རྒྱལ་ཚོགས་མདུན་ལས་འགུལ།

༄༅།    །ཁ་སང་ཕྱི་ཚེས་ ༥ རེས་གཟའ་མིག་དམར་ཉིན་ཀིརྟི་རིན་པོ་ཆེ་མཆོག་དབུ་བཞུགས་ཐོག    ད་བར་བོད་ནང་དུ་རང་ལུས་མེར་སྲེག་གཏོང་མཁན་བོད་མི་ ༡༠༧ གཙོ་བོར་གྱུར་བའི་ཁོང་རྣམས་ཀྱི་ནང་མི་སྤུན་མཆེད་རྣམས་ལ་གདུང་སེམས་མཉམ་བསྐྱེད་མཚོན་ཆེད་སུད་སི་ནང་གི་འཛམ་གླིང་མཉམ་སྦྲེལ་རྒྱལ་ཚོགས་ཀྱི་ལས་ཁུངས་མདུན་དུ་མཆོད་འབུལ་སྨོན་ལམ་ཚོགས་གནང་འདུག མཆོད་འབུལ་སྨོན་ལམ་འདི་བཞིན་འཛམ་གླིང་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༢༢ འཚོགས་བཞིན་པའི་སྐབས་དང་བསྟུན། སུད་སི་དང་ལིཀ་ཏེན་སིཊཡན་བོད་རིགས་མི་མང་གིས་གོ་སྒྲིག་ཞུས་གནང་བ་ཞིག་རེད་འདུག།
གྲང་ངར་ཆེ་བའི་གནམ་གཤིས་ལ་མ་འཛེམ་པར་བོད་མི་ ༢༠༠ ཙམ་གྱིས་མཆོད་འབུལ་སྨོན་ལམ་ནང་མཉམ་ཞུགས་གནང་འདུག་ལ། ཀིརྟི་རིན་པོ་ཆེ་མཆོག་གིས་བོད་མི་མི་རེ་ངོ་རེར་བོད་སྤྱི་པའི་རྩ་དོན་ཆེད་འགན་ཡོད་པ་དང། འཚེ་མེད་ཞི་བའི་ཐབས་ལམ་ཐོག་ནས་བོད་ཀྱི་རྩ་དོན་ཆེད་ཚང་མས་སྣེ་ཁྲིད་ཐུབ་ཐབས་གནང་རྒྱུའི་དུས་ལ་བབ་ཡོད་སྐོར་གསུངས་འདུག།