སུད་སིའི་གྲོང་ཁྱེར་ཛུ་རིཁ་ནང་བོད་ཀྱི་གཞོན་ནུའི་ལས་འགུལ།

༄༅༎སུད་སི་གྲོང་ཁྱེར་ཛུ་རིཁ་ནང་ཡུ་རོབ་བོད་ཀྱི་གཞོན་ནུ་མཐུན་ཚོགས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་སུད་སི་ཡུལ་མི་ཚོས་སེམས་འགུལ་དང་དོ་སྣང་བསྐྲུན་ཐབས་སླད་སེམས་ཚོར་ལྡན་པའི་ལས་འགུལ་གྱི་རྣམ་དཔྱོད་བཏོན་ཡོད་པའི་གནས་ཚུལ་ཐོན་འདུག

དེ་ཡང་ཁ་ས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་སྲུང་བརྩི་ཞུ་བའི་དུས་ཚེས་ཉིན་སུད་སིར་རྟེན་གཞི་བྱས་པའི་ཡུ་རོབ་ཀྱི་བོད་ཀྱི་གཞོན་ནུ་མཐུན་ཚོགས་ནས་སུད་སི་གྲོང་ཁྱེར་ཆེ་ཤོས་ཛུ་རིཁ་ཀྱི་ཁྲོམ་གཞུང་ཐོག་གློག་ཤུགས་ལ་བརྟེན་པའི་རྒྱུན་ལྡན་འགྲུལ་པ་སྐྱེལ་འདྲེན་གྱི་སྤྱི་སྤྱོད་རླང་འཁོར་ཞིག་བཙོན་ཁང་གི་དབྱིབས་སུ་བཟོ་བཀོད་བྱས་ཏེ་རྒྱ་ནག་གཞུང་གིས་བོད་ནང་བོད་མིའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་ཇི་ལྟར་བཏང་བ་དང་དམ་བསྒྲགས་ཀྱི་གནས་སྟངས་འོག་བོད་མི་མང་ཚོགས་ཀྱི་གནས་སྟངས་ཇི་ཆགས་སྐོར་ཚོར་སྣང་བསྐྲུན་ཐབས་ཀྱི་ལས་འགུལ་སྤེལ་ཡོད་པ་རེད། རྣམ་དཔྱོད་ཀྱི་ཐོག་ནས་གོང་གསལ་གྲོང་ཁྱེར་གྱི་སྤྱི་སྤྱོད་རླང་འཁོར་དེའི་སྟེང་རྒྱུན་ལྡན་གྱི་སྒེའུ་ཁུར་ཚབ་བཙོན་ཁང་གི་ལྕགས་རའི་བཟོ་དབྱིབས་དང་ཡང་རླང་འཁོར་གྱི་ཕྱི་ནང་གཉིས་ཀའི་ཐོག་རྒྱ་ནག་གི་བཙན་གནོན་འོག་བོད་མིའི་དཀའ་སྡུག་མཚོན་པའི་ཕྲེད་དར་དང་དྲིལ་བསྒྲགས་ཀྱི་སྦྱར་ཡིག་བསྒྲེངས་འཛུགས་བྱས་ཡོད་འདུག་པ་མ་ཟད་སྤྱི་སྤྱོད་རླང་འཁོར་ནང་གི་འགྲུལ་པ་རྣམ་པ་ལ་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་བའི་གནས་ལུགས་ཀྱི་ཡིག་ཆ་འགྲེམས་སྤེལ་གནང་ཡོད་པ་རེད། གནས་སྟངས་འདི་འདྲའི་འོག་སུད་སི་ཡུལ་མི་ཚོས་བོད་མིའི་དཀའ་སྡུག་གི་མྱོང་ཚོར་མཁྱེན་ཐབས་ཆེད་ཕྲེད་དར་དང་སྦྱར་ཡིག་གི་ནང་དོན་ནང་ལས་ཀར་འགྲོ་རྒྱུའི་ཚབ་ཏུ་བཙོན་ནང་འགྲོ་བ།སློབ་གྲྭར་འགྲོ་རྒྱུའི་ཚབ་ཏུ་བཙོན་ཁང་ནང་འགྲོ་བ་ཞེས་བཀོད་དེ་ད་རེས་ཀྱི་སྤྱི་སྤྱོད་རླང་འཁོར་ནང་འགྲུལ་སྐྱེལ་གནང་པའི་སུད་སི་ཡུལ་མི་ཚོས་བོད་ནང་དམ་བསྒྲགས་ཀྱི་གནས་སྟངས་ལས་དུམ་བུ་ཙམ་ཞིག་མྱོང་ཚོར་འཕེལ་ཐབས་གནང་འདུག་ལ་འགྲུལ་སྐྱེལ་ཡུལ་མི་ཚོ་ལའང་སེམས་འགུལ་ཆེན་པོ་ཐེབས་ཡོད་པའི་གནས་ཚུལ་འདུག