༸གོང་ས་མཆོག་གི་ཕེ་རན་སིའི་མཛད་འཆར་སྐོར།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བདུན་ཕྲག་འདིའི་རེས་གཟའ་ཟླ་བའི་ཉིན་ཕེ་རན་སིའི་ནང་ཆིབས་བསྒྱུར་བསྐྱང་གནང་སྟེ་དེ་རིང་རེས་གཟའ་ལྷག་པའི་སྔ་དྲོ་ཚོུད་བཅུ་པའི་ཐོག་ཕེ་རན་སིའི་གྲོས་ཚོགས་ཀྱི་འཐུས་མི་སུམ་ཅུ་ནས་བཞི་བཅུའི་དབར་མཇལ་འཕྲད་གནང་གི་ཡོད་པ་ལས་ད་རེས་ཕེ་རན་སིའི་སྲིད་འཛིན་སར་ཀོ་ཛི་མཆོག་དང་མཇལ་འཕྲད་གནང་འཆར་མེད་པ་རེད་

དེ་ག་ནང་བཞིན་༸གོང་ས་༸སྐྱབས་མགོན་ཆེན་པོ་མཆོག་ཐེངས་འདིའི་ཕེ་རན་སིའི་ནང་ཆིབས་བསྒྱུར་བསྐྱང་གནང་བའི་སྐབས་གཞུང་འབྲེལ་་གྱི་དཔོན་རིགས་གཞན་ཁག་དང་མཇལ་འཕྲད་གནང་རྒྱུའི་འཆར་གཞི་མེད་རུང་ ལོ་ཌེ་ལྦི་ཞེས་པའི་ཕེ་རན་སིའི་ལྷོ་ངོས་སུ་ཆགས་པའི་དགོན་པ་དེ་བདུན་ཕྲག་རྗེས་མའི་རེས་གཟའ་པ་སངས་ཉིན་དབུ་འབྱེད་མཛད་སྒོ་གནང་རྒྱུའི་ཐོག་ཕེ་རན་སིའི་སྲིད་འཛིན་གྱི་ལྕམ་ ཁའར་ལ་སྦུརུ་ནི་ སར་ཀོ་ཛི་ མཆོག་མཉམ་ཞུགས་གནང་གི་ཡོད་པ་རེད་

ད་རེས་༸གོང་ས་༸སྐྱབས་མགོན་ཆེན་པོ་མཆོག་བདུན་ཕྲག་འདིའི་རེས་གཟའ་ཟླ་བའི་ཉིན་ཕེ་རན་སིའི་ནང་ཆིབས་བསྒྱུར་བསྐྱང་གནང་སྟེ་ཕྱི་ཚེས་༢༣ བར་ཡུལ་དེའི་ནང་ཞུགས་གདན་འཇགས་རྒྱུའི་རིང་ཕེ་རན་སི་བྱང་ནུབ་ས་ཁུལ་ནོར་མེན་ཌི་དང་སྦིརིཏ་ནི་ཞེས་པའི་ས་ཁུལ་དེ་གཉིས་ནང་ཆིབས་བསྒྱུར་བསྐྱང་གནང་རྒྱུ་དང་དེ་བཞིན་ཕེ་རན་སིའི་ནུབ་ཀྱི་གྲོང་ཁྱེར་ནེན་ཊེསི་ཞེས་པའི་ནང་༸གོང་ས་མཆོག་ནས་ཉིན་དྲུག་རིང་གསུང་ཆོས་བཀྲིན་བསྐྱང་གནང་རྒྱུ་ཡིན་པ་རེད་ ༸གོང་ས་༸སྐྱབས་མགོན་ཆེན་པོ་མཆོག་དང་ཕེ་རན་སིའི་སྲིད་འཛིན་དབར་ཐེངས་འདིར་མཇལ་འཕྲད་གནང་འཆར་མེད་ཀྱང་འདི་ལོ་ཕྱི་ཟླ་བཅུ་གཉིས་པའི་ཚེས་བཅུ་ཉིན་ཕེ་རན་སིའི་སྲིད་འཛིན་སར་ཀོ་ཛི་མཆོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཙོས་པའི་ནོ་བེལ་ཞི་བདེའི་གཟེངས་རྟགས་བཞེས་མཁན་ཚང་མ་དང་ཕེ་རན་སིའི་རྒྱལ་ས་པེ་རིསི་ནང་མཇལ་འཕྲད་གནང་རྒྱུ་ཡིན་པ་རེད་ཅེས་ཕེ་རན་སིའི་གྲོས་ཚོགས་ཀྱི་འབྲེལ་ཡོད་ལས་དོན་དྲུང་ཆེ་ཞིག་གིས་དེ་རིང་རེས་གཟའ་ལྷག་པའི་ཉིན་གསལ་བསྒྲགས་གནང་འདུག