ཆབ་སྲིད་བཙོན་པ་ཐབས་མཁས་རྒྱ་མཚོ་ལགས་བཙོན་གྲོལ་བྱུང་འདུག
ཐབས་མཁས་རྒྱ་མཚོ་ལགས་བཙོན་འཇུག་མ་བྱས་གོང་གི་པར།
བོད་འབྱོར།/RFA
ཕྱི་ལོ་༢༠༠༨་ལོར་རྒྱ་ནག་གཞུང་གིས་མདོ་ལྷོའམ་ཀན་ལྷོ་བསང་ཆུ་བླ་བྲང་ཕྱོགས་ཀྱི་བོད་མིའི་ས་བྱི་ཞི་རྒོལ་དང་འབྲེལ་ནས། འཛིན་བཟུང་བཙོན་འཇུག་བྱས་པའི་དགེ་འདུན་པ་ཐབས་མཁས་རྒྱ་མཚོ་ལགས། འདི་ལོའི་ཕྱི་ཟླ་༩་ཟླ་དཀྱིལ་ཙམ་ནང་བཙོན་འཇུག་དུས་ཡུན་ལོ་གཉིས་མ་ཚང་གོང་ནས་ཀློད་གྲོལ་བཏང་ཡོད་པ་དང་། ད་ལྟའི་ཆར་ཁོང་བཙོན་གྲོལ་བཏང་ཡོད་པའི་གནས་ཚུལ་ཙམ་ལས་ཁོང་གི་ད་ལྟའི་འཕྲོད་བསྟེན་གྱི་གནས་བབ་དང་། གློ་བུར་དུ་བཙོན་གྲོལ་བཏང་དགོས་པའི་རྒྱུ་རྐྱེན་ག་རེ་ཡིན་པ་སོགས་གསལ་ཁ་གང་ཡང་མེད་པ་མ་ཟད། དམ་དྲག་གི་རྐྱེན་གྱིས་ཁོང་གི་སྐོར་ལ་སྐད་ཆ་འདྲི་རྒྱུར་དཀའ་ལས་ཁག་པོ་ཆགས་ཡོད་པ། བོད་ཕྱི་ནང་གཉིས་སུ་ཡོད་པའི་འབྲེལ་ཡོད་བོད་མི་ཁག་ཅིག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།
གནས་ཚུལ་ཡོང་ཁུངས་ཀྱིས་ཁོང་ཚོས་གསུངས་ན། ཐབས་མཁས་རྒྱ་མཚོ་ལགས་བཙོན་གྲོལ་བྱུང་བ་དངོས་བདེན་ཡིན་ན་ཡང་། དེ་སྔ་ཁོང་བཙོན་ཁང་དུ་ཡུན་རིང་ངལ་རྩོལ་ལ་བཀོལ་ཡོད་པ་སྟབས། མིག་གཉིས་དང་གཟུགས་གཞི་ནད་གཅོང་དུ་གྱུར་ཡོད་པ་དང་། ད་ལྟ་ཁོང་གློ་བུར་དུ་བཙོན་གྲོལ་བཏང་བ་དེ་ཅི་ཡིན་དོགས་གཞི་བྱ་དགོས་པའི་གནས་སུ་ཡོད་སྐོར་དང་། ཡང་འབྲེལ་ཡོད་གཞན་ཞིག་གིས་ཁོང་ད་ལྟའི་ཆར་རང་ཁྱིམ་དུ་འབྱོར་ཡོད་པའི་གནས་ཚུལ་འདུག་ལ། ཁོང་ནི་ནམ་རྒྱུན་མི་རིགས་ཀྱི་ཆེད་དུ་བློས་གཏོང་ཐུབ་མཁན་ཞིག་དང་དཔའ་བློ་ཁོག་ཅན་ཞིག་ཡིན་སྟབས། བཙོན་ཁང་དུ་ཉེན་རྟོག་པར་ངོ་རྒོལ་བྱས་པས་ཡུན་རིང་གཅར་རྡུང་དང་མནར་གཅོད་མྱངས་དགོས་བྱུང་ཡོད་ན་ཡང་། ད་ལྟའི་ཆར་གཟུགས་གཞིའི་བདེ་ཐང་ཐད་བློ་ཚབས་རང་བཞིན་ཞིག་ཆགས་ཡོད་སྐོར་འགྲེལ་བརྗོད་གནང་བྱུང་།
