ཨོ་ལིམ་པིག་རྗེས་རྒྱ་གཞུང་ནས་དྲག་གནོན་ཤུགས་ཆེ་བྱེད་སྲིད།

༄༅༎པེ་ཅིང་ཨོ་ལིམ་པིག་རྩེད་འགྲན་རྗེས་སུ་རྒྱ་ནག་གཞུང་གིས་ཤིན་ཅང་ཞེས་འབོད་པའི་ཤར་ཏུར་ཀི་སི་ཐན་གྱི་ཡུ་གུར་ཁ་ཆེའི་མི་རིགས་ཐོག་དྲག་གནོན་བྱེད་ཤུགས་ཆེ་རུ་གཏོང་སྲིད་སྐོར་ས་གནས་མི་མང་གིས་ཞེད་སྣང་བྱེད་ཀྱི་ཡོད་འདུག

ཨེ་པི་གསར་ལས་ཁང་གིས་ཤར་ཏུར་ཀི་སི་ཐན་གྱི་རྒྱལ་ས་ཨུ་རུམ་ཆི་ནས་གནས་ཚུལ་སྤེལ་དོན་ལྟར་ན་ རྒྱ་མིའི་ཉེན་རྟོག་པས་རྒྱལ་སའི་ནང་བལྟ་སྲུང་དོ་དམ་པོ་བྱེད་བཞིན་པའི་ཉེ་འཁྲིས་སུ་ཚོང་པ་ ཨན་ལྦེར་ ཡིས་པེ་ཅིང་ཨོ་ལིམ་པིག་རྩེད་འགྲན་ཚར་བའི་རྗེས་སུ་ རྒྱ་ནག་གཞུང་གིས་ས་གནས་མི་མང་ཐོག་དྲག་གནོན་བྱེད་སྲིད་པ་རེད་ཅེས་དང་ཁོང་ནས་རང་གི་མིང་ཆ་ཚང་མི་ཤོད་པའི་རྒྱུ་མཚན་ནི་གསར་འགོད་པ་ཚོར་སྐད་ཆ་བཤད་མི་འཛིན་བཟུང་བཙོན་འཇུག་བྱས་པའི་རྐྱེན་གྱིས་ཁོང་རང་འཛིན་བཟུང་བྱས་པའི་ཞེད་སྣང་ཡོད་པའི་དབང་གིས་ཡིན་འདུག ཟླ་བ་འདིའི་འགོ་སྟོད་དུ་རྒྱ་ནག་གཞུང་གིས་པེ་ཅིང་ཨོ་ལིམ་པིག་རྩེད་འགྲན་བརྒྱུད་ནས་རྒྱ་ནག་དེ་བཞིན་དེང་དུས་ཅན་དང་སྟོབས་ཆེན་ འཆམ་མཐུན་གྱི་སྤྱི་ཚོགས་ཤིག་ཡིན་པའི་རྣམ་པ་བཏོན་ཐབས་བྱེད་བཞིན་པའི་སྐབས་སུ་ཤར་ཏུར་ཀི་སི་ཐན་དང་རྒྱ་མིའི་ཉེན་རྟོག་པ་༡༦རྐྱེན་ལམ་དུ་བཏང་བ་སོགས་ཐེ་བའི་དྲག་སྤྱོད་འཚེ་ལས་དོན་རྐྱེན་གསུམ་བྱུང་བར་ ཨོ་ལིམ་པིག་རྩེད་འགྲན་གྱི་རྗེས་སུ་རྒྱ་ནག་གཞུང་གིས་ཤིན་ཅང་ཐོག་ཉེས་ཆད་གཏོང་ཕྱིར་དྲག་གནོན་བྱེད་ཤུགས་ཆེ་རུ་གཏོང་ཉེན་ཡོད་འདུག བོད་ཀྱི་དབུ་ཁྲིད་བླ་ན་མེད་པ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཀྱང་ པེ་ཅིང་ཨོ་ལིམ་པིག་རྩེད་འགྲན་འཚོགས་བཞིན་པའི་སྐབས་སུ་ཡང་བོད་ནང་གི་རྒྱ་མིའི་དཔོན་རིགས་ཚོས་ཨོ་ལིམ་པིག་གི་རྩ་འཛིན་དམ་བཅའ་ཁག་སྲུང་བརྩི་མ་ཞུས་པར་བོད་མིའི་ཐོག་དྲག་གནོན་དང་སྡུག་སྦྱོང་མནར་གཅོད་གཏོང་གི་ཡོད་སྐོར་གཟའ་སྤེན་པའི་ཉིན་ཕེརན་སིའི་བརྙན་འཕྲིན་ལས་ཁང་ཞིག་གིས་བཅའ་འདྲི་དང་ལེན་གནང་སྐབས་བཀའ་གནང་ཡོད་པའི་གནས་ཚུལ་འདུག།