༸གོང་ས་མཆོག་གིས་ལ་དྭཌ་ལ་ཆོས་འབྲེལ་དབུ་བཙུཌ་གནང་བ།

༄༅༎སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་སླེ་ཁུལ་ཆོས་འབྲེལ་དབུ་བཙུགས་གནང་ཡོད་པའི་གནས་ཚུལ་ཐོན་འདུག

དེ་ཡང་མཛད་འཆར་གཞིར་བཟུང་བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་བྱང་ཕྱོགས་ལ་དྭགས་ཁུལ་ཆིབས་བསྒྱུར་གྱིས་ཐོག་མར་ཟང་དཀར་ཁུལ་ཆོས་འབྲེལ་བསྐྱངས་གནང་ཡོད་པ་དང་དེ་ནས་བདུན་ཕྲག་སྔོན་མའི་རེས་གཟའ་སྤེན་པའི་ཉིན་ནས་བཟུང་སླེ་ཁུལ་ཆོས་འབྲེལ་གནང་རྒྱུ་དབུ་བཙུགས་གནང་ཡོད་འདུག

༸གོང་ས་མཆོག་གིས་དེང་སང་གི་དུས་ཚོད་ཉག་ཕྲ་བའི་སྐབས་འདིར་གཙོ་བོ་ནང་སེམས་ཀྱི་བཅོས་བསྒྱུར་གཏོང་ཐུབ་པ་དང་བྱང་ཆུབ་ཀྱི་སེམས་བསྐྱེས་ཐུབ་པ་གཞན་ཕན་གྱི་བསམ་བློ་འཁྱེར་ཐུབ་པ་བྱུང་བ་ཡིན་ན་རང་ཉིད་ལ་བདེ་སྐྱིད་བྱུང་བ་ཙམ་མ་ཡིན་པ་འཛམ་གླིང་ཀུན་ལ་བདེ་སྐྱིད་དང་ཞི་བདེ་སྐྲུན་ཐུབ་པ་ཞིག་ཡོང་གི་རེད་ཅེས་བཀའ་གནང་ནས་གསུང་ཆོས་བཀྲིན་བསྩལ་གནང་ཡོད་འདུག

༸གོང་ས་མཆོག་གི་གསུང་ཆོས་ཞུ་བར་བཅར་མཁན་ས་གནས་ཡུལ་མི་དང་བོད་མི་ཙམ་མ་ཡིན་པར་ཕྱི་རྒྱལ་ཡུལ་སྐོར་སྤྲོ་འཆམ་ཡོང་མཁན་མང་པོ་ཞིག་ཀྱང་བཅར་ཡོད་འདུག་ལ་༸གོང་ས་མཆོག་ལ་དྭགས་ཁུལ་ཞབས་བཅགས་པ་ཙམ་གྱི་ཚོར་སྣང་མི་འདྲ་བ་ཞིག་ཡོང་གི་འདུག་ཅེས་ལ་དྭགས་ཀྱི་དགེ་འདུན་པ་སྐུ་ཞབས་ཚེ་དབང་རིག་འཛིན་གྱིས་འགྲེལ་བརྗོད་བྱས་འདུག ཁོང་གིས་༸གོང་ས་ཏཱ་ལའི་བླ་མ་མཆོག་གིས་གསུང་ཆོས་གནང་བའི་སྐབས་མང་ཚོགས་ལ་གོ་སླ་བ་དང་སེམས་ནང་འཇུག་བདེ་བ་སོགས་ཡོང་གི་འདུག་ལ་ཁོང་འདིར་ཞབས་སོར་འཁོད་གནང་བ་ཙམ་གྱིས་ང་ཚོ་སྐལ་བ་བཟང་པོ་ཡིན་བསམ་གྱི་འདུག་ལ་སྦྱིན་རླབས་ཆེ་རུ་འགྲོ་གི་ཡོད་རེད་ཅེས་གསར་འགྱུར་བཀོད་མཁན་ལ་དགའ་ཚོར་ཆེན་པོའི་ཐོག་ནས་འགྲེལ་བརྗོད་བྱས་འདུག

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེར་ཟླ་བ་འདིའི་ཟླ་མཇུག་བར་བཞུགས་རྒྱུའི་མཛད་འཆར་ཡོད་པ་རེད༎