གྲྭ་པ་དྲུག་འཛིན་བཟུང་།

༄༅།    །དེ་ཡང་ཕྱི་ཟླ་༢ཚེས་༡༠ཉིན་སྨར་ཁམས་རྫོང་སྤོམ་པ་ཤང༌། བྲག་རྡིབ་དགོན་པའི་དགེ་འདུན་པ་ཁག་ཅིག་གིས། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་བོད་དུ་ཕེབས་དགོས་པ་དང༌། བོད་ལ་རང་བཙན་དགོས་པ་སོགས་ཀྱི་སྐད་འབོད་གནང་སྟེ།    རྒྱ་ནག་གཞུང་ལ་ཞི་བའི་ངོ་རྒོལ་གྱི་ལས་འགུལ་སྤེལ་ཡོད་པ་རེད། སྐབས་དེར་རྒྱ་ནག་གཞུང་གིས་དམག་མི་འཕོན་ཆེ་བཏང་སྟེ།    དགོན་པ་དང་གྲོང་པ་ཕན་ཚུན་འགྲོ་འོང་བྱ་ཡུལ་གྱི་འགྲོ་ལམ་རྣམས་བཀག་པ་དང༌། བྲག་རྡིབ་དགོན་པར་དྲག་གནོན་ཚབས་ཆེ་བྱས་ཏེ་དགོན་པའི་གྲྭ་པ་དྲུག་འཛིན་བཟུང་བཙན་ཁྲིད་བྱས་ཡོད་སྐོར་བོད་ཀྱི་བང་ཆེན་གསར་ཁང་ནས་གནས་ཚུལ་སྤེལ་འདུག འོན་ཀྱང་ད་ལྟ་ས་གནས་དེའི་ཁུལ་དུ་རྒྱ་ནག་གཞུང་གིས་དམ་བསྒྲགས་ཆེན་པོ་བྱེད་པའི་རྐྱེན་གྱིས་འཛིན་བཟུང་བཙན་ཁྲིད་བྱས་པའི་གྲྭ་པ་དྲུག་པོ་དེ་དག་གི་ཞིབ་ཕྲའི་གནས་ཚུལ་ཐོབ་རྒྱུར་འབྲེལ་ལམ་བྱེད་མ་ཐུབ་པར་དཀའ་ངལ་འཕྲད་བཞིན་ཡོད་སྐོར་གསར་ཁང་དེས་གསུངས་འདུག སྨར་ཁམས་བྲག་རྡེབ་དགོན་པ་དེ་ནི་ཆོས་ལུགས་ས་སྐྱ་ཡིན་པ་དང༌། སྨར་ཁམས་ཁུལ་གྱི་དགོན་སྡེ་རྙིང་ཤོས་གྱི་གྲས་ཤིག་ཡིན་པ་རེད།།