༧གོང་ས་༧སྐྱབས་མགོན་ཆེན་པོར་བརྟན་བཞུགས་བསྟར་འབུལ༎

༄༅༎དེ་རིང་ཕྱི་ཟླ་ ༢༠༡༡ ཕྱི་ཟླ་ ༤ ཚེས་ ༢༢ གཟའ་པ་སངས་ཉིན་ བཙན་བྱོལ་བོད་གཞུང་གི་སྲི་ཞུ་ལས་ཐོག་ཡོངས་ནས་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་༧སྐུའི་གསང་བ་གསུམ་ལ་ཚུལ་བསྟན་བར་ཆད་ཀྱི་རིགས་ཞར་ཡང་མི་བཞེས་པར་སྐུ་ཁམས་རྡོ་རྗེ་ཆོས་བདུན་གྱི་ངོ་བོར་བརྟན་ཅིང༌། ཐུགས་ཀྱི་བཞེད་དགོངས་མཐའ་དག་བགེགས་མེད་ལྷུན་གྲུབ་ཡོང་ཆེད་ ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་རྒྱས་པ་ཞིག་བསྟར་འབུལ་ཞུས་ཡོད་པ་རེད།

༧རྒྱལ་མཆོག་ལྔ་པ་ཆེན་པོའི་དག་སྣང་གསང་བ་རྒྱ་ཅན་གྱི་ནང་བཞུགས་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་མཁའ་འགྲོ་བསུན་བཟློག་གི་བརྟན་ཞུགས་རྒྱས་པ་ལྷ་མི་ཟུང་འབྲེལ་གྱིས་ཞུ་རྒྱུར་ཉིན་གྲངས་དྲུག་རིང་སྒ་རྗེ་ཁམས་སྤྲུལ་རིན་པོ་ཆེ་མཆོག་རྣམ་གྲྭ་མཁན་རིན་པོ་ཆེ་དབུས་རྣམ་གྲྭ་ཕན་བདེ་ལེགས་བཤད་གླིང་ཆོག་གྲྭ་དགེ་འདུན་པ་རྣམས་ནས་ཉིན་གྲངས་བཅུའི་རིང་སྐུའི་ཚེ་སྒྲུབ་ཞུས་ཡོད་ཅིང།  བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་ནས་མན་ཌལ་ལྗགས་བཤད་གནང་ཡོད་པ་རེད།

བཙན་བྱོལ་བོད་གཞུང་གི་དྲ་རྒྱའི་ཐོག་གསལ་བསྒྲགས་ཤིག་སྤེལ་ཡོད་པ་དེའི་ནང་ ༧གོང་ས་༧སྐྱབས་མགོན་ཆེན་པོ་མཆོག་འཛམ་གླིང་སྤྱི་དང་ལྷག་པར་དུ་བོད་འབངས་ཡོངས་ཀྱི་མགོན་དཔུང་དམ་པར་༧ཞབས་པད་རྒྱལ་བ་ཚེ་མཐའ་ཡས་པའི་ངོ་བོར་བརྟན་པའི་ཞབས་རིམ་དུ་ ཚེ་དཔག་མེད་ཀྱི་གཟུངས་སྔགས་འབྲིང་བ་གྲངས་ ས་ཡ་གཉིས་དང་འབུམ་གསུམ་ཙམ་དང་ གཟུངས་སྔགས་བསྡུས་པ་ ས་ཡ་བཅིུས་དང་འབུམ་ལྔ་ དེ་བཞིན་བྱ་བྱིའུ་དང་ ཉ་ ར་ལུག་སོགས་ཁྱོན་དུད་འགྲོ་སེམས་ཅན་མང་དག་ཅིག་སྲོག་བླུ་ཞུས་ཡོད་པ་འཁོད་ཡོད་པ་རེད།

༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་བཙན་བྱོལ་བོད་གཞུང་གི་སྲི་ཞུ་བ་ཡོངས་ཀྱིས་ལྷ་མི་ཟུང་འབྲེལ་གྱི་བརྟན་ཞུགས་བསྟར་འབུལ་ཞུས་པར་ཐུགས་དགྱེས་ཚོར་ཆེན་པོས་བཀའ་སློབ་ཀྱང་བསྩལ་ཡོད་པ་རེད༎