༧གོང་ས་མཆོག་གིས་ཐེ་ཝན་གྱི་ས་ཡོམ་གོད་ཆག་ལ་ཐུགས་གསོའི་ཐུགས་སྨོན་གནང་འདུག

ཐེ་ཝན་ནང་འགུལ་ཚད་རིམ་པ་དྲུག་ལྷག་གི་ས་ཡོམ་རྒྱབ་པའི་གོད་ཆག་ཐད་བོད་ཀྱི་དབུ་ཁྲིད་༧གོང་ས་མཆོག་གིས་ཐུགས་གསོའི་ཐུགས་སྨོན་གནང་འདུག
དེ་ཡང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཐེ་ཝན་སྲིད་འཛིན་གྱི་མཚན་ཐོག་ཕྱག་བྲིས་ཤིག་གནང་བའི་ནང༌། ད་ལམ་རྒྱལ་ཁབ་དེའི་ནང་ས་ཡོམ་གྱི་རྐྱེན་ངན་འོག་མི་རྒྱུ་གཉིས་ལ་གོད་ཆག་ཆེན་པོ་བྱུང་བར་ཐུགས་ཕམ་དང་འབྲེལ་གོད་ཆག་ཕོག་པའི་ནང་མི་རྣམས་ལ་ཐུགས་གསོའི་སྨོན་འདུན་གནང་འདུག
དེ་བཞིན་ཡང་བོད་མི་མང་སྤྱི་འཐུས་ཚོགས་གཙོས་ཐུགས་གསོའི་འཚམས་འཕྲིན་གནང་བའི་ནང་། ས་ཡོམ་གྱི་ཆག་འཇིགས་འདི་ལས་ཁྱེད་དང་ཁྱེད་ཀྱི་མི་མང་རྣམས་ན་ཟུག་དང་སྡུག་བསྔལ་གྱིས་མནར་བཞིན་པའི་གནས་སྐབས་འདིར་བཙན་བྱོལ་དུ་ཡོད་པའི་བོད་མི་མང་སྤྱི་འཐུས་ལྷན་ཚོགས་དང་། མི་མང་གིས་ཁྱེད་དང་ཁྱེད་ཀྱི་མི་མང་དང་མཉམ་དུ་གདུང་སེམས་མཉམ་སྐྱེད་དང་བཅས་ཐུགས་སྨོན་གནང་གི་ཡོད་ཅེས་འཁོད་ཡོད་པ་རེད།
ད་རེས་ཐེ་ཝན་མཚོ་ཁའི་གྲོང་ཁྱེར་ཧྭ་ལེན་ཁུལ་དུ་བརྒྱབས་པའི་ས་ཡོམ་དེའི་ནང་ཉུང་མཐར་མི་༩འཆི་སྐྱོན་དང་། ༦༢་གར་སོང་ཆ་མེད་དུ་གྱུར་འདུག་པ་དང་། མི་གྲངས་༢༧༠་ཙམ་ལ་རྨས་སྐྱོན་ཕོག་ཡོད་པ་རེད།
ཕྱི་ཚེས་ ༧ ཉིན་གྱི་ཞོགས་པར་ཐེ་ཝན་གྱི་སྲིད་འཛིན་ལྕམ་ཚེ་ཡེན་ཝིན་གནོད་འཚེ་ཕོག་སའི་ས་ཁུལ་དུ་ཕེབས་ཏེ། ཛ་དྲག་མྱུར་སྐྱོབ་པས་སེམས་ཤུགས་མ་ཆགས་པའི་ཐོག་ནས་མིའི་ཚེ་སྲོག་སྐྱོབ་པར་མུ་མཐུད་ཧུར་ཐག་བྱེད་དགོས་པ་དང་། སྲིད་གཞུང་གི་ངོས་ནས་ཕྱོགས་ཡོངས་ནས་གཟིགས་རྟོགས་དང་རོགས་རམ་གང་ལེགས་གནང་རྒྱུ་ཡིན་སྐོར་གསུངས་འདུག

གསར་འགོད་པ་ངག་ཆོས་དང་། བོད་རྒྱལ།