སྲིད་སྐྱོང་སློབ་ཡོན་ཐོག་མ།

༄༅།    །ཉེ་ལམ་རྒྱ་གར་རྒྱལ་ཡོངས་འབྲིང་རིམ་སློབ་གྲྭའི་ཡིག་རྒྱུགས་ཆེན་མོའི་ནང་མ་སུ་རི་བོད་ཁྱིམ་སློབ་གྲྭའི་སློབ་མ་བསྟན་འཛིན་ཆོས་སྐྱིད་ལ་བརྒྱ་ཆ་ ༩༥་༤ ཐོབ་སྟེ། རྩེ་ཕུད་ཀྱི་གྲུབ་འབྲས་ལོན་པས་མ་ཟད། དབུས་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ཀྱི་གསར་གཏོད་གནང་པའི་སྲིད་སྐྱོང་སློབ་ཡོན་གྱི་ཆ་རྐྱེན་ཡིག་རྒྱུགས་ཀྱི་གྲུབ་འབྲས་བརྒྱ་ཆ་༩༥ལྷག་ལོན་པར་སོང་། དེ་རིང་ཕྱི་ཚེས་ ༣༠ ཉིན་ ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་ནང་ཤེས་རིག་ལས་ཁུངས་ཀྱི་དྲུང་ཆེ་གཙོས་པའི་འབྲེལ་ཡོད་རྣམ་པ་དང་།    བུ་མོ་བསྟན་འཛིན་ཆོས་སྐྱིད་ལགས་མཉམ་བཞུགས་ཐོག  སྲིད་སྐྱོང་སློབ་ཡོན་ཐོག་མ་དེ་བསྟན་འཛིན་ཆོས་སྐྱིད་ལགས་ལ་ཐོབ་པའི་གསལ་བསྒྲགས་གནང་བཞག  
དེ་ཡང་ དབུས་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་བཀོད་པར་གཞིགས་ན།    སྲིད་སྐྱོང་བློ་བཟང་སེངྒེ་མཆོག་གིས་བོུ་བསྟན་འཛིན་ཆོས་སྐྱིད་ལགས་ཐུགས་འཕྲད་གནང་སྟེ། ཡིག་རྒྱུགས་ཀྱི་གྲུབ་འབྲས་རྩེ་ཕུད་ལོན་པར་བསྔགས་བརྗོད་དང་འཚམས་འདྲི་གནང་ཡོད་པ་རེད།  རྒྱ་གར་རྒྱལ་ཡོངས་འཛིན་རིམ་༡༢པའི་ཡིག་རྒྱུགས་གྲུབ་འབྲས་དེ་བཞིན་ཉེ་ཆར་ཚེས་༢༧ཉིན་གསལ་བསྒྲགས་བྱས་ཡོད་པ་དང་ མ་སུ་རི་བོད་ཁྱིམ་སློབ་གྲྭའི་སློབ་མ་བསྟན་འཛིན་ཆོས་སྐྱིད་ལགས་ལ་ ཡིག་རྒྱུགས་ཀྱི་གྲུབ་འབྲས་བརྒྱ་ཆ་༩༥དང་གྲངས་ཆུང་༤ཐོབ་སྟེ། བཙོན་བྱོལ་བོད་མིའི་སྤྱི་ཚོགས་ཀྱི་སློབ་གྲྭ་ཁག་གི་སྒྱུ་རྩལ་སྡེ་ཚན་ཁོངས་ནས་རྩེ་ཕུད་སོན་ཡོད་པས་མ་ཟད། ད་བར་བཙན་བྱོལ་བོད་རིགས་སློབ་མའི་ཁྲོད་ཨང་རིམ་མཐོ་ཤོས་ཆགས་ཡོད་པ་རེད།  འདི་ལོ་རྒྱ་གར་རྒྱལ་ཡོངས་འཛིན་རིམ་བཅུ་གཉིས་པའི་རྒྱུགས་སྤྲོད་ནང་ བོད་པའི་སློབ་ཁག་༡༦གི་སློབ་མ་ ༡༦༡༦ གིས་ཆ་ཤས་བླངས་ཡོད་པ་དང༌། བོད་པའི་སློབ་གྲྭའི་ཡིག་རྒྱུགས་འཕྲོད་པའི་ཁྱོན་ཡོངས་ཀྱི་བརྒྱ་ཆ་ ༨༧།༣ བྱུང་ཡོད་པ་ནི། རྒྱ་གར་རྒྱལ་ཡོངས་ཀྱི་རྒྱུགས་འཕྲོད་པའི་བརྒྱ་ཆ་ ༨༢།༡༠ ལས་བརྒྱ་ཆ་ ༥ མཐོ་བ་བྱུང་ཡོད་པ་རེད༎