩོལ་བློན་ཆེན་གཉིས་མཇལ་འཕྲད་གནང་འདུག

དེ་ཡང་སྤྱི་ཚེས་༨ཉིན་ཐེ་ཝན་བོད་ཀྱི་སྐུ་ཚབ་དོན་གཅོད་འབའ་པ་སྐལ་བཟང་རྒྱལ་མཚན་ལགས་ཀྱིས་གསར་དུ་འདེམས་བསྐོ་བྱུང་བའི་ཐེ་ཝན་གྱི་ངལ་རྩོལ་བློན་ཆེན་སྐུ་ཞབས་(Hung Sun-han)་ལགས་དང་མཇལ་འཕྲད་ཞུས་ཡོད་པ་དང་། དེའི་ཐད་དོན་གཅོད་འབའ་པ་སྐལ་བཟང་རྒྱལ་མཚན་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ། ད་རེས་མཇལ་འཕྲད་སྐབས་བློན་ཆེན་མཆོག་ལ་བོད་མིའི་སྒྲིག་འཛུགས་ཀྱི་ངོས་ནས་འཚམས་འདྲི་ཞུས་པ་མ་ཟད། བོད་མི་མང་སྤྱི་འཐུས་ལྷན་ཚོགས་ཀྱི་འཚམས་འདྲིའི་ཕྱག་བྲིས་ཕུལ་ཡོད་པ་དང་མཉམ། གསར་དུ་འདེམས་བསྐོ་བྱུང་བའི་ངལ་རྩོལ་བློན་ཆེན་སྐུ་ཞབས་ཧུང་སུན་ཧན་ལགས་ཀྱིས་དེ་སྔ་ཐེ་ཝན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་དང་ཚོགས་གཙོ་གཉིས་ཀའི་ཐུགས་འགན་བཞེས་མྱོང་མཁན་ཞིག་ཡིན་པ་མ་ཟད། དེ་སྔ་སློབ་ཕྲུག་ཡིན་པའི་སྐབས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་མྱོང་མཁན་ཞིག་ཡིན་པས། ད་རེས་ཁོང་གིས་ངལ་རྩོལ་བློན་ཆེན་གྱི་ཐུགས་འགན་བཞེས་བ་ནི་གནད་འགག་ཆེན་པོ་ཡིན་དུས་འཚམས་འདྲི་ཞུས་པ་དང་ཆབས་ཅིག་ཁོང་གི་ཕྱག་ལས་ཕྱི་མི་གཞིས་སྤོར་དང་འབྲེལ་བ་ཡོད་དུས་བོད་མི་ཚོར་མཐུན་འགྱུར་རྒྱབ་སྐྱོར་ཡོང་བ་དང་། མུ་མཐུད་དུ་བོད་དོན་ལ་རྒྱབ་སྐྱོར་ཡོང་བའི་འབོད་སྐུལ་ཞུ་རྒྱུ་བྱུང་ལ། དེ་བཞིན་བོད་ཀྱི་དིང་རི་གཙོས་ས་གནས་ཁག་ཅིག་ལ་ས་ཡོམ་གྱི་གོད་ཆགས་ཕོག་པའི་གནས་ཚུལ་དང་རྒྱ་ནག་གཞུང་གིས་བོད་ནང་དམ་དྲག་བྱེད་བཞིན་པའི་གནས་སྟངས་སོགས་སྙན་སེང་ཞུས་ཡོད་པ་ངོ་སྤྲོད་གནང་བྱུང་།
གཞན་ཐེ་ཝན་དང་འབྲེལ་བའི་གནས་ཚུལ་ཉིན་དེར་ཐེ་ཝན་ནང་ཡོད་པའི་གཞུང་འབྲེལ་མ་ཡིན་པའི་ཚོགས་པ་ཁག་ཅིག་དང་འབྲེལ་ཡོད་རྣམས་མཉམ་དུ་འཛོམས་ནས་ད་ལོ་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་གྱི་གྲ་སྒྲིག་གནང་ཕྱོགས་སོགས་ཀྱི་ཐད་གྲོས་བསྡུར་གནང་ཡོད་པ་མ་ཟད། ཉེ་ཆར་བོད་ཀྱི་ལ་སྟོད་དིང་རིར་ས་ཡོམ་གྱི་གོད་ཆགས་ཕོག་པའི་གནས་སྟངས་ཐད་གདུང་སེམས་མཉམ་བསྐྱེད་དང་རྒྱ་ནག་གི་དམ་དྲག་སོགས་ཀྱི་གནས་སྟངས་ཐད་ལའང་བཀའ་བསྡུར་གནང་ཡོད་འདུག

གསར་འགོད་པ། རིག་འཛིན་ཆོས་སྒྲོན།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།