ནིའུ་ཛི་ལེནཌ་ས་ཡོམ་གོད་ཆག་ཕོག་པ་རྣམས་ལ་གསོལ་སྨོན།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནིའུ་ཛི་ལེན་དྲིའི་གྲོང་ཁྱེར་ཀ་རའེ་སི་ཆརྖ་དུ་ཆིབས་བསྒྱུར་བསྐྱངས་ནས་། ༸གོང་ས་མཆོག་གིས་དབུ་ཞུགས་ཐོག།  འདི་ལོ་ཕྱི་ཟླ་༢པའི་ནང་ས་ཡོམས་ཀྱི་གོད་ཆག་ཚབས་ཆེ་ཕོག་པའི་གྲོང་ཁྱེར་དེའི་མི་མང་སྟོང་ཕྲག་མང་པོ་འདུས་པའི་གསོལ་འདེབས་སྨོན་ལམ་གྱི་འདུ་འཛོམས་ཤིག་གནང་འདུག།

གསོལ་འདེབས་སྨོན་ལམ་གྱི་འདུ་འཛོམས་དེ་དབུ་འཛུགས་མ་གནང་གོང་༸གོང་ས་མཆོག་གིས་ཕྱི་ཟླ་གཉིས་པའི་ནང་གི་ས་ཡོམ་སྐབས་རྐྱེན་འདས་སུ་ཕྱིན་པའི་རྗེས་ཤུལ་ནང་མི་ཁག་ཅིག་ལ་མཇལ་ཁ་གནང་ནས་སེམས་སྡུག་བྱེད་བཞིན་པའི་ནང་མི་ཁག་ཅིག་ལ་སེམས་གསོ་གནང་ཡོད་པ་མ་ཟད། ཀ་རའེ་སི་ཆརྖ་སྨན་ཁང་ནང་སྨན་བཅོས་བྱེད་བཞིན་པའི་ས་ཡོམ་སྐབས་རྨས་སྐྱོན་ཕོག་པའི་ནད་པ་ཁག་ཅིག་དང་ཁོང་ཚོར་ལྟ་རྟོགས་བྱེད་མཁན་སྨན་ཁང་གི་ལས་བྱེད་པ་ཚོ་ཐུགས་འཕྲད་གནང་བར་སྨན་ཁང་དུ་ཞབས་ཅག་གནང་ཡོད་པ་རེད།

༸གོང་ས་༸སྐྱབས་མགོན་ཆེན་པོ་མཆོག་གིས་ཀ་རའེ་སི་ཆརྖ་གྲོང་ཁྱེར་གྱི་མང་ཚོགས་ལ། འདས་ཟིན་པའི་གནས་ཚུལ་ལ་སེམས་ཕྲལ་མ་བྱས་པར། མདུན་བསྐྱོད་བྱེད་དགོས་སྐོར་བཀའ་གནང་སྟེ། དཀའ་སྡུག་ལས་རྣམ་པར་རྒྱལ་སྟེ་མདུན་ལམ་བཟང་པོ་ཡོང་བའི་རེ་བ་རྒྱབ་དགོས་རྒྱུའི་ལམ་སྟོན་བཀའ་སློབ་གནང་བཞག།༸གོང་ས་མཆོག་ད་རེས་ཨོ་སི་ཀྲོ་ལི་ཡ་ཁུལ་ཉིན་གྲངས་བཅུའི་རིང་གི་ཆིབས་བསྒྱུར་མཛད་འཆར་ཡོད་པ་དང༌། ཨོ་སི་ཀྲོ་ལི་ཡའི་ནང་ཆིབས་བསྒྱུར་དབུ་འཛུགས་མ་གནང་གོང་ནིའུ་ཛི་ལེན་དྲིའི་གྲོང་ཁྱེར་ཀ་རའེ་སི་ཆརྖ་དུ་མང་ཚོགས་ལ་སེམས་བསོ་གནང་བར་ཕེབས་རྒྱུའི་ཐུགས་རེ་གནང་བ་ཞིག་ཡིན་པ་རེད།།