རྒྱ་གར་གྱི་མངའ་སྡེ་ཁག་ཅིག་ནང་འོས་བསྡུ་འགོ་ཚུགས།

༄༅༎རྒྱ་གར་གྱི་མངའ་སྡེ་ཁག་ཅིག་གི་ནང་འོས་བསྡུ་འགོ་ཚུགས་བྱས་ཡོད་པ་དེས་བར་ལམ་གཞུང་འཛིན་མི་སྣ་རེ་ཟུང་གིས་ལྐོག་ཟ་རུལ་སུངས་བྱས་པ་དང༌། ཡུལ་གྱི་ནང་བཟའ་ཆའི་རིན་གོང་ལ་འཕར་ཆ་ཆེན་པོ་ཕྱིན་པའི་གནད་དོན་གཉིས་པོས་ སྲིད་བློན་མན་མོ་ཧན་སིངྒ་མཆོག་དང་གཞུང་འཛིན་ཀོངྒ་རེསི་ཚོགས་པ་གཉིས་ཀྱི་ཆེ་ཐོངས་ལ་གནོད་ཚབས་ཇི་ཙམ་བྱུང་ཡོད་པ་སྔོན་དཔག་ཐུབ་རྒྱུ་ཡིན་པ་རེད།

དེ་རིང་རྒྱ་གར་བྱང་ཤར་ཨ་སམ་མངའ་སྡེའི་ནང་མང་ཚོགས་ཀྱིས་འོས་ཤོག་འཕེན་ཡོད་པ་དང༌། འོས་བསྡུ་དེ་བཞིན་རིམ་པ་གཉིས་བྱེད་རྒྱུ་ཡིན་པ་རེད། འོན་ཀྱང་ཕྱོགས་ཚང་མས་ནུབ་བེང་གལ་མངའ་སྡེ་དང་ཏ་མིལ་ཎ་དྲུ། ཀེ་རེ་ལ་བཅས་ཀྱི་འོས་བསྡུར་དོ་སྣང་ཆེ་བ་བྱ་རྒྱུ་ཡིན་པ་དང༌། མངའ་སྡེ་གསུམ་པོ་དེའི་ནང་གི་འོས་བསྡུ་ནས་རྒྱ་གར་གྱི་སྲིད་བློན་མན་མོ་ཧན་སིངྒ་མཆོག་ལ་མང་ཚོགས་ཀྱིས་དགའ་མོས་ཇི་ཙམ་བྱེད་ཀྱི་ཡོད་པ་གསལ་པོ་ཆགས་རྒྱུ་ཡིན་པར་མང་པོ་ཞིག་གིས་ངོས་འཛིན་བྱེད་ཀྱི་ཡོད་པ་རེད། ཀོངྒ་རེསི་ཚོགས་པ་དང་དེའི་མཐུན་ཕྱོགས་ཚོགས་པ་ཁག་གིས་ནུབ་བེང་གལ་མངའ་སྡེའི་ནང་ལོ་ངོ་བཅུ་ཕྲག་གསུམ་ཙམ་རིང་དམར་ཤོག་གི་སྲིད་དབང་མཇུག་སྒྲིལ་ཐུབ་པའི་རེ་བ་ཆེན་པོ་ཡོད་པ་མ་ཟད། ལྷོ་ཕྱོགས་ཀེ་རེ་ལ་མངའ་སྡེའི་ནང་གཡོན་ཐལ་དམར་ཤོག་ཚོགས་པའི་སྲིད་དབང་འཛིན་སྐྱོང་ལ་མང་ཚོགས་ཡིད་རྨུག་པའི་གནས་སྟངས་འོག་ནས་འགྲེལ་ཐུབ་རྒྱུའི་རེ་བ་ཡོད་པ་རེད།