དགེ་འདུན་པ་༢༠༠ལྷག་ནས་སྨོན་འདུན་གནང་།

༄༅།    །ཕྱི་༡༡ཚེས་ ༢༩ ཉིན་བོད་མདོ་སྨད་ཀན་ལྷོ་བོད་རིགས་ཁུལ་གྱི་ཀླུ་ཆུ་རྗོང་གི་འཛོམ་ཚ་ས་གནས་སུ་བོད་རིགས་རང་ལོ་ ༣༡ ཡིན་པའི་ཚེ་རིང་རྣམ་རྒྱལ་ལགས་ཀྱིས་རྒྱ་གཞུང་ལ་ངོ་རྒོལ་གནང་ནས་འདས་གྲོངས་སུ་ཕྱིན་པའི་གནས་ཚུལ་བྱུང་ཡོད་པ་རེད། ཁོང་གིས་བོད་ཀྱི་རང་དབང་དང་། ༧གོང་ས་༧སྐྱབས་མགོན་ཆེན་པོ་མཆོག་བོད་ནང་ཕྱིར་ཕེབས་དགོས་པའི་འབོད་ཚིག་སྒྲོག་བཞིན་དུ་འདས་གྲོངས་གྱུར་ཡོད་ཅིང་། ས་གནས་རྒྱ་མིའི་འགོ་ཁྲིད་ཚོས་ས་གནས་ཀྱི་བོད་མི་དང་། ལྷག་དོན་དུ་ས་གནས་ཀྱི་དགོན་པ་ཁག་གི་དགེ་འདུན་པ་རྣམས་མེར་བསྲེགས་བྱེད་མིའི་ཆེད་དུ་བསྔོ་སྨོན་དང་། ཐུགས་གསོའི་ཆེད་དུ་འགྲོ་མི་ཆོག་པའི་བཙན་བཀའ་བཏང་ཡོད་པ་རེད། འོན་ཀྱང་བོད་ནས་གནས་ཚུལ་དང་ བརྙན་འཕྲིན་འབྱོར་དོན་ལྟར་ན།    ཀླུ་ཆུ་ཤིས་ཚང་དགོན་པའི་དགེ་འདུན་པ་ཉིས་བརྒྱ་སུམ་བཅུ་ལྷག་རྒྱང་ཐག་སྤྱི་ལེ་ ༦༣ ཡོད་པའི་ཟམ་ཚ་ལོ་ཙོ་སྡེ་བ་ཡིན་པ་ཚེ་རིང་རྣམ་རྒྱལ་གྱི་ཁྱིམ་དུ་ཆེད་ཕེབས་ཀྱིས་སྨོན་ལམ་གསུངས་འདུག

དེ་སྔ་རྨ་ལྷོ་ཁུལ་དུ་རྒྱ་ནག་གི་དཔོན་རིགས་ཚོས་བརྡ་ཐོ་བཏང་བའི་ནང་། ས་གནས་ཀྱི་མང་ཚོགས་ཁྲོད་དུ་རང་སྲེག་གནང་མཁན་གྱི་ཁྱིམ་མིར་འཚམས་འདྲི་འགྲོ་མེད་དང་། རང་སྲེག་གནང་མཁན་གྱི་ཁྱིམ་མིར་ཞལ་འདེབས་ཕུལ་ཡོད་པའི་གནས་ཚུལ་གསལ་པོ་ཤེས་རྟོགས་བྱས་དགོས་པ་དང་། ལྷག་དོན་དུ་དགེ་འདུན་པ་རང་སྲེག་ནང་ཁྱིམ་སྨོན་ལམ་དང་།    གདུང་སེམས་མཉམ་བསྐྱེད་ཀྱི་ཆེད་དུ་འགྲོ་ཡོད་མེད་ཤེས་རྟོགས་དགོས་པ་དང་། གལ་ཏེ་ཤེས་རྟོགས་བྱུང་ན་དམ་བསྒྲགས་དང་མཇུག་འབྲས་ཚབས་ཆེ་ཡོད་པའི་སྐོར་ནན་བརྗོད་བྱས་ཡོད་པ་རེད།།