གནད་འགག་ཆེ་བའི་རིགས་བཀོད་སྤེལ་མི་ཆོག་པའི་དམ་དྲག

རྒྱ་ནག་ནང་གསར་འགོད་པ་ཚོར་གཞུང་འབྲེལ་བཀའ་འཁྲོལ་མེད་པར་གསར་འགྱུར་བཀོད་སྤེལ་མི་ཆོག་པའི་དམ་དྲག་བྱེད་བཞིན་ཡོད་འདུག
དེ་ཡང་གནས་ཚུལ་ལྟར་ན། རྒྱ་ནག་གི་གསར་འགོད་ལས་རིགས་མི་སྣས་རྒྱ་ནག་གཞུང་འབྲེལ་ཚན་པའི་ལས་ཁུངས་ཀྱི་བཀའ་ཁྲོལ་མེད་པར་གང་བྱུང་གིས་གསར་འགྱུར་ནང་གནད་འགག་ཆེ་བའི་གནས་ཚུལ་རིགས་འགོད་རྒྱུར་བཀག་སྡོམ་བྱེད་བཞིན་ཡོད་པ་དང་། ལྷག་པར་གསར་འགྱུར་བརྒྱུད་ལམ་ཁག་ཕན་ཚུན་དབར་དམའ་འབེབས་ཀྱི་རིགས་སྤེལ་མི་ཆོག་པའི་དམ་བསྒྲགས་བྱེད་བཞིན་པ་ནི་གཙོ་བོ་གསར་འགོད་པར་དངུལ་སྤྲད་ནས་གསར་འགྱུར་བཀོད་བཅུག་པ་དང་།  གསར་འགྱུར་རྫུན་མ་མཁོ་སྤྲོད་བྱེད་པ་སོགས་ཀྱི་གནས་ཚུལ་མི་ཡོང་བའི་ཆེད་དུ་ཡིན་པ་རྒྱ་ནག་གི་ཤིན་ཧ་གསར་ལས་ཁང་གིས་གནས་ཚུལ་བཀོད་འདུག གལ་ཏེ་གནས་ཚུལ་དེའི་རིགས་བྱུང་བ་ཡིན་ན་རྒྱ་ནག་གཞུང་གི་ཁྲིམས་དང་འགལ་གྱི་ཡོད་སྟབས་གསར་འགོད་པའི་ལག་འཁྱེར་གཞུང་བཞེས་གཏོང་རྒྱུ་མ་ཟད། རྒྱ་ནག་གཞུང་འཛིན་ཚོགས་པའི་ཁོངས་ནས་ཕྱིར་འབུད་བྱེད་རྒྱུ་ཡིན་ལུགས་ཡང་གནས་ཚུལ་སྤེལ་ཡོད་པ་རེད།  དེ་བཞིན་རྒྱ་ནག་གཞུང་གི་དྲ་རྒྱའི་བརྒྱུད་ལམ་ནང་དཀྲོག་གཏམ་སྤེལ་བ་ཡིན་ན་མ་མཐར་ཡང་ལོ་གསུམ་གྱི་བཙོན་འཇུག་བྱེད་རྒྱུའི་གསལ་བསྒྲགས་ཡང་བྱས་ཡོད་པ་རེད།
གསར་འགོད་པ་དབྱངས་སྒྲོལ།