ཧོང་ཀོང་དུ་མི་མང་པོས་རྒྱ་ནག་སྲིད་འཛིན་ལ་ངོ་རྒོལ།

༄༅༎རྒྱ་ནག་གི་སྲིད་འཛིན་ཧུའུ་ཅིན་ཐའོ་ཧོང་ཀོང་ནང་གཟིགས་སྐོར་ལ་འབྱོར་ཡོད་པ་དང་། ཧོང་ཀོང་ནང་གི་མི་མང་པོས་ངོ་རྒོལ་བསྟུན་མར་བྱེད་བཞིན་ཡོད་འདུག

རྒྱ་ནག་གི་སྲིད་འཛིན་ཧུའུ་ཅིན་ཐའོ་ཁ་ས་གཟའ་པ་སངས་ནས། ཧོང་ཀོང་གི་བདག་དབང་རྒྱ་ནག་གཞུང་གིས་རྩིས་ལེན་བྱས་ཏེ་ལོ་ངོ་༡༥འཁོར་བའི་དུས་དྲན་གྱི་རྟེན་འབྲེལ་མཛད་སྒོར་བཞུགས་རྒྱུའི་ཆེད་ཧོང་ཀོང་ནང་ཕེབས་ཡོད་པ་དང་། ཧོང་ཀོང་གཞུང་གིས་ངོ་རྒོལ་བྱེད་མཁན་ཚོ་དགོས་འདུན་བཏོན་མཁན་ཞེས་མིང་བཏགས་ནས་ངོ་རྒོལ་བྱེད་སའི་་ས་ཆ་ཞིག་སྤྲད་ཡོད་ཀྱང་། ས་ཆ་དེ་དང་ཧུའུ་ཅིན་ཐའོ་གནས་སྡོད་བྱེད་སའི་མགྲོན་ཁང་དང་། མཛད་སྒོ་ཁག་ཚུགས་ས་སོགས་དང་ས་ཐག་ཧ་ཅང་རིང་པོ་ཡིན་སྟབས། ཧོང་ཀོང་གི་གསར་འགྱུར་རྒྱུད་ལམ་ཁག་དང་། ལྷག་པར་དུ་དྲ་རྒྱའི་ཐོག་ཧོང་ཀོང་གཞུང་ལ་ མང་ཚོགས་ཀྱི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བའི་སྐྱོན་བརྗོད་ཤུགས་ཆེར་ཐོན་པ་དང༌། མི་མང་པོས་ཁོང་ཁྲོའི་རྣམ་འགྱུར་ཤུགས་ཆེ་བཏོན་བཞིན་ཡོད་འདུག།