འཐབ་བྱུས་མཉམ་འབྲེལ་གྱི་གནད་དོན་ཐད་བཀའ་བསྡུར་གནང་བ།

ཝིཡེཏ་ནམ་དང་ཧྥེ་ལི་པིནསི་གཉིས་ཀྱི་དཔོན་རིཊ་དབར་ལྷོ་རྒྱ་ནག་རྒྱ་མཚོའི་གནད་དོན་གཙོས་འཐབ་བྱུས་མཉམ་འབྲེལ་གྱི་བཀའ་བསྡུར་གནང་འདུག
དེ་ཡང་ལྷོ་རྒྱ་ནག་རྒྱ་མཚོའི་ནང་རྒྱ་ནག་གི་སྟོབས་ཤུགས་ངོམ་སྟོན་བྱེད་བཞིན་པར་ངོ་རྒོལ་ཤུགས་ཆེ་བྱ་མཁན་ཝིེཡེཏ་ནམ་དང་། ཧྥེ་ལི་པིནསི་གཉིས་ཀྱི་དཔོན་རིགས་དབར་འཐབ་བྱུས་མཉམ་འབྲེལ་གྱི་གནད་དོན་ཐད་བཀའ་བསྡུར་གནང་ཡོད་པ་དང་། ཧྥེ་ལི་པིནསི་ཡི་ཕྱི་སྲིད་ལྷན་ཁང་གི་མགྲིན་ཚབ་པ་Charles Joseཡིས་རྒྱ་ནག་གི་མིང་དངོས་སུ་མ་སྨྲོས་པའི་ཐོག་ནས་ཝིཡེཏ་ནམ་དང་ང་ཚོའི་དབར་འབྲེལ་ཡོད་ཀྱི་གནད་དོན་སྤྱི་དང་། ལྷག་པར་ལྷོ་རྒྱ་ནག་རྒྱ་མཚོའི་ནང་གི་གནད་དོན་གཙོ་བཟུང་གི་ཐོག་ནས་བཀའ་བསྡུར་ཞུས་ཡོད་ཅེས་དང་། བཀའ་མོལ་དེ་ཡང་གཟའ་འཁོར་སྔོན་མར་ཧྥེ་ལི་པིནསི་ཡི་ཕྱི་སྲིད་བློན་ཆེན་Albert del Rosarioདང་། ཝིཡེཏ་ནམ་གྱི་ཕྱི་སྲིད་བློན་ཆེན་Pham Binh Minhརྣམ་གཉིས་མཇལ་འཕྲད་གནང་ཡོད་པ་གསལ་བཤད་གནང་པ་དང་། ཁོང་གིས་ང་ཚོའི་དབར་ཐོུང་གི་འཐབ་བྱུས་སྤྱི་དང་ལྷག་པར་དུ་ལྷོ་རྒྱ་ནག་རྒྱ་མཚོའི་གནས་བབས་ཐོག་ཐོུང་གི་འཐབ་བྱུས་ངེས་པར་ཡོད་དགོས་པ་ཞིག་ཡིན་པ་འགྲེལ་བརྗོད་གནང་འདུག
སྔ་ལོ་རྒྱ་ནག་གིས་ལྷོ་རྒྱ་ནག་རྒྱ་མཚོའི་རྩོད་རྙོག་ཡོད་པའི་མཚོ་གླིང་ཞིག་གི་ཁར་རྡོ་སྣུམ་སྔོག་འདོན་གྱི་ཡོ་བྱེད་འོར་འདྲེན་བྱས་པར་ཝིཡེཏ་ནམ་དང་རྒྱ་ནག་དབར་རྩོད་པ་ཆེན་པོ་བྱུང་ཞིང་། ཝིེཡཏ་ནམ་མི་དམངས་ཀྱིས་རྒྱ་ནག་གི་བྱ་སྤྱོད་ལ་ངོ་རྒོལ་ཤུགས་ཆེ་བྱས་ཡོད་པ་རེད།
ཧྥེ་ལི་པིནསི་ནི་དམག་དོན་དང་དཔལ་འབྱོར་གཉིས་ཀའི་ཆ་ནས་རྒྱ་ནག་དང་བསྡུར་ཡ་མེད་ཀྱང་། རྒྱ་ནག་གིས་བྱ་སྤྱོད་ལ་རྟག་ཏུ་ངོ་རྒོལ་ཤུགས་ཆེ་བྱེད་ཀྱི་ཡོད་པར་མ་ཟད། རྒྱ་ནག་གི་ཐུབ་ཚོད་ལྟ་བུའི་བྱ་སྤྱོད་འགོག་ཐབས་ཐད་ཨ་མི་རི་ཀ་དང་། ཝིེཡེཏ་ནམ། ཉི་ཧོང་སོགས་དང་དམག་དོན་གྱི་འབྲེལ་ལམ་རྒྱ་བསྐྱེད་བྱེད་མཁན་ཞིག་ཡིན་པ་རེད།

གསར་འགོད་པ་སྤྱི་ཁྱབ་རྩོམ་སྒྲིག་པ་སྐལ་ལྡན་བློ་གྲོས།