དབུས་བོད་ཀྱི་གཞོན་ནུ་ཚོཊ་པ་དང་གྲོས་མོལ་འགྲིག་མཐུན་བྱུང་བ།

རྒྱ་གར་ལྷོ་ཕྱོཊ་མོན་གྷོ་ས་གནས་བོད་ཀྱི་གཞོན་ནུ་དང་དབུས་གཞོན་ནུ་ལྷན་ཚོཊ། ༢༠༡༦།༧།༥

རྒྱ་གར་ལྷོ་ཕྱོགས་མོན་གྷོ་དང་བྷེང་ལོར་ས་གནས་བོད་ཀྱི་གཞོན་ནུས་འོས་ཤོག་བླུགས་པའི་ལམ་ནས་དབུས་གཞོན་ནུ་ལྷན་ཚོགས་ཀྱི་སྒྲིག་འཛུགས་འོག་གནས་རྒྱུའི་ཐག་གཅོད་བྱུང་འདུག
དེ་ཡང་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དྲུང་ཆེ་བཀྲིས་ལམ་བཟང་ལགས་ཀྱིས་ཕྱི་ཚེས་༨་ཉིན་འདི་ག་རླུང་འཕྲིན་ཁང་དུ་གནས་ཚུལ་ངོ་སྤྲོད་གནང་བར་གཞིགས་ན། རྒྱ་གར་ལྷོ་ཕྱོགས་མོན་གྷོ་ས་གནས་ཀྱི་གཞོན་ནུ་ཚོགས་པས་འོས་ཤོག་འཕངས་པ་བརྒྱུད་དབུས་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་ནང་མུ་མཐུད་གནས་རྒྱུའི་ཐག་གཅོད་བྱུང་བའི་ཉིན་གཅིག་གི་རྗེས་སུ་བྷེང་ལོར་ས་གནས་བོད་ཀྱི་གཞོན་ནུས་ཀྱང་དེ་དང་གཅིག་མཚུངས་ཀྱིས་འོས་ཤོག་འཕངས་པའི་ལམ་ནས་དབུས་གཞོན་ནུའི་སྒྲིག་འཛུགས་འོག་མུ་མཐུད་གནས་རྒྱུའི་ཐག་གཅོད་བྱུང་ཡོད་པ་རེད་ཅེས་གསུངས་བྱུང་།
བྷེང་ལོར་དང་མོན་གྷོ་ས་གནས་གཞོན་ནུ་ཚོགས་པ་དེ་གཉིས་ནི་ཕྱི་ལོ་༢༠༡༣་ལོར་གཞོན་ནུའི་སྒྲིག་འཛུགས་རང་བཙན་ལངས་ཕྱོགས་ནས་དབུ་མའི་ལམ་ལ་བསྐྱོད་དགོས་ལུགས་སྐོར་གྱི་ལངས་ཕྱོགས་འདོན་མཁན་ས་གནས་གཞོན་ནུ་ཚོགས་པ་ཁག་བརྒྱད་ཀྱི་ནང་ནས་གཉིས་ཡིན་ཞིང་། དེར་བརྟེན་ནས་དབུས་བོད་ཀྱི་གཞོན་ནུ་ལྷན་ཚོགས་དང་གོང་ཞུས་ས་གནས་ཀྱི་ཚོགས་པ་དེ་དག་གི་དབར་མི་མཐུན་པའི་འགལ་རྐྱེན་སྣ་ཚོགས་བྱུང་སྟེ་མཐར་དབུས་བོད་ཀྱི་གཞོན་ནུའི་སྒྲིག་ཁོངས་ནས་ཕྱིར་ཐོན་པ་རེད།
ད་རེས་དབུས་གཞོན་ནུ་ལྷན་ཚོགས་ཀྱི་ཚོགས་གཙོ་དང་། དྲུང་ཆེ་གཉིས་ས་གནས་སུ་ཕེབས་པ་བརྒྱུད་གྲོས་མོལ་དང་མང་མོས་འོས་འཕངས་པའི་ལམ་ནས་མོན་གྷོ་ས་གནས་གཞོན་ནུ་དང་  བྷེང་ལོར་ས་གནས་གཞོན་ནུ་གཉིས་ནས་དབུས་གཞོན་ནུ་ལྷན་ཚོགས་ཀྱི་སྒྲིག་འཛུགས་འོག་གནས་རྒྱུའི་ཐག་གཅོད་བྱུང་ཡོད་པ་རེད་འདུག

གསར་འགོད་པ་དབྱངས་སྒྲོལ།