འབར་མའི་ལྕམ་སུའུ་ཆི་མཆོག་རྒྱལ་ཡོངས་གྲོས་ཚོགས་སུ་གདན་ཞུ།

༄༅༎ཉེ་དུས་འབར་མའི་རྒྱལ་ཡོངས་གྲོས་ཚོགས་ཀྱི་ཁ་སྐོང་འོས་བསྡུའི་ནང་ལྕམ་ཨོང་སན་སུའུ་ཆི་དང་ཁོང་གི་ཚོགས་པ་འབར་མའི་དམངས་གཙོ་ཚོགས་པར་རྒྱལ་ཁ་ཆེན་པོ་ཐོབ་རྗེས། ལྕམ་སུའུ་ཆི་མཆོག་ལ་བདུན་ཕྲག་གཉིས་རྗེས་རྒྱལ་ཡོངས་གྲོས་ཚོགས་ཀྱི་ལྷན་འཛོམས་སར་ཕེབས་དགོས་པའི་གདན་ཞུ་འབྱོར་གནང་འདུག།
དེ་རིང་འབར་མའི་དམངས་གཙོ་ཚོགས་པའི་མགྲིན་ཚབ་པ་ནིཡེན་ལྦིན་ཡིས་གསུང་ན། འོས་བསྡུའི་རྒྱལ་ཁ་ཐོབ་གནང་བའི་ལྕམ་སུ་ཅི་མཆོག་དང༌། དམངས་གཙོ་ཚོགས་པའི་འཐུས་མི་༣༦ལ་ རྒྱལ་ས་ནེ་པི་ཀྲོའོ་ནང་རྒྱལ་ཡོངས་གྲོས་ཚོགས་ཀྱི་ལྷན་འཛོམས་ཐོག་ངོས་བཅར་ཞུ་དགོས་པའི་བརྡ་ཁྱབ་འབྱོར་གནང་ཡོད་པ་རེད། དགུང་གྲངས་༦༦ལ་ཕེབས་པའི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་ སུ་ཅི་མཆོག་འབར་མའི་གྲོས་ཚོགས་ནང་མཉམ་བཞུགས་གནང་རྒྱུ་ཡིན་པ་དེ་ནི་འདས་པའི་མི་ལོ་བཅུ་ཕྲག་ལྔའི་རིང་ལྕགས་ཀྱི་བར་མོའི་དབང་འཛིན་འོག་ཡོད་པའི་རྒྱལ་ཁབ་འབར་མ་དེ་བཞིན་མ་འོངས་ལམ་ཕྱོགས་བཟང་པོའི་ཕྱོགས་སུ་བསྐྱོད་རྒྱུའི་མདུན་མཆོངས་ཆེན་པོ་ཞིག་ཡིན་པ་རེད།
ཉེ་དུས་ཕྱི་ཟླ་༤པའི་ཚེས་༡ཉིན་འབར་མའི་རྒྱལ་ཡོངས་གྲོས་ཚོགས་ཀྱི་འཐུས་མི་༤༥འི་ཁ་སྐོང་འོས་བསྡུའི་སྐབས། འབར་མ་དམངས་གཙོ་ཚོགས་པའི་འཐུས་མི་༤༣ལ་རྒྱལ་ཁ་ཐོབ་ཡོད་པ་རེད། དམངས་གཙོ་ཚོགས་པའི་མགྲིན་ཚབ་པ་ནིཡེན་ལྦིན་ཡིས་ཟླ་བ་འདིའི་ཚེས་༢༣ནས་མུ་མཐུད་འཚོགས་གནང་རྒྱུའི་འབར་མའི་གྲོས་ཚོགས་འོག་མའི་ཚོགས་ཆེན་སར་ཚོགས་གཙོ་ལྕམ་ཨོང་སན་ སུ་ཅི་གཙོས་པའི་གསར་དུ་འོས་འདེམས་བྱུང་བའི་དམངས་གཙོ་ཚོགས་པའི་གྲོས་ཚོགས་འཐུས་མི་ཡོངས་མཉམ་བཞུགས་གནང་གི་ཡོད་པ་དང༌། གྲོས་ཚོགས་གོང་མའི་འཐུས་མིར་འོས་འདེམས་བྱུང་བའི་དམངས་གཙོ་ཚོགས་པའི་འཐུས་མི་བཞི་ལ་ད་ལྟ་འབྲེལ་བ་གནང་མཁན་བྱུང་མེད་སྐོར་གསུངས་བཞག།