ཐའེ་ལྦན་གྱིས་མེ་ཤུགས་འཕུར་མདེལ་བཟོ་བསྐྲུན་ལས་འཆར།

༄༅༎ཐའེ་ལྦན་གཞུང་གིས། འཕྲུལ་རིག་ཡར་རྒྱས་ཅན་གྱི་མེ་ཤུགས་འཕུར་མདེལ་བཟོ་སྐྲུན་བྱ་རྒྱུའི་ལས་དོན་ཞིབ་འཇུག་བྱེད་མུས་ཡིན་པ་དང། ལས་གཞི་དེ་ནི་དམག་དོན་ནུས་སྟོབས་ཡར་རྒྱས་བཏང་སྟེ་རྒྱལ་ཁབ་ཀྱི་ཞི་བདེ་སྲུང་སྐྱོབ་བྱ་རྒྱུའི་དམིགས་ཡུལ་ཡིན་པ་གསུང་གི་ཡོད་པ་རེད།

ཐའེ་ལྦན་ཕྱོགས་ནས་རང་ཉིད་ཀྱི་མེ་ཤུགས་འཕུར་མདེལ་བཟོ་སྐྲུན་བྱེད་པའི་ལས་གཞི་དེ་ནི། ཐའེ་ལྦན་གྱི་ཞི་བདེ་སྲུང་སྐྱོབ་ལ་དམིགས་ཏེ། ཐའེ་ལྦན་ལ་གོ་མཚོན་ཚོང་འགྲེམས་བྱེད་མཁན་གཙོ་བོ་ཨ་མི་རི་ཀ་ཡིན་ནའང་རྒྱ་ནག་སྐམ་ས་ཆེན་པོས་ཨ་མི་རི་ཀར་ཚོང་འབྲེལ་དང་ཆབ་སྲིད་ཀྱི་གནོན་ཤུགས་སྤྲད་དེ། ཐའེ་ལྦན་ལ་གོ་མཚོན་ཚོང་འགྱུར་བྱེད་པར་འགོག་རྐྱེན་བཟོ་གི་ཡོད་པར་བརྟེན་ནས་རང་ཉིད་ཀྱི་འཕྲུལ་རིག་ལག་རྩལ་གོང་མཐོར་གཏོང་རྒྱུ་ནི་མེད་དུ་མི་རུང་བའི་ཐབས་ལམ་ཞིག་ཡིན་པ་ངོས་འཛེན་བྱེད་ཀྱི་ཡོད་ཅིང། ཐའེ་ལྦན་གྱི་སྲུང་སྐྱོབ་བློན་ཆེན་ཨེན་ཌི་རུ་ཡང་གིས། རོའུ་ཀྲར་གསར་འགྱུར་ལས་ཁང་ལ་གསུང་དོན། ང་ཚོ་ཐའེ་ལྦན་གྱིས་འཕྲུལ་རིག་ཡར་ཐོན་ཅན་གྱི་མེ་ཤུགས་འཕུར་མདེལ་བཟོ་སྐྲུན་བྱེད་པའི་སེམས་ཤུགས་དང་ནུས་པ་ཡོད་པ་དང། མེ་ཤུགས་འཕུར་མདེལ་བཟོ་སྐྲུན་བྱ་རྒྱུའི་ཞིབ་འཇུག་བྱེད་མུས་ཡིན་པ་དང། དེ་ཡང་ང་ཚོས་ཐའེ་ལྦན་སྲུང་སྐྱོབ་སྲ་བརྟན་ཐུབ་པའི་མེ་ཤུགས་འཕུར་མདེལ་ནུས་པ་ལྡན་པ་ཞིག་བཟོ་ཐུབ་པ་དགོས་རྒྱུ་གལ་ཆེན་པོ་ཡིན་པ་གསུངས་ཡོད་པ་རེད།

ཐའེ་ལྦན་གྱི་སྲུང་སྐྱོབ་ཐོག་ལ་དབྱེ་ཞིབ་གནང་མཁན་ཞིག། ཐའེ་ལྦན་ཕྱོགས་ནས་རྒྱལ་ནང་དུ་བཟོ་སྐྲུན་བྱས་པའི་མེ་ཤུགས་འཕུར་མདེལ་ཞིག་ཚོད་ལྟ་བྱེད་མུས་ཡིན་པ་དང། བཟོ་སྐྲུན་གྱི་ལས་གཞི་དེ་ནི་ན་ནིང་ནས་འགོ་བཙུགས་ཟིན་པའི་སྐོར་གསུངས་ཡོད་པ་དང། དེ་བཞིན་ཨ་མི་རི་ཀའི་མདུན་རེའི་སྲུང་སྐྱོབ་ཀྱི་དུས་དེབ་ཅིག་ཐོག་ལ། ཐའེ་ལྦན་གྱིས་རིང་ཚད་ཀི་ལོ་མི་ཊར་༣༠༠འཕེན་ཐུབ་པའི་མེ་ཤུགས་འཕུར་མདེལ་བཟོ་སྐྲུན་ཐོག་ལ་ཞིབ་འཇུག་བྱས་ཟིན་པ་དང། མེ་ཤུགས་འཕུར་མདེལ་དེར་རྒྱ་ནག་གི་ས་ཐོག་ཏུ་འཕེན་ཐུབ་པའི་ནུས་པ་ཡོད་པའི་སྐོར་བཀོད་ཡོད་པ་རེད།