མར་ཀོ་རུ་བྷི་ཡོ་མཆོག་ཊམཔ་སྲིད་གཞུང་གསར་པའི་ཕྱི་སྲིད་དྲུང་ཆེར་མིང་འདོན་བྱས་འདུག

ཨ་རིའི་སྲིད་འཛིན་ ༤༧ པར་འོས་འདེམས་བྱུང་བ་ ཌོ་ནལཌི་ ཊམཔ་(Donald Trump) མཆོག་གིས་ཁོང་གི་སྲིད་གཞུང་གསར་པའི་འོག་གྲོས་ཚོགས་གོང་མའི་འཐུས་མི་ མར་ཀོ་རུ་བྷི་ཡོ་ (Macro Rubio) མཆོག་ཨ་རིའི་ཕྱི་སྲིད་དྲུང་ཆེར་འདེམས་བསྐོ་གནང་རྒྱུ་ཡིན་པ་བསྒྲགས་འདུག

ཕྱི་ལོ་ ༢༠༢༠ ལོར་སྐུ་ཞབས་རུ་བྷི་ཡོ་ཡིས་རྒྱ་ནག་གི་ཡུ་གུར་གྲངས་ཉུང་མི་རིགས་ཚོར་བཙན་ཤེད་ཀྱི་ངལ་རྩོལ་སྐུལ་ནས་བཟོས་པའི་རྒྱ་ནག་གི་དངོས་ཟོག་ཨ་རིའི་ནང་ནང་འདྲེན་བྱེད་པར་བཀག་འགོག་བྱེད་པའི་ཁྲིམས་འཆར་ལ་རྒྱབ་སྐྱོར་གནང་ཡོད་པ་དང་། སྲིད་འཛིན་ བྷཡེཌན་་གྱིས་ལོ་རྗེས་མར་མཚན་རྟགས་བཀོད་ནས་ཁྲིམས་སུ་གཏན་འབེབས་གནང་ཡོད་པ་མ་ཟད།  འདི་ལོ་ཕྱི་ཟླ་ ༧ པའི་ནང་སྲིད་འཛིན་མཆོག་གིས་ཁྲིམས་སུ་མཚན་རྟགས་སྐྱོན་པའི་བོད་དོན་རྩོད་རྙོག་སེལ་བར་སྐུལ་འདེད་གཏོང་བའི་ཁྲིམས་ཡིག་ S138 གཏན་འབེབས་གནང་པའི་བརྒྱུད་རིམ་ཁྲོད། ཨ་རིའི་གྲོས་ཚོགས་གོང་མའི་ནང་རྒྱབ་སྐྱོར་གནང་མཁན་གྱི་མི་སྣ་གཙོ་གྲས་ཞིག་ཀྱང་ཡིན་པ་རེད།

སྐུ་ཞབས་མར་ཀོ་རུ་སྦི་ཡོ་མཆོག་ནི་བོད་དང་ཤིན་ཅང་རྒྱ་ནག་ནང་གི་འགྲོ་བ་མིའི་ཐོབ་ཐང་གནས་སྟངས་ཐད་དོ་སྣང་ཆེན་པོ་གནང་མཁན་ཞིག་ཡིན་ཞིང་།  གྲོས་ཚོགས་ནང་ཧོང་ཀོང་གི་འགྲོ་བ་མིའི་ཐོབ་ཐང་དང་དམངས་གཙོའི་ཁྲིམས་འཆར་ཞེས་པ་བཏོན་གནང་མཁན་གྱི་གྲོས་ཚོགས་འཐུས་མིའི་གྲས་ཤིག་ཀྱང་ཡིན་པ་རེད།།

གསར་འགོད་པ། འཆི་མེད། 

རྩོམ་སྒྲིག་པ། བསྟན་འཛིན་པདྨ།  བཀྲ་ཤིས་དབང་ཕྱུག

དྲྭ་ཐོག་རྩོམ་སྒྲིག་པ།  བཀྲ་ཤིས་དབང་ཕྱུག

དྲྭ་ཐོག་སྤེལ་མཁན། ནོར་སྡེ་སྒྲོལ་མ།