དགེ་འདུན་པ་ཐབས་མཁས་རྒྱ་མཚོ་ལགས། ཕྱི་ལོ་༢༠༠༨་ལོའི་བླ་བྲང་ཕྱོགས་ཀྱི་མི་མང་གི་ཞི་རྒོལ་གྱི་སྣེ་ཁྲིད་པ་ཡིན་པའི་ཉེས་འཛུགས་འོག ལོ་དེའི་ནང་བླ་བྲང་དགོན་དུས་འཁོར་གྲྭ་ཚང་གི་རང་ཤག་ནས་འཛིན་བཟུང་བཙན་ཁྲིད་བྱས་རྗེས། ལོ་གཅིག་ཙམ་རིང་གནས་ཚུལ་ཅི་ཡང་ཤེས་རྟོགས་མ་ཐུབ་པར་ལྷག་ཡོད་པ་དང་། ཕྱི་ལོ་༢༠༠༩་ཟླ་༥་ཚེས་༢༡་ཉིན་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ཟེར་བས། ཁ་བྲལ་ཞི་རྒོལ་སྣེ་ཁྲིད་པ་དང་། ༢༠༠༥་ལོ་ནས་བཟུང་ཕྱི་ཕྱོགས་སུ་ཡོད་པའི་བོད་རང་བཙན་གྱི་ཚོགས་པ་ཁག་ལ་འབྲེལ་བ་བྱས་སྐོར་བརྗོད་ནས། དུས་ཡུན་ལོ་༡༥་ཡི་བཙོན་འཇུག་ཁྲིམས་ཐག་བཅད་པ་དང་ལོ་༥་ཡི་ཆབ་སྲིད་ཀྱི་ཁེ་དབང་འཕྲོག་ཡོད་པ་རེད། ཕྱིས་སུ་རྒྱ་ནག་གཞུང་གིས་ཁོང་དང་ཁོང་གི་བཙོན་རོགས་དགེ་འདུན་པ་སྐལ་བཟང་རྒྱ་མཚོ་གཉིས་གསང་སྟབས་ཀྱིས་ཀན་སུའུ་ཞིང་ཆེན་པེ་ཡེན་(白银)་བཙོན་ཁང་དུ་ཁྲིད་དེ། ཡུན་རིང་ངལ་རྩོལ་བསྒྱུར་བཀོད་ལ་བཀོལ་རྐྱེན། ནད་མནར་གྱིས་ཕྱི་ལོ་༢༠༡༨་ལོར་ཁོང་ཀན་སུའུ་ཞིང་ཆེན་ཁོངས་ཀྱི་ཏེན་ཞིའི་བཙོན་ཁང་གི་སྨན་ཁང་དུ་ཡུན་རིང་སྡོད་དགོས་བྱུང་ཡོད་འདུག
ཐབས་མཁས་རྒྱ་མཚོ་ལགས་ནི་བསང་ཆུ་རྫོང་བསང་ཁོག་ནས་ཡིན་པ་དང་། ད་ལོ་དགུང་ལོ་༤༦་ཡིན་འདུག
གསར་འགོད་པ། སངས་རྒྱས་དཀོན་མཆོག
རྩོམ་སྒྲིག་པ། རྡོ་རྗེ་དགྲ་འདུལ།
དྲ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཀླུ་འབུམ།
བལྟ་བཤེར་མང་ཤོས་བྱས་པའི་གནས་ཚུལ།
RFA
