༸གོང་ས་མཆོག་ནས་གྲོང་ཁྱེར་མུམ་སྦའེ་ནང་ནང་ཆོས་ངོ་སྤྲོད།

༄༅༎མུམ་སྦཡེ་བི་ཧར་ཐེབས་རྩ་ཁང་ཟེར་བ་རྒྱ་གར་གྱི་ཚོགས་པ་དེས་ཇི་ལྟར་གསོལ་འདེབས་ཞུས་དོན་ལྟར་ བོད་ཀྱི་བླ་ན་མེད་པའི་དབུ་འཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་དེ་རིང་ཕྱི་ཟླ་༢པའི་ཚེས་༡༩ཉིན་རྒྱ་གར་གྱི་དཔལ་འབྱོར་ལྟེ་གནས་ཀྱི་གྲོང་ཁྱེར་ མུམ་སྦཡེ་རུ་ཡོད་པའི་མཧ་རཤཏྲ་ཀམ་གར་རྩེད་ཐང་དུ་དད་ལྡན་མང་ཚོགས་ལ་ནང་ཆོས་ངོ་སྤྲོད་དང་འབྲེལ་བའི་ཆོས་འབྲེལ་གསུང་ཆོས་ཞིག་སྩལ་གནང་མཛད་ཡོད་པ་རེད།

སྐབས་དེར་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་མགོན་པོ་གང་ཉིད་ནི་རྒྱ་གར་གྱི་འཚེ་མེད་ཞི་བའི་རིག་གཞུང་གི་ཕོ་ཉ་ལྟ་བུ་ཞིག་ཏུ་ངོས་འཛིན་གནང་གི་ཡོད་པ་བཀའ་གནང་ཞིང་། ༧གོང་ས་༧སྐྱབས་མགོན་ཆེན་པོ་མཆོག་ནས་རྒྱ་གར་གྱིས་འཚེ་མེད་ཞི་བའི་ལྟ་གྲུབ་དེ་གཞན་ལ་ཤེས་བྱའི་ངང་ཚུལ་ཙམ་གྱི་ཐོག་ནས་ཁྱབ་སྤེལ་བྱེད་པ་ཞིག་མིན་པར་ལག་ལེན་ངོ་ཐོག་དུ་བསྐྱེལ་བཞིན་ཡོད་པ་བཀའ་གནང་འདུག།

༧གོང་ས་༧སྐྱབས་མགོན་ཆེན་པོ་མཆོག་ནས་ཕྱི་དངོས་པོ་དང་འཕྲུལ་ལས་ཡར་རྒྱས་ཆེན་པོ་འགྲོ་བཞིན་པའི་དུས་རབས་ཉི་ཤུ་རྩ་གཅིག་པ་འདིའི་ནང་ཕྱི་དངོས་པ་ཁོ་ནའི་ཐོག་ནས་ནང་སེམས་ཀྱི་ཞི་བདེ་དང་མཐུན་ལམ་སོགས་འབྱུང་ཐུབ་རྒྱུ་མིན་པ་དང་ ནང་སེམས་ཀྱི་ཞི་བདེ་འབྱུང་ཐབས་སྐོར་འཛམ་གླིང་གི་ཆོས་ལུགས་ཆེ་ཁག་ཚང་མས་ཐབས་ལམ་གྱི་ཆོས་འཁོར་སྣ་ཚོགས་ཞིག་སྟོན་ཡོད་པ་བཀའ་གནང་པར་མ་ཟད་ རྒྱ་གར་ནི་འཛམ་གླིང་ནང་གི་ཆོས་ལུགས་ཆེ་ཁག་ཚང་མའི་རྗེས་མཇུག་པ་མཉམ་གནས་དང་ རང་རང་སོ་སོའི་ཆོས་ལུགས་དར་སྤེལ་མུ་འཐུད་བྱེད་བཞིན་པའི་འཛམ་གླིང་གི་ཡུལ་གྲུ་གཅིག་པུ་དེ་ཡིན་པ་དང་ མུམ་སྦཡེ་གྲོང་ཁྱེར་ནི་འདིའི་དཔེ་མཚོན་བཟང་ཤོས་ཞིག་རེད་ཅེས་བཀའ་གནང་འདུག།