ཀམ་སྦོ་ཌི་ཡའི་དམག་མི་གཉིས་རྐྱེན་ལམ་དུ་ཕྱིན་ཡོད་པ།

༄༅༎ཉིན་ཤས་གོང་ཐའེ་ལེནཌ་དང་ཀམ་སྦོ་ཌི་ཡའི་ས་མཚམས་ས་ཁུལ་ཞིག་ཏུ་ཡུལ་གྲུ་གཉིས་ཀྱི་དཔུང་དམག་དབར་དྲག་འཐབ་ཀྱི་ཛ་དྲག་གནས་ཚུལ་ཞིག་བྱུང་བ་དེ་ད་ཆ་ལྷིང་འཇགས་སུ་གྱུར་ཡོད་པའི་གནས་ཚུལ་ཐོན་འདུག

དེ་ཡང་ཐའེ་ལེནཌ་དང་ཀམ་སྦི་ཌི་ཡ་གཉིས་ཀྱི་ས་མཚམས་ཤིག་ཏུ་ནང་པའི་གནས་ཆེན་ཞིག་ཡོད་པ་དང་ཉེ་ལམ་ཞིག་ནས་ཡུལ་གྲུ་གཉིས་དབར་ས་གནས་དེའི་བདག་དབང་གི་ཐད་རྩོད་རྙོག་ཅིག་བྱུང་སྟེ་ཕྱོགས་གཉིས་ཀྱི་དམག་དཔུང་ཁུལ་དེར་འགྲེམས་འཇོག་བྱས་ཡོད་པར་བརྟེན་འདི་ཚེས་བཅོ་ལྔའི་ཉིན་དམག་དཔུང་དེ་དག་གི་དབར་འཐབ་འཁྲུག་བཤོར་ཏེ་ཀམ་སྦི་ཌི་ཡའི་དམག་མི་གཉིས་རྐྱེན་ལམ་དུ་ཕྱིན་ཡོད་པ་དང་ཐའེ་ལེནཌ་གྱི་དམག་མི་བདུན་ལ་རྨས་སྐྱོན་ཕོག་པའི་ཛ་དྲག་གི་གནས་ཚུལ་ཞིག་བྱུང་བའི་རྗེས་ས་གནས་སུ་ཡོད་པའི་ཡུལ་གྲུ་གཉིས་ཀྱི་དམག་དཔོན་རྣམས་མཉམ་འཛོམས་ཀྱིས་ཞི་མོལ་བྱས་པའི་མཐར་ད་ཆ་ཕྱོགས་གཉིས་དབར་མེ་འཕེན་མཚམས་འཇོག་བྱེད་ཐུབ་པ་བྱུང་ཡོད་པ་མ་ཟད་ཕྱིན་ཆད་གནས་ཚུལ་དེ་རིགས་མི་ཡོང་བའི་ཆེད་རྩོད་རྙོག་ཡོད་སའི་ས་ཁུལ་དུ་རྒྱལ་ཁབ་གཉིས་ཀྱི་དཔུང་དམག་ཚོས་མཉམ་སྦྲེལ་གྱི་ཐོག་ནས་སྐོར་གཡེང་བྱ་རྒྱུའི་ཐག་ཆོད་བྱུང་ཡོད་པའི་འགྲེལ་བརྗོད་བྱས་འདུག