རྒྱལ་སྤྱིའི་རང་བཞིན་ལྡན་པའི་ངོ་རྒོལ་གྱི་ལས་འགུལ་ནང་མཉམ་ཞུགས་བྱ་རྒྱུ་ཡིན།

ཐེ་ཝན་ནང་གི་གཞུང་འབྲེལ་མིན་པའི་ཚོགས་པ་ཁག་ཅིག་ཟུང་འབྲེལ་གྱིས་རྒྱ་ནག་གི་འགོ་ཁྲིད་ཞེ་ཅིན་ཕིང་གིས་འདས་པའི་ལོ་ངོ་ལྔའི་རིང་བོད་ནང་མུ་མཐུད་ནས་དྲག་གནོན་གྱི་སྲིད་བྱུས་འཛིན་བཞིན་པར་རྒྱལ་སྤྱིའི་རང་བཞིན་ལྡན་པའི་ངོ་རྒོལ་གྱི་ལས་འགུལ་ནང་མཉམ་ཞུགས་བྱ་རྒྱུའི་གསལ་བསྒྲགས་བྱས་འདུག
ལས་འགུལ་འདི་ནི་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གིས་ཐོག་མར་འགོ་འཛུགས་བྱས་པ་ཞིག་ཡིན་པ་རེད།
ཐེ་ཝན་ནང་རྟེན་གཞི་བྱས་པའི་བོད་དང་ཐེ་ཝན་འགྲོ་བ་མིའི་ཐོབ་ཐང་འབྲེལ་འཐུད་ཚོགས་པས་འདི་ཚེས་༡༧་གཟའ་མིག་དམར་ཉིན་ཐེ་ཝན་ནང་གསར་འགོད་ལྷན་ཚོགས་བསྐོངས་ཚོགས་ཀྱིས། རྒྱ་ནག་གི་འགོ་ཁྲིད་ཞི་ཅིན་ཕིང་གིས་འདས་པའི་ལོ་ངོ་ལྔའི་རིང་རྒྱ་ནག་གི་ཆེས་མཐོའི་དཔོན་རིགས་ཀྱི་དབང་ཆ་བཟུང་བའི་རྗེས། བོད་ནང་རྒྱ་ནག་གཞུང་གིས་འཛིན་བཞིན་པའི་དམ་དྲག་གི་སྲིད་བྱུས་ལ་འགྱུར་ལྡོག་གང་ཡང་བཏང་མེད་པར་དམ་དྲག་གི་གནས་སྟངས་དེ་བས་ཛ་དྲག་ཏུ་གཏོང་བཞིན་པར་ཐེ་ཝན་ནང་གི་གཞུང་འབྲེལ་མིན་པའི་ཚོགས་པ་ཁག་ཅིག་མཉམ་རུབ་ཐོག་ནས་ཞེ་ཅིན་ཕིང་གིས་བོད་ཐོག་གི་ཕམ་ཉེས་སྲིད་བྱུས་ཞེས་པའི་བརྗོད་ཚིག་ཐོག་ནས་རྒྱལ་སྤྱིའི་ཐོག་ངོ་རྒོལ་གྱི་ལས་འགུལ་སྤེལ་རྒྱུ་ཡིན་པའི་སྐོར་ཕྱིར་བསྒྲགས་བྱས་ཡོད་འདུག
ཐེ་ཝན་གཞུང་འབྲེལ་མིན་པའི་ཚོགས་པ་ཁག་གིས་མཉམ་རུབ་ཐོག་ནས་རྒྱ་ནག་གཞུང་གིས་བོད་ཐོག་འཛིན་པའི་དྲག་གནོན་གྱི་སྲིད་བྱུས་ལ་ངོ་རྒོལ་གྱི་ལས་འགུལ་སྤེལ་དེས་རྒྱལ་སྤྱིའི་ཐོག་ནས་ཕྱི་ལོ་༢༠༡༢ལོ་ནས་བཟུང་བོད་ནང་གི་གནས་སྟངས་ཇེ་ཞན་ཇེ་སྡུག་ཏུ་བཏང་ཡོད་པ་དེ་ཤེས་རྟོགས་ཡོང་ཐབས་ཆེད་ཡིན་པ་བོད་དང་ཐེ་ཝན་འགྲོ་བ་མིའི་འབྲེལ་འཐུད་ཚོགས་པས་སྤེལ་བའི་གསལ་བསྒྲགས་དེའི་ནང་བཀོད་འདུག
ད་དུང་གསལ་བསྒྲགས་དེའི་ནང་།  བོད་ནང་ད་ཆ་རྒྱ་ནག་གཞུང་གི་བསམ་ཚུལ་དང་མི་མཐུན་པའི་སྐད་སྒྲ་གཅིག་ཀྱང་སྒྲོག་མི་ཆོག་པ་མ་ཟད། ཆབ་སྲིད་བཙོན་པ་ཚོར་ཉེས་རྡུང་མནར་གཅོད་གཏོང་བ། ཆོས་ལུགས་ལ་དད་ཞེན་བྱེད་མཁན་ཚོར་རྡུང་རྡེག་གཏོང་བ་སོགས་ཀྱི་གནས་ཚུལ་ཧ་ཅང་ཚབས་ཆེ་ཡོད་པའི་སྐོར་སོགས་བཀོད་ཡོད་འདུག
བོད་དང་ཐེ་ཝན་འགྲོ་བ་མིའི་ཐོབ་ཐང་འབྲེལ་འཐུད་ཚོགས་པའི་འགན་འཛིན་བཀྲིས་ཚེ་རིང་ལགས་ཀྱིས་གསར་འགོད་ལྷན་ཚོགས་ཐོག་གཏམ་བཤད་སྤེལ་བའི་སྐབས། རྒྱ་ནག་གུང་ཁྲན་ཚོགས་པའི་ཚོགས་ཆེན་བཅུ་དགུ་པ་སང་ཉིན་ཚེས་༡༩་ནས་འགོ་འཚུགས་ཀྱི་ཡོད་པ་དང་། རྒྱ་ནག་གི་འགོ་ཁྲིད་ཞི་ཅིན་ཕིང་གིས་མ་འོངས་རྒྱ་ནག་གི་སྲིད་དབང་བཟུང་རིང་བོད་ཀྱི་གནད་དོན་ཐོག་བཟང་ཕྱོགས་ཀྱི་འགྱུར་ལྡོག་གཏོང་རྒྱུའི་རེ་བ་བྱེད་ཀྱི་ཡོད་ཅེིས་གསུངས་འདུག

གསར་འགོད་པ་འཆི་མེད།