ཨང་སན་སུ་ཅིས་བྱང་ཕྱོགས་སུ་འོས་བསྡུའི་དྲིལ་བསྒྲགས་སྤེལ།

༄༅༎འབར་མའི་མང་གཙོ་ཚོགས་པའི་ཚོགས་གཙོ་ལྕམ་ཨང་སན་སུ་ཅི་མཆོག་བྱང་ཕྱོགས་སུ་འོས་བསྡུའི་དྲིལ་བསྒྲགས་ཆེད་ཕེབས་འབྱོར་བྱུང་ཡོད་པའི་གནས་ཚུལ་ཐོན་འདུག
དེ་ཡང་འབར་མའི་ནང་རིང་མིན་ཕྱི་ཟླ་བཞི་པའི་ནང་འོས་བསྡུ་བྱེད་རྒྱུ་ཡིན་པའི་དུས་ཚོད་འདིར་མང་གཙོ་ཚོགས་པའི་འགོ་འཁྲིད་ལྕམ་ཨང་སན་སུ་ཅི་མཆོག་ད་རིང་རེས་གཟའ་ཕུར་བུའི་ཉིན་འབར་མའི་བྱང་ཕྱོགས་ལུང་ཁུག་ས་ཁུལ་ཁག་ཅིག་ལ་འོས་བསྡུའི་དྲིལ་བསྒྲགས་གནང་བར་ཕེབས་ཡོད་འདུག ཁོང་ཁུལ་དེར་ཕེབས་པའི་སྐབས་མང་ཚོགས་དང་ལྷག་པར་དུ་གྲངས་ཉུང་མི་རིགས་ཚོས་དགའ་བསུ་ཟབ་རྒྱས་ཞུས་ཡོད་འདུག ཁོང་ལ་རྒྱབ་སྐྱོར་ཞུ་མཁན་གྲངས་ཉུང་ཀོ་ཅིན་ཞེས་པའི་མི་རིགས་ཡིན་པ་ཞིག་གིས། ངའི་མི་ཚེའི་ནང་ཁོང་རྩ་བ་ནས་མཇལ་མྱོང་མེད། ཁོང་ནི་བུད་མེད་དཔའ་མོ་ཞིག་དང་ནོ་བེལ་ཞི་བདེའི་གཟེངས་རྟག་བཞེས་མྱོང་མཁན་ཞིག་ཡིན་དུས་ད་རེས་ཁོང་མཇལ་བར་ཧ་ཅང་དགའ་པོ་བྱུང་ཞེས་འགྲེལ་བརྗོད་བྱེད་འདུག ཡང་ཧོང་ཀོང་ལ་རྟེན་གཞི་བྱས་པའི་འབར་མའི་གནད་དོན་ཐོག་མཁས་པ་རེ་ནོདྲ་ཞུ་བས། ལྕམ་ཨང་སན་སུ་ཅི་མཆོག་ནས་རིགས་བརྒྱུད་དང་། ཚོགས་པ་སོགས་ཀྱི་དབྱེ་འབྱེད་མེད་པར་མི་མང་མཐུན་སྒྲིལ་ཡོང་ཐབས་སུ་འབད་བརྩོན་གནང་ཡོད་པར་བརྟེན་མང་ཚོགས་ནས་དགའ་མོས་བྱེད་ཀྱི་ཡོད་རེད་ཅེས་གསུངས་འདུག།