རྒྱ་གར་གྱིས་པ་ཀི་སི་ཐན་ལ་ཉེན་ཚབས་བཟོ་གི་མེད་སྐོར།

༄༅༎པ་ཀི་སི་ཐན་གྱི་སྲིད་འཛིན་ཨ་སིཕ་ཨ་ལི་ཛར་རྡ་རི་ཡིས་ཨ་རིའི་ལྦོལ་སི་ཏྲིཏ་གསར་ཤོག་གི་བཅའ་དྲིར་དྲི་ལན་གནང་བའི་བརྒྱུད་རིམ་གྱི་བཀའ་མོལ་ནང་ཁོང་གིས་རྒྱ་གར་ཕྱོགས་ནས་པ་ཀི་སི་ཐན་ལ་ཉེན་ཚབས་གང་ཡང་མེད་སྐོར་ངོས་ལེན་གནང་ཡོད་པ་རེད་

དེ་ཡང་ཁོང་གིས་རྒྱ་གར་དེ་ང་ཚོར་ཉེན་ཚབས་ཤིག་ནམ་ཡང་འགྱུང་མེད་ཅེས་དང་རྒྱ་གར་ནང་ཀ་ཤི་མིར་གྱི་གནད་དོན་ལ་འཐབ་རྩོད་བྱེད་མཁན་དེ་དྲག་སྤྱོད་པ་རེད་ཅེས་གསུངས་ཡོད་པ་རེད་ རྒྱ་གར་ནང་ཀ་ཤི་མིར་གྱི་གནད་དོན་ལ་དྲག་པོའི་འཐབ་རྩོད་བྱེད་མཁན་གྱི་ཚོགས་ཁག་དེ་ཚོ་དྲག་སྤྱོད་པ་རེད་ཅེས་གསུངས་པའི་བཀའ་མོལ་དེ་ནི་པ་ཀི་སི་ཐན་གྱི་དབུ་ཁྲིད་སུ་ཞིག་གིས་ཀྱང་ད་བར་གསུངས་མྱོང་མེད་པའི་བཀའ་མོལ་ཞིག་ཡིན་པ་རེད་ རྒྱ་གར་གཞུང་གིས་ཀ་ཤི་མིར་གྱི་མངའ་ཁུལ་ནང་གི་ལོ་མང་གི་རྙོག་གླེང་དེ་ཆ་ཚང་པ་ཀི་སི་ཐན་གཞུང་གིས་བརྒྱུད་སྐུལ་གྱིས་བཟོ་གི་ཡོད་སྐོར་སྐྱོན་བརྗོད་གནང་གི་ཡོད་པ་དང་པ་ཀི་སི་ཐན་གཞུང་གིས་དེ་ལྟར་ངོས་ལེན་གནང་གི་མེད་ཀྱང་ཀ་ཤི་མིར་མངའ་ཁུལ་གྱི་རྙོག་གླེང་དེ་ནི་ས་ཁུལ་མི་མང་ལ་རང་ཐག་རང་གཅོད་ཀྱི་ཐོབ་ཐང་མེད་པའི་རྐྱེན་གྱི་ཡིན་སྐོར་དང་ཀ་ཤི་མིར་མི་མང་གི་རང་ཐག་རང་གཅོད་ཀྱི་ཐོབ་ཐང་ལ་རྒྱབ་སྐྱོར་གྱི་རྣམ་པ་ཤུགས་ཆེ་གསལ་བཏོན་བྱེད་ཀྱི་ཡོད་པ་རེད་ ཡིན་ནའི་ད་རེས་ཛར་རྡ་རི་ཡིས་རྒྱ་གར་ཕྱོགས་ནས་པ་ཀི་སི་ཐན་ལ་ཉེན་ཚབས་ཤིག་ནམ་ཡང་མེད་པ་དང་རྒྱ་གར་མངའ་ཁོངས་ཀ་ཤི་མིར་ནང་འཐབ་རྩོད་བྱེད་མཁན་གྱི་ཚོགས་ཁག་དེ་ཚོ་དྲག་སྤྱོད་པ་རེད་གསུངས་པ་དེ་པ་ཀི་སི་ཐན་གྱི་དབུ་ཁྲིད་ཅིག་གིས་ད་བར་གསུངས་མྱོང་མེད་པའི་བཀའ་མོལ་ཐོག་མ་ཞིག་ཆགས་ཀྱི་ཡོད་པ་རེད་