བསོད་ནམས་སྟོབས་རྒྱལ་ལཊ་མེར་བསྲེགས་རྗེས་འདས་གྲོངས་སུ་གྱུར་བ།

བསོད་ནམས་སྟོབས་རྒྱལ་གྱི་ཕྱི་ཟླ་༧ཚེས་༡ཉིན་འཁོད་པའི་ཞལ་ཆེམས་ཡིག་གེ

རང་དབང་བཤད་དབང་མེད་པས་ངའི་ཚེ་སྲོག་གིས་འཛམ་བུ་གླིང་དང་རྒྱ་ནག་སྲིད་གཞུང་ལ་བདེན་དཔང་བྱས་ཡིན་ཅེས་ཞལ་ཆེམས་བཞག་ཡོད་པ།
དེ་ཡང་འདི་ག་རླུང་འཕྲིན་ཁང་ལ་གནས་ཚུལ་འབྱོར་དོན། སྤྱི་ཟླ་༧པའི་ཚེས་༩ཉིན་ཡུལ་ཤུལ་སྐྱེ་རྒུ་མདོའི་གེ་སར་ཐང་ཆེན་དུ་རང་ལུས་མེར་བསྲེག་གནང་མཁན་བསོད་ནམས་སྟོབས་རྒྱལ་ལགས་འདས་གྲོངས་སུ་གྱུར་ཡོད་པ་དང་། ཁོང་ཕ་ཡུལ་ནང་ཆེན་ནས་ཡིན་ཞིང་། རང་ལོ་ ༢༧ ལ་སོན་ཡོད་འདུག རྗེས་སུ་འདས་པོ་དེ་ཉིད་ཀྱི་ཞལ་འདོན་དཔེ་ཆའི་ནང་ཕྱི་ཟླ་༧ཚེས་༡ཉིན་འཁོད་པའི་ཞལ་ཆེམས་ཡིག་གེ་ཞིག་རྙེད་སོན་བྱུང་འདུག་པའི་ནང༌། རྒྱ་ནག་སྲིད་གཞུང་གི་འགོ་ཁྲིད་རྣམས་དང་། ལྷག་པར་གྲངས་ཉུང་མི་རིགས་ཀྱི་ས་གནས་ཀྱི་འགོ་ཁྲིད་དག་ལ་ཆེད་ཞུ། གུས་པ་ནི་ཕ་ཡུལ་མཚོ་སྔོན་ཡུལ་ཤུལ་ནང་ཆེན་ནས་ཡིན། རང་ལོ་༢༧དང་། ནང་ཆེན་བཀྲ་ཤིས་ཚང་གི་བུ་འབྲིང་བ་ཡིན། ད་སྐབས་རྫོང་སར་བཤད་གྲྭ་ནས་སློབ་སྦྱོང་བྱེད་བཞིན་ཡོད། རྒྱལ་ཕྱི་ནང་གི་མང་ཚོགས་ཡོངས་ཀྱིས་ཤེས་གསལ་ལྟར། རྒྱ་ནག་སྲིད་གཞུང་གིས་གྲངས་ཉུང་མི་རིགས་ལ་གནས་ལུགསདང་བདེན་དྲང་མི་བསྟུན་པར། དྲག་གནོན་དང་སྡུག་རྩུབ་ཀྱི་ཁྲིམས་ལུགས་ཁོ་ན་བྱས་ཏེ་མི་རིགས་ཀྱི་ཆོས་ལུགས་དང་། སྲོལ་རྒྱུན། རིག་གཞུང་རྩ་མེད། ཁོར་ཡུག་གཏོར་བརླག་གི་བྱ་སྤྱོད་སྤེལ་དང་སྤེལ་བཞིན་པའི་སྐབས། མང་ཚོགས་ལ་སྨྲ་བརྗོད་རང་དབང་མེད་པ་དང་། གནས་ལུགས་དང་བདེ་སྡུག་གི་སྐད་ཆ་ཡར་ཞུ་བྱེད་ས་རྩ་བ་ནས་མེད། ད་དུང་། མང་ཚོགས་ཁ་ཤས་ཀྱིས་བདེན་དོན་དང་སྐྱིད་སྡུག་སྐད་ཆ་ཡར་ཞུ་བྱེད་དུས་དྲག་གནོན་དང་འཛིན་བཟུང་ཁོ་ན་བྱེད་པ་ལས་མང་ཚོགས་ཀྱི་རེ་འདུན་དང་སྐྱིད་སྡུག་ལ་བསམ་ནས་ཐག་གཅོད་གང་ཡང་མེད། མ་ཟད། དགོན་སྡེ་དང་གྲྭ་བཙུན་ལ་གཡོ་རྒྱུ་སྣ་ཚོགས་བྱས་ཏེ་བཀག་སྡོམ་བྱེད་པ་སོགས་མདོར་ན་གྲངས་ཉུང་མི་རིགས་རྩ་མེད་དུ་གཏོང་བའི་ཇུས་འགོད་ངན་པའི་བྱ་བ་གང་ཐུབ་བྱེད་བཞིན་ཡོད། ང་ཚོ་མང་ཚོགས་ཚང་མའི་རེ་བ་གཙོ་བོ་ནི་༧རྒྱལ་བ་བསྟན་འཛིན་རྒྱ་མཚོ་ཕོ་བྲང་པོ་ཏ་ལའི་ནང་དུ་༧ཞབས་སོར་འགོད་དགོས་པ་དེ་ཡིན། ང་ཚོ་ལ་བདེན་དོན་དང་གནས་ལུགས་སོགས་གང་ཡང་བཤད་དབང་མེད་པའི་ཕྱིར་ངའི་ཚེ་སྲོག་གིས་སྤྱིར་འཛམ་བུ་གླིང་དང་། ཡང་སྒོས་སུ་རྒྱ་ནག་སྲིད་གཞུང་དང་མི་དམངས་ལ་བདེན་དཔང་བྱེད་དགོས་བྱུང་། ཤ་རུས་གཅིག་ལས་ཆད་པའི་སྤུན་ཟླ་རྣམས་ཀྱིས་གོ་མེད་ཚོར་མེད་མ་གནང་ནས་མཐུན་སྒྲིལ་གྱི་སྟོབས་ཤུགས་གཅིག་ཏུ་སྒྲིལ་ཏེ་མ་འོངས་པར་མི་རིགས་འདི་བདེན་མཐའ་གསལ་བའི་ཆེད་དུ་ཚང་མས་འབད་བརྩོན་ཅི་ནས་གནང་རོགས་ཞུ་ཞེས་འཁོད་ཡོད་པ་རེད།

གསར་འགོད་པ་ངག་ཆོས།