གྲོས་མོལ་དེ་རྒྱ་ནག་གཅིག་ཅེས་པའི་སྒྲོམ་གཞིའི་འོག་གནང་དགོས།

ཚེས༤ཉིན་ཐེ་ཝན་གྱི་གཞུང་འཛིན་གོ་མིན་ཏང་ཚོགས་པའི་ཚོགས་གཙོ་དང་རྒྱ་ནག་གི་སྲིད་འཛིན་དབར་ཐུག་འཕྲད་གནང་ཡོད་པ་རེད།
དེ་ཡང་རྒྱ་ནག་གི་སྲིད་འཛིན་ཞེ་ཅིན་ཕེན་གྱིས་ཐེ་ཝན་གོ་མིན་ཏང་ཚོགས་པའི་ཚོགས་གཙོ་དང་མཇལ་འཕྲད་གནང་ནས་ཕྱོགས་ཕན་ཚུན་འདྲ་མཉམ་ཐོག་གྲོས་མོལ་གནང་ནས་མཐུན་མིན་གྱི་གནད་དོན་ཁག་སེལ་ཐབས་གནང་དགོས་ཞེས་གསུངས་ཡང་གྲོས་མོལ་དེ་རྒྱ་ནག་གཅིག་ཅེས་པའི་སྒྲོམ་གཞིའི་འོག་གནང་དགོས་སྐོར་གསུངས་ཡོད་འདུག ཤིན་ཧ་གསར་འགྱུར་ལས་ཁང་གིས། སྲིད་འཛིན་ཞེ་ཅིན་ཕེན་གྱིས་ཕྱོགས་ཕན་ཚུན་རྒྱ་ནག་གཅིག་ཅེས་པའི་ལངས་ཕྱོགས་འོག་འདྲ་མཉམ་ལྡན་པའི་ངང་གྲོས་མོལ་གནང་ནས་རྒྱུ་མཚན་དང་ལྡན་པའི་འགྲིག་འཇགས་གཅིག་ཡོང་ཐབས་གནང་དགོས་གསུངས་པ་ལུང་འདྲེན་གནང་ཡོད་པ་རེད། ཡང་ཤིན་ཧ་གསར་འགྱུར་ལས་ཁང་གིས་སྲིད་འཛིན་ཞེ་ཅིན་ཕེན་གྱིས་ཕྱོགས་ཕན་ཚུན་གཉིས་ཀས་ཡུན་རིང་གི་མཐུན་མིན་གྱི་དཀའ་རྙོག་ཁག་སེལ་རྒྱུར་དཔའ་མཛངས་དང་། བློ་གྲོས་བཏོན་ནས་དཀའ་རྙོག་སེལ་རྒྱུར་ཐབས་ལམ་ལྷོད་མེད་གནང་དགོས་ཞེས་གསུངས་པ་ཡང་ལུང་འདྲེན་གནང་འདུག ཐེ་ཝན་གོ་མིན་ཏང་གི་ཚོགས་གཙོ་སྐུ་ཞབས་ཅུ་ཡིས་རྒྱ་ནག་སྐམ་ས་དང་འགྲིག་འཇགས་ཡོང་རྒྱུའི་གནད་དོན་སྐོར་གསུངས་མེད་ཀྱང་ཁོང་གིས་ཐེ་ཝན་རྒྱལ་སྤྱིའི་ཚོགས་སྡེ་ཁག་ནང་ཞུགས་རྒྱུར་དཀའ་རྙོག་མི་འཕྲད་པའི་རེ་བ་བཏོན་གནང་བ་དེར་རྒྱ་ནག་གིས་རྣམ་ཀུན་ནས་འགག་པ་རྒྱབ་ཀྱི་ཡོད་པ་རེད། ཁོང་ད་ཐེངས་རྒྱ་ནག་གི་སྲིད་འཛིན་དང་མཇལ་འཕྲད་གནང་བ་དེས་ཁོང་གི་ཐེ་ཝན་ནང་གི་ཤུགས་རྐྱེན་དེ་ཆེ་རུ་འགྲོ་རྒྱུ་མ་ཟད། ཁོང་གོ་མིན་ཏང་ཚོགས་པའི་ཁོངས་ནས་ཐེ་ཝན་གྱི་ཕྱི་ལོ་༢༠༡༦ལོའི་སྲིད་འཛིན་གྱི་འོས་བསྡུའི་ནང་བཞེངས་རྒྱུར་འོས་ཤོས་ཀྱི་མི་སྣ་དེ་ཆགས་ཀྱི་ཡོད་པའི་གནས་ཚུལ་ཐོན་འདུག

གསར་འགོད་པ་ལྷུན་གྲུབ་ཚེ་རིང་།