༸གོང་ས་མཆོག་ཐའེ་ལྦན་ལ་ཆིབས་བསྒྱུར་གནང་གཏན།

༄༅༎སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐའེ་ལྦན་ནང་ཆིབས་བསྒྱུར་གནང་རྒྱུར་སྲིད་འཛིན་གྱིས་ཆོག་མཆན་ཕུལ་ཡོད་པའི་གནས་ཚུལ་ཐོན་འདུག

ཨེ་ཨེཕ་པི་གསར་འགྱུར་བརྒྱུད་ལམ་ནས་དེ་རིང་གནས་ཚུལ་སྤེལ་བར་གཞིགས་ན་ཐའེ་ལྦན་གྱི་མང་གཙོ་ཚོགས་པས་གཙོས་འབྲེལ་ཡོད་ཚོགས་པ་ཁག་ཅིག་ནས་ཇི་ལྟར་གསོལ་འདེབས་ཞུས་པ་བཞིན་བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉེ་ཆར་ཐའེ་ལྦན་ཁུལ་ཆར་རླུང་གི་གོད་ཆགས་ཚབས་ཆེ་ཕོག་པའི་ས་གནས་སུ་ཆིབས་བསྒྱུར་གནང་རྒྱུའི་ཞལ་བཞེས་གནང་ཡོད་ཀྱང་ཉིན་ཤས་རིང་གཞུང་གི་ངོས་ནས་ཆོག་མཆན་ཡོང་མིན་ཐེ་ཚོམ་ཆགས་ཡོད་པ་རེད། ཡིན་ནའང་དེ་རིང་སྲིད་འཛིན་མ་ཡིང་ཇུ་མཆོག་གིས་གསར་འགོད་པ་ཚོར་ཉེ་ཆར་ཆར་རླུང་དྲག་པོའི་འོག་རྐྱེན་ལམ་དུ་ཕྱིན་པའི་མི་ཚོའི་ཆེད་ཐུགས་སྨོན་གནང་རྒྱུ་དང་དོན་རྐྱེན་དེའི་འོག་ནས་གསོན་པོར་གནས་པའི་མི་རྣམས་ལ་ཐུགས་ཀྱི་སྦྱིན་རླབས་གནང་རྒྱུའི་ཆེད་༸གོང་ས་ཏཱ་ལའི་བླ་མ་མཆོག་འདི་ཁུལ་གདན་འདྲེན་ཞུ་ཆོག་པའི་ཐག་གཅོད་བྱས་པ་ཡིན་ཞེས་གསུངས་འདུག

ཡང་སྲིད་འཛིན་མ་ཡིང་ཇུའི་མགྲིན་ཚབ་པས་གསར་འགོད་པས་འདྲི་བར་ལན་འདེབས་གནང་དོན་ལ་ད་རེས་ཀྱི་ཆིབས་བསྒྱུར་འདི་བཞིན་ཆོས་ཕྱོགས་དང་འགྲོ་བ་མིའི་བཟང་སྤྱོད་ཀྱི་གནད་དོན་ཞིག་ཡིན་སྟབས་མཚོ་ཁ་ཕན་ཚུན་གཉིས་ཀྱི་འབྲེལ་བར་དོ་ཕོག་འགྲོ་རྒྱུའི་གནས་ཚུལ་གང་ཡང་ཆགས་ཀྱི་མ་རེད་ཅེས་ལན་འདེབས་གནང་འདུག