ཧོང་ཀོང་སྲང་ལམ་གྱི་ངོ་རྒོལ་བའི་ར་སྐྱོར་རྩ་མེད་བཟོ་བཞིན་པ།

ལས་འགུལ་བས་ཧོང་ཀོང་གི་སྲང་ལམ་བཀག་ཆེད་རྒྱབ་ཡོད་པའི་ར་སྐྱོར་རྣམས་ཉེན་རྟོག་པས་རྩ་མེད་བཟོ་རྒྱུའི་གསལ་བསྒྲགས་བྱས་ཡོད་པ་རེད།
དེ་ཡང་དམངས་གཙོའི་ལས་འགུལ་བ་ཚོས་ཧོང་ཀོང་གི་སྲང་ལམ་ཁག་ལ་ར་སྐྱོར་གྱིས་བཀག་ཏེ་ངོ་རྒོལ་ལས་འགུལ་སྤེལ་བཞིན་པ་དང། ད་རེས་ཚོུད་འགའ་ཤས་ཀྱི་གོང་དེར་ཧོང་ཀོང་དྲག་ཆས་ཉེན་རྟོག་པ་བརྒྱ་གྲངས་འགའ་ཤས་ཀྱིས་ར་སྐྱོར་གྱི་ཤིང་བཏུབ་ཆེད་ཀྱི་སོ་ལེ་སོགས་ལག་ཆ་འཁྱེར་ཏེ་དམངས་གཙོའི་ལས་འགུལ་བ་ཚོས་གཟའ་འཁོར་གཉིས་རིང་ཧོང་ཀོང་རྒྱ་ལམ་ཆེ་ཁག་གཉིས་བཀག་པའི་ར་སྐྱོར་རྣམས་བཏུབ་པ་དང་བཅག་ཏེ་གཙང་སེལ་བཟོས་པའི་རྗེས་སླར་ཡང་ཉེན་རྟོག་པས་སྲང་ལམ་གཞན་དག་བཀག་བཞག་པ་དེ་དག་ཀྱང་གཙང་སེལ་བཟོ་རྒྱུ་ཡིན་པ་བཤད་ཡོད་པ་རེད།
ད་དུང་ཉེན་རྟོག་པས་ཧོང་ཀོང་གི་Mongkok ས་གནས་ནང་ཉེ་ཆར་ངོ་རྒོལ་བྱེད་མིའི་ཐོག་རྒོལ་རྡུང་བཏང་བའི་དོན་རྐྱེན་བྱུང་ཡུལ་དེའི་ནང་གི་ངོ་རྒོལ་བྱེད་མིའི་མཐའ་སྐོར་ཏུ་ཉེན་རྟོག་པ་འགྲེམས་འཇོག་བྱས་ཏེ་བལྟ་སྲུང་ནན་པོ་བྱ་རྒྱུ་ཡིན་པ་བཤད་ཡོད་པ་རེད། བར་ལམ་ཧོང་ཀོང་དམངས་གཙོ་དོན་གཉེར་ཅན་ཚོས་༢༠༡༧ ལོའི་ཧོང་ཀོང་གི་དབུ་ཁྲིད་མི་དམངས་ཀྱིས་འོས་འདེམས་བྱ་རྒྱུའི་ཐོབ་ཐང་དགོས་པའི་དགོས་འདུན་སྟོན་པའི་ལས་འགུལ་སྤེལ་བའི་རྗེས་ཕྱི་ཟླ་བརྒྱད་པའི་ནང་རྒྱ་ནག་གཞུང་གིས་ཁས་ལེན་མ་བྱས་པར་བརྟེན་ནས་བསྐྱར་ཏུ་ངོ་རྒོལ་ལས་འགུ་རྣོ་ངར་ཆེ་རུ་ཕྱིན་པ་མ་ཟད། མཚམས་རེ་ངོ་རྒོལ་བྱེད་མཁན་དང་གཞུང་ལ་རྒྱབ་སྐྱོར་བྱེད་མཁན་མི་དམངས་ཕན་ཚུན་དྲག་ཟིང་གི་དོན་རྐྱེན་ཡང་བྱུང་ཡོད་པ་དང། ལྷག་པར་དུ་ཕྱི་ཟླ་དགུ་པའི་ཚེས་༢༨ ཉིན་ཉེན་རྟོག་པས་ངོ་རྒོལ་བྱེད་མཁན་ཞི་བའི་མི་དམངས་ཐོག་མིག་ཆུ་ཤོར་བའི་དུག་རླངས་བཏོར་བའི་རྗེས་མི་དམངས་སྟོང་ཕྲག་མང་པོ་རྒྱ་ལམ་འདུ་འཛོམས་བྱས་ཏེ་ངོ་རྒོལ་ལས་འགུལ་གྱི་རྣམ་པ་རྣོ་ངར་ཇེ་ཆེར་ཕྱིན་པ་ཡོད་རེད། འོན་ཀྱང་དེ་རེས་ཀྱི་ཉིན་མ་གཉིས་ནང་ལ་ཉེན་རྟོག་པས་རྒྱ་ལམ་ཐོག་གི་ར་སྐྱོར་རྣམས་གཙང་སེལ་བཟོས་ཏེ་མོ་ཊའི་འགྲིམས་འགྲུལ་སྒོ་མོ་ཕྱེ་བ་དང་ངོ་རྒོལ་བྱེད་མཁན་མི་དམངས་འཕོན་ཆེན་པོ་འདུ་འཛོམས་བྱས་ཡོད་པ་རྣམས་ཁ་ཐོར་ཏུ་མ་བཏང་བར་ས་ཆར་རང་གནས་སུ་བསྡོད་དུ་བཅུག་ཡོད་པ་རེད།
གསར་འགོད་པ་ཉི་མ་གཡུ་སྒྲོན།