མཚོ་སྔོན་གཏེར་ལམ་རྫོང་དུ་གངས་སྐྱོན་བྱུང་བའི་དཀའ་ངལ་འཕྲད་པ།

མདོ་སྨད་གཏེར་ལམ་རྫོང་དུ་གངས་སྐྱོན་བྱུང་ཡུལ། ༢༠༡༥།༢།༢༥

མདོ་སྨད་གཏེར་ལམ་རྫོང་དུ་གངས་སྐྱོན་བྱུང་ཡུལ། ༢༠༡༥།༢།༢༥

མདོ་སྨད་གཏེར་ལམ་རྫོང་དུ་བསྟུད་མར་ཉིན་ཁ་ཤས་ལ་ཁ་བ་ཆེན་པོ་བབས་ནས་ཕྱུགས་ཟོག་ལ་གངས་སྐྱོན་ཆེན་པོ་ཐེབས་ཡོད་པ་རེད།
འདི་གར་བོད་ནས་གནས་ཚུལ་འབྱོར་དོན། མཚོ་སྔོན་ཞིང་ཆེན་ཁོངས་ཀྱི་མཚོ་ནུབ་ཁུལ་གཏེར་ལམ་རྫོང་དུ་ཟླ་བ་འདིའི་སྤྱི་ཚེས་༢༣ནས་ཚེས་༢༥བར་གྱི་ཉིན་གསུམ་ལ་བསྟུན་མར་ཁ་བ་ཆེན་པོ་བབས་ནས་ཕྱུགས་ཟོག་མང་པོ་ཤི་སྐྱོན་བྱུང་ཡོད་པ་དང་། གངས་སྐྱོན་ཕོག་པ་ཚབས་ཆེ་ཤོས་དེ་གཏེར་ལམ་རྫོང་གི་རྒུ་རུ་ཡུལ་ཚོ་དང་། ཆུ་ཁོལ་ཡུལ་ཚོ་གཉིས་ཡིན་འདུག
ཡང་གནས་ཚུལ་ཡོངས་ཁུངས་ནས་བརྗོད་ན། གཏེར་ལམ་རྫོང་ཡོངས་ལ་ཆ་སྙོམས་གངས་ཀྱི་མཐུག་ཚད་སེན་ཊེ་མིས་ཌར་༡༠ཙམ་ཡོད་པ་དང་། དེ་བཞིན་རྒུ་རུ་ཡུལ་ཚོའི་འབྲོག་ཕྱོགས་སུ་གངས་ཀྱི་མཐུག་ཚད་སེན་ཊེ་མིས་ཌེར་༣༠ནས་༤༠བར་ཡིན་པས་ཕྱུགས་ཟོག་མང་པོ་གངས་འོག་ཏུ་ཤོར་ནས་ལེན་ཐུབ་ཀྱི་མེད་པ་རེད་འདུག ས་གནས་གཞུང་གིས་གཟན་རྩྭ་བསྐྱལ་ཡོང་སྟེ་ད་ལྟ་ཕྱུགས་ཟོག་མང་ཆེ་བ་ལྕགས་རའི་ནང་བཅུག་ནས་གཟན་རྩྭ་སྟེར་བཞིན་པ་འགྲེལ་བརྗོད་གནང་ཡོད། ཡང་ས་ཆ་ཁ་ཤས་སུ་གཞུང་གི་རོགས་སྐྱོར་ད་དུང་འབྱོར་མེད་པར་དཀའ་ངལ་ལ་འཕྲད་བཞིན་ཡོད་ཟེར།
དེ་བཞིན་མཚོ་སྔོན་གྱི་གཞུང་འབྲེལ་གསར་འགྱུར་ནང་བརྗོད་ན། གཏེར་ལམ་རྫོང་ཡོངས་ལ་འབྲོག་ཁྱིམ་ཉིས་སྟོང་ཙམ་གྱི་ཕྱུགས་ཟོག་འབུམ་ལྔ་ལྷག་ལ་གངས་སྐྱོན་ཐེབས་ཡོད་ལ། ད་ལྟ་ཕྱུགས་ཟོག་ཤི་བའི་གྲངས་ཀ་རྩིས་ཞིབ་བྱེད་བཞིན་པའི་སྒང་ཡིན་ཟེར། དེ་མིན་ས་གནས་ཀྱི་གནམ་གཤིས་བརྟག་དཔྱད་ལས་ཁུངས་ནས་བརྗོད་ན། ཟླ་བ་འདིའི་ཚེས་༢༨བར་མུ་མཐུད་དུ་གངས་འབབ་རྒྱུ་རེད་ཟེར། མདོ་སྨད་གཏེར་ལམ་རྫོང་ལ་ཕྱི་ཕྱོགས་ནས་པཎ་ཆེན་ཤིང་སྡེ་ཞེས་འབོད་པ་དང་། རྫོང་དེར་ད་ལྟ་མི་གྲངས་འབུམ་གཅིག་ལྷག་ཡོད་ལ། སྤྱིར་བཏང་བོད་དང་སོག་པོ་གནས་སྡོད་ཀྱི་ཞིང་ཕྱུགས་གཉིས་ཀ་ཡོད་པའི་ས་གནས་ཤིག་ཡིན་ནའང་ད་ལྟ་མི་གྲངས་མང་ཤོས་དེ་རྒྱ་རིགས་ཆགས་ཡོད།

གསར་འགོད་པ་ལྕགས་མོ་འཚོ།