- ༸གོང་ས་༸སྐྱབས་མགོན་ཆེན་པོ་མཆོག་གིས་དཀའ་ཁག་ཆེ་བའི་དུས་སྐབས་འདིར་༸རྒྱལ་དབང་རིན་པོ་ཆེ་ཡོད་བསམ་ནས་བློ་བདེ་པོ་བྱོས་ཞེས་མཇལ་བཅར་བ་ཚོར་བཀའ་སྩལ་མཛད་འདུག
- ༸རྒྱལ་བའི་ཡང་སྲིད་དང་། རྒྱ་ནག་དམར་ཤོག་གཞུང་གི་ངན་བྱུས།
- ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་དང་། ཡུ་གུར། འབར་མའི་སྐད་ཡིག་སྡེ་ཚན་གྱི་ལས་དོན་མཚམས་འཇོག་བྱེད་རྒྱུའི་གསལ་བསྒྲགས།
- ཡུ་རོབ་གྲོས་ཚོགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་ཡང་སྲིད་ངོས་འཛིན་གནང་སྒོར་རྒྱ་ནག་གཞུང་གིས་ཐེ་གཏོགས་བྱེད་པར་སྐྱོན་བརྗོད་ཀྱི་གྲོས་ཆོད་ཚད་མཐོའི་མང་མོས་ཐོག་གཏན་འབེབས་གནང་འདུག
- རྒྱ་གར་གྱིས་པ་ཀིསྟན་ནང་གི་དྲག་སྤྱོད་པའི་ས་ཚིགས་ལ་རྒོལ་རྡུང་བཏང་བར་རྒྱ་ནག་གིས་བློ་འགྱོད་ཡོད་སྐོར་བརྗོད་འདུག
བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
- ༸གོང་ས་༸སྐྱབས་མགོན་ཆེན་པོ་མཆོག་གིས་ཡེ་ཤུའི་བླ་ཆེན་པོབ་ལེའུ་བཅུ་བཞི་པ་མཆོག་ལ་འཚམས་འདྲི་མཛད་འདུག
- རྒྱ་ནག་གཞུང་གིས་ལོ་དགུའི་རིང་ཆུ་དང་གློག་གི་མཐུན་རྐྱེན་བཅད་པར་ཞུ་གཏུགས་བྱེད་མཁན་སྐལ་བཟང་ལགས་བཙོན་འཇུག་བྱས་འདུག
- ཧོང་ཀོང་དུ་སངས་རྒྱས་ཀྱི་རིང་བསྲེལ་རིན་བསྡུར་ལམ་ནས་ཚོང་སྒྱུར་བྱ་འཆར་ལ་རྒྱ་གར་གཞུང་གིས་དགག་བྱ་བྱས་རྐྱེན་རིན་བསྡུར་ཚོང་སྒྱུར་ཕྱི་བཤོལ་བྱས་འདུག
- ༸གོང་ས་༸སྐྱབས་མགོན་ཆེན་པོ་མཆོག་གིས་བསྟན་འགྲོ་སྤྱིའི་དོན་དུ་མཛད་འཕྲིན་མུ་མཐུད་བསྐྱང་རྒྱུའི་བཀའ་བཞེས་ཕེབས་སོང་།
- ༸གོང་ས་༸སྐྱབས་མགོན་ཆེན་པོ་མཆོག་གིས་ཇོ་ནང་རྒྱལ་ཚབ་རིན་པོ་ཆེ་དང་། ཤར་སྤྲུལ་རིན་པོ་ཆེ། དགེ་བཤེས་ལྷུན་གྲུབ་བཟོད་པ་རིན་པོ་ཆེའི་ཡང་སྲིད་གཙོས་པའི་ཕྱི་ནང་གི་དད་ལྡན་པར་མཇལ་ཁ་སྩལ་བ།