རྒྱ་གར་གྱི་སྲིད་བློན་ཁོ་ན་བྱ་རྒྱུའི་རེ་འདོད་མེད་ལུགས།

༄༅༎རྒྱ་གར་གྱི་སྙན་གྲགས་ཆེ་བའི་ནེཧ་རུའི་ཁྱིམ་ཚང་ནས་ཡིན་པའི་ར་ཧུལ་གཱན་རྡི་ཡིས་ཁོང་རྒྱ་གར་གྱི་སྲིད་བློན་ཁོ་ན་གནང་རྒྱུའི་རེ་འདོད་ཆེན་པོ་མེད་སྐོར་དེ་རིང་གསུངས་བཞག།
ཚང་མས་མ་འོངས་པར་རྒྱ་གར་གྱི་སྲིད་བློན་གནང་བའི་རེ་བ་ཞུ་ས་ དགུང་ལོ་༤༡ལ་ཕེབས་པའི་ར་ཧུལ་གཱན་རྡི་ཡིས་ད་བར་བློན་ཆེན་ལྷན་ཚོགས་ནང་བློན་ཆེན་ཞིག་གི་ལས་འཁུར་མ་བཞེས་པར། དེའི་ཚབ་ཏུ་གཞུང་འཛིན་ཀོངྒ་རེསི་ཚོགས་པའི་གཞོན་ནུའི་ལས་འགུལ་ལ་ཤུགས་སྣོན་སྐྱོན་རྒྱུར་དོ་སྣང་ཆེ་བ་གནང་ཡོད་པ་རེད།
རེས་གཟའ་ལྷག་པའི་ཉིན་འོས་བསྡུ་འགོ་འཛུགས་གནང་སའི་ཨུ་ཏར་པཱར་རྡེཤ་མངའ་སྡེའི་ནང་ཁོང་གིས་ཀོངྒ་རེསི་ཚོགས་པའི་ཆེད་དུ་འོས་བསྡུའི་དྲིལ་བསྒྲགས་ཀྱི་ལས་འགུལ་ནང་གཙོ་གནས་ཆེ་བའི་ལས་འཁུར་གནང་བཞིན་ཡོད་ཅིང༌། ར་ཧུལ་གཱན་རྡི་ཡིས་གྲོང་ཁྱེར་ལཱཀ་ནའོ་ནས་རྒྱང་ཚད་ཀི་ལོ་མི་ཊར་༢༨༠སར་ཡོད་པའི་ལྦ་ར་ཎ་སིར་ཚུགས་པའི་གསར་འགོད་ལྷན་ཚོགས་ཤིག་གི་ཐོག་ རྒྱ་གར་གྱི་མཐོ་རིམ་ཆབ་སྲིད་དབུ་ཁྲིད་ཚང་མའི་དམིགས་ཡུལ་གཅིག་ཡོད་པ་དང་དེ་ནི་རྒྱལ་ཁབ་ཀྱི་སྲིད་བློན་གནང་ཡག་དེ་རེད། འོན་ཀྱང་ངོས་རང་གི་དམིགས་ཡུལ་དེ་སྲིད་བློན་ཁོ་ན་བྱ་རྒྱུ་དེ་མིན། ངའི་དམིགས་ཡུལ་གཙོ་བོ་དེ་མངའ་སྡེ་འདིའི་ནང་ལས་དོན་བྱེད་སྟངས་མ་དྲང་བ་ཡོད་པ་དེ་ཚོ་ཡང་དག་པ་ཞིག་བཟོ་རྒྱུའི་འདོད་པ་ཡོད་། མང་ཚོགས་ཀྱི་བདེ་སྡུག་ལ་མ་ཉན་ན་ནག་ཉེས་ཆེ་ཤོས་དེ་རེད་ཅེས་གསུངས་བཞག།