བོད་ནས་བལ་ཡུལ་བར་ལྕགས་ལམ་རྒྱག་རྒྱུའི་ཆིངས་དོན་སྣོན་འཇོག་བྱས་འདུག

བལ་ཡུལ་གྱི་སྲིད་བློན་ཀེ་པི་ཤརྨ་ ཨོ་ལི་( K P Sharma Oli)མཆོག་རྒྱ་ནག་ཏུ་གཞུང་འབྲེལ་གཟིགས་སྐོར་སྐབས་བོད་དང་བལ་ཡུལ་དབར་མེ་འཁོར་ལྕགས་ལམ་མཐུད་རྒྱུའི་ཆིངས་དོན་སྣོན་འཇོག་གནང་ཡོད་འདུག
དེ་ཡང་རེས་གཟའ་ཟླ་བའི་ཉིན་སྲིད་བློན་ཨོ་ལི་མཆོག་རྒྱ་ནག་ཏུ་ཉིན་དྲུག་རིང་གཞུང་འབྲེལ་འཚམས་གཟིགས་ནས་ཕྱིར་ཕེབས་སྐབས་ཏི་རི་བྭུ་ཝན་རྒྱལ་སྤྱིའི་གནམ་ཐང་དུ་གསར་འགོད་པར་ཚོར་གསུངས་དོན། ཐེངས་འདིའི་གཟིཌ་སྐོར་ཐོག་ནས་བལ་ཡུལ་དང་རྒྱ་ནག་དབར་མཉམ་སྦྲེལ་གྱི་ལས་དོན་མང་དག་ཅིག་གྲོས་བསྡུར་གནང་ནས་ཡུལ་གཉིས་ཀྱི་མཛའ་འབྲེལ་གོང་མཐོར་སྤེལ་ཡོད་པའི་ཁར་གཙོ་བོ་ཡུལ་གཉིས་དབར་རི་ལིའི་ལྕགས་ལམ་མཐུད་རྒྱུ་དང་།
དེ་བཞིན་ནུས་ཤུགས་དང་། འགྲིམ་འགྲུལ། འཛུགས་སྐྲུན། ཡུལ་སྐོར་སྤྲོ་འཆམ་སོགས་ཕུགས་རྒྱང་རིང་པོའི་དཔལ་འབྱོར་གྱི་འབྲེལ་ལམ་བསྲ་བརྟན་བཟོས་ཡོད་ལུགས་གསུངས་གནང་ཡོད་པ་ཀཐ་མནྒྲུ་ པོ་སེ་ཊེ་(Kathmandu Post)ཞེས་པས་གསར་ཤོག་གིས་གནས་ཚུལ་སྤེལ་འདུག
ཐེངས་འདིའི་གཟིགས་སྐོར་རིང་། བོད་ཀྱི་གཞིས་ཀ་རྩེ་གྲོང་ཁྱེར་གྱི་ཚོང་ར་སྐྱིད་གྲོང་ནས་རྒྱལ་ས་ཀཐ་མནྒྲུ་བར་རི་ལིའི་ལྕགས་ལམ་འབྲེལ་མཐུད་བརྒྱུད་རྒྱ་ནག་གི་བོད་དང་བལ་ཡུལ་དབར་ཚོང་འབྲེལ་གྱི་སྒོ་མོ་རྒྱ་བསྐྱེད་གཏོང་རྒྱུར་ཧ་ཅང་གནད་འགག་ཆེན་པོས་ངོས་འཛིན་བྱེད་བཞིན་པ་རེད། ཨོ་ལི་མཆོག་ཕྱི་ལོ་༢༠༡༦ལོར་སྲིད་བློན་ཁྱུག་ཙམ་གནང་བའི་རིང་རྒྱ་ནག་དང་འགྲིམ་འགྲུལ་གྱི་ཆིངས་དོན་ཞིག་སྣོན་འཇོག་གིས་རྒྱ་གར་ལ་རེ་བཅོལ་ཉུང་དུ་གཏོང་ཐབས་གནང་ཡོད་པར་བརྟེན་ཐེངས་འདིའི་གཟིགས་སྐོར་སྐབས་བོད་དང་བལ་ཡུལ་དབར་ས་མཚམས་འབྲེལ་མཐུད་ཀྱི་ཆིངས་དོན་སྣོན་འཇོག་གནང་བ་དེ་གལ་ཆེར་ངོས་འཛིན་གནང་བཞིན་པ་བརྗོད་མ་དགོས་པ་རེད། ཡུལ་གཉིས་དབར་གོང་ཞུས་ཆིངས་དོན་ཁག་སྣོན་འཇོག་མ་གནང་གོང་སྲིད་བློན་ཨོ་ལི་མཆོག་གིས་རྒྱ་ནག་གི་སྲིད་འཛིན་ཞི་ཅིན་ཕིང་དང་། སྲིད་བློན་ལེ་ཁེ་ཆིང་རྣམ་གཉིས་གཙོས་པའི་འབྲེལ་ཡོད་དཔོན་རིགས་རྣམས་མཇལ་འཕྲད་གནང་ཡོད་པ་མ་ཟད། སྲིད་བློན་ཨོ་ལི་ཡིས་རྒྱ་ནག་གི་སྲིད་འཛིན་ཞི་ཅིན་ཕིང་བལ་ཡུལ་ནང་འཚམས་གཟིགས་ཆེད་གདན་ཞུ་གནང་ཡོད་སྐོར་ཡང་གསུངས་གནང་འདུག།

གསར་འགོད་པ་ཀརྨ་རྒྱ་མཚོ།