སྤྲུལ་སྐུ་བསྟན་འཛིན་བདེ་ལེགས་ཆེད་རྒྱལ་སྤྱིའི་ནང་ལས་འགུལ།

སྤྲུལ་སྐུ་བསྟན་འཛིན་བདེ་ལེགས་ཀྱི་སྐུ་གཟུགས་གནས་སྟངས་ཞན་པོ་ཡོད་པས་ཛ་དྲག་སྨན་བཅོས་ཀྱི་ཆེད་གློད་གྲོལ་གཏོང་དགོས།
དེ་ཡང་རྒྱལ་སྤྱིའི་ནང་གཞུང་འབྲེལ་མ་ཡིན་པའི་ཚོགས་པ་༡༨༠་ཙམ་གྱིས་རྒྱལ་སྤྱིའི་གཞུང་འབྲེལ་ཁག་ལ་སྙན་ཞུ་ཕུལ་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་སྨན་བཅོས་ཀྱིི་མཐུན་རྐྱེན་བསྐྲུན་ཆེད་གློད་གྲོལ་ཡོང་བའི་རེ་སྐུལ་བྱས་ཡོད་པ་རེད། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྒྱའི་བཙོན་འོག་ཏུ་ཚུད་དེ་ལོ་༡༣འཁོར་བའི་ཉིན་མོ་དང་བསྟུན་ཏེ་རྒྱ་གར་གཙོ་པའི་ཡུ་རོབ་དང་། ཨ་རི་སོགས་སུ་ཡང་བོད་རང་བཙན་སློབ་ཕྲུག་ཚོགས་པ་སོགས་ཀྱིས་སྣེ་ཁྲིད་བྱས་ནས་ཁོང་སྨན་བཅོས་ཆེད་གང་མགྱོགས་ཀློད་གྲོལ་གཏོང་དགོས་པའི་ལས་འགུལ་འདྲ་མིན་སྤེལ་བཞིན་པ་རེད།
སྤྱི་ལོ་༢༠༡༤་ལོར་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་ནང་མི་ཚོས་རྒྱ་ནག་གཞུང་ལ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྐུ་གཟུགས་སྐྱོ་བོ་ཡོད་པས་སྨན་བཅོས་ཆེད་འཕྲལ་སེལ་གློད་གྲོལ་ཡོང་བའི་རེ་སྐུལ་སྙན་ཞུ་ཕུལ་ཡོད་ཀྱང་དེར་རྒྱ་ནག་གཞུང་གིས་ལན་འདེབས་སོགས་གང་ཡང་བྱས་མེད་པ་རེད།
སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྒྱ་ནག་གཞུང་གིས་འབར་རྫས་གས་གཏོར་གྱི་ཉེས་མིང་འོག་༢༠༠༢ ལོར་འཛིན་བཟུང་བྱས་ཏེ། ཚུལ་མཐུན་གྱི་ཁྲིམས་གཏུག་གང་ཡང་བྱེད་མ་བཅུག་པར། ཕྱི་ཟླ་༡༢ཚེས་༢ཉིན་སྲོག་ཁྲིམས་བཅད་པ་དང་། ཁོང་དང་མཉམ་དུ་ནག་ཉེས་གཡོག་སའི་བློ་བཟང་དོན་གྲུབ་སྲོག་ཐོག་ཏུ་བཏང་རྗེས། སྤྲུལ་སྐུ་བསྟན་འཛིན་བདེ་ལེགས་ཀྱི་སྲོག་ཁྲིམས་ཚེ་བཙོན་དུ་འགྱུར་བ་བཏང་ཞིང་། ད་ལྟ་བཙོན་ཁང་ནང་ཁོང་གི་སྐུ་གཟུགས་གནས་སྟངས་སྐྱོ་པོ་ཆགས་པ་མ་ཟད། སྙིང་གི་སྙུན་གཞི་ཛ་དྲག་ཏུ་གྱུར་ཡོད་པ་སོགས་ཀྱི་གནས་ཚུལ་ཐོན་འདུག

གསར་འགོད་པ་ཕྲེང་རིང་བསྟན་ནོར།