ཐའེ་ལྦན་དུ་མཚོ་རླུང་གི་གནོད་འཚེའི་འོག་མི་༦༧ཤི་བ།

༄༅༎བདུན་སྔོན་མའི་གཟའ་མཇུག་ཐའེ་ལྦན་ནང་མཚོ་རླུང་དྲག་པོ་མོ་ར་ཀོཏ་ཟེར་བ་དེ་རྒྱབ་ནས་ཆུ་ལོག་གི་གནོད་འཚེའི་འོག་འཆི་སྐྱོན་བྱུང་བའི་མིའི་གྲངས་འབོར་༦༧ལ་སླེབས་ཡོད་པ་དང་ཤྭ་འོད་རྒྱུག་པ་དང་རི་ཉིལ་བའི་འོག་ཞིག་རལ་དུ་ཕྱིན་པའི་གྲོང་གསེབ་ཁག་ནས་མི་དམངས་ཆིག་སྟོང་ཙམ་ཞིག་དེ་རིང་གནམ་ཐོག་ནས་མྱུར་སྐྱོབ་བྱས་འདུག

ཐའེ་ལྦན་ལྷོ་ཕྱོགས་སོའོ་ལིན་ས་ཁུལ་གྱི་གྲོང་གསེབ་ཁག་གསུམ་ནང་ནས་གྲོང་གསེབ་གཅིག་ལ་གནོད་འཚེ་ཆེན་པོ་བྱུང་ཡོད་པ་དང་གསོན་པོར་གནས་པའི་མི་དེ་ཚོ་ཐད་འཕུར་གནམ་གྲུའི་ནང་མྱུར་སྐྱོབ་བྱེད་བཞིན་ཡོད་པ་རེད། གནོད་འཚེ་ཕོག་པའི་ས་ཁུལ་ནས་མིག་མཐོང་དཔང་པོ་ཧོང་ཀྲིན་པའོ་ཡིས་བརྗོད་དོན་ལྟར་ན་ཆུ་ཚོད་སྐར་ཆ་ཁ་ཤས་ཅིག་གི་ནང་རི་ཉིལ་ནས་ཁོ་རང་ཡོད་སའི་གྲོང་གསེབ་དེའི་ནང་གྱི་ཁྱིམ་ཚང་ཕྱེད་ཀ་མན་ཙམ་ཞིག་ས་རུས་འོག་ཤོར་བ་མཐོང་འདུག ཧོང་དང་རོགས་པ་གྲོང་པ་ཁྱིམ་མཚེས་བཞི་བཅུ་ཙམ་ཞིག་མྱུར་སྐྱོབ་བྱེད་མཁན་ཁྱིས་ས་ཆ་མཐོ་སར་འཁྲིད་ཡོད་པ་དང་ཁྱི་དེ་གནིས་ཁོང་ཚོའི་སྲོག་སྐྱོབ་མཁན་ཡིན་སྐོར་འགྲེལ་བརྗོད་བྱས་བཞག

གནོད་འཚེ་ཕོག་པའི་ས་གནས་ཀྱི་ཕྱི་ལ་ཡོད་པའི་སློབ་གྲྭ་ཞིག་ནང་ས་རུས་འོག་ཤོར་བའི་མི་དམངས་ཀྱི་གཉེན་ཚན་དེ་ཚོ་འཛོམས་ནས་བློ་འཚབ་ཆེན་པོ་བྱེད་བཞིན་ཡོད་པ་དང་གནམ་གྲུའི་ནང་ཉེན་གཡོལ་དུ་འགྲོ་རྒྱུའི་དོན་ན་ཚང་ཀ་རྒྱབ་བཞིན་པའི་མི་དམངས་ཐོག་དམག་མི་དང་ཉེན་རྟོག་པ་ཚོས་བཏང་འཛིན་བྱེད་བཞིན་ཡོད་པ་རེད།

དཔུང་དམག་གིས་ངལ་སེལ་རོགས་སྐྱོར་བྱེད་ཤུགས་ཆེ་རུ་བཏང་ཡོད་པ་དང་དེ་རིང་ཐའེ་ལྦན་ས་མཚོ་གཉིས་སྤྱོད་དཔུང་དམག་གིས་ཞིང་པ་ཉིས་བརྒྱ་ལྔ་བཅུ་ཙམ་ཞིག་གསོན་པོར་གནས་པ་རྙེད་འཚོལ་ཐུབ་པ་བྱུང་བ་དང་ད་བར་མི་དམངས་༡༩༢ཙམ་ཞིག་ས་ཁུལ་བཙན་སར་སྤོ་བཞུད་བྱས་ཟིན་ཡོད་པའི་གནས་ཚུལ་འདུག།