༸གོང་ས་མཆོག་ནས་འགྲེམས་སྟོན་དབུ་འབྱེད།

༄༅༎བོད་ཀྱི་བླ་ན་མེད་པའི་དབུ་ཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཀངྒ་ར་རྒྱལ་པོ་མ་ཧ་རཇ་སན་སར་ཆནད་ཞེས་པའི་འགྲེམས་སྟོན་དབུ་འབྱེད་བཀྲིན་ཆེ་གནང་མཛད་འདུག།

མཛད་སྒོའི་ཐོག་མར་༧གོང་ས་༧སྐྱབས་མགོན་ཆེན་པོ་མཆོག་གིས་ཤིང་སྣ་འདེབས་འཛུགས་དང་འབྲེལ་འགྲེམས་སྟོན་ཁང་དུ་ཆིབས་བསྒྱུར་མ་བསྐྱང་སྔོན་རྒྱ་གར་གྱི་ཡུལ་སྲོལ་གོམས་གཤིས་ལྟར་ཀངྒ་རྒྱལ་པོའི་སྲས་ཏི་ཀ་རཇ་ཨིཤ་ལྦར་ཡ་ཀ་ཏོཆ་དང་ཁོང་གི་ཡབ་ཡུམ།རྒྱ་གར་གྲོས་ཚོགས་འོག་མའི་འཐུས་མི་ལྕམ་ཅན་རྡེརེཤ་ཀུ་མ་རི་སོགས་ཀྱིས་མགོན་པོ་གང་ཉིད་མཆོག་ལ་ཕེབས་བསུ་ཞུས་གནང་རྗེས།

༧གོང་ས་མཆོག་གིས་འགྲེམས་སྟོན་ཁང་དུ་ཐུགས་ཞིབ་མཛད་པ་དང༌། ཐུགས་ཞིབ་གྲུབ་བསྟུན་འགྲེམས་སྟོན་ཁང་གི་ཡང་སྟེང་དུ་སྐུ་མགྲོན་རྣམ་པ་དང༌། གསར་འགོད་པ་འདུས་པའི་དབུས་སུ་རྒྱལ་སྲས་ཏི་ཀ་རཇ་ཡིས་༸གོང་ས་མཆོག་དང་སྐུ་མགྲོན་རྣམ་པར་ཕེབས་བསུའི་གསུང་བཤད་གནང་འདུག།

མཛད་སྒོའི་ཐོག་ཕེབས་པའི་བཙན་བྱོལ་བོད་གཞུང་གི་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་གིས་གསུངས་བཤད་གནང་བ་དང༌། དེ་རྗེས་༧གོང་ས་༧སྐྱབས་མགོན་ཆེན་པོ་མཆོག་ནས་མཛད་སྒོ་དང་འབྲེལ་བའི་བཀའ་སློབ་སྩལ་དོན་ལ། ༧གོང་ས་མཆོག་ཁུལ་དེར་ཆིབས་བསྒྱུར་གནང་ནས་མི་ལོ་༥༠བརྒལ་ཡོད་བའི་ནང༌། ཀངྒ་རའི་ལོ་རྒྱུས་ཞིབ་ཕྲ་ད་བར་མ་མཁྱེན་པ་མང་པོ་ཞིག་ད་རེས་ཀྱི་འགྲེམས་སྟོན་དེ་ནས་མཁྱེན་རྟོག་ཐུབ་པ་བྱུང་ཡོད་སྐོར་བཀའ་གནང་སྟེ། འདས་པའི་སྐབས་སུ་རྒྱལ་པོའི་མངའ་དབང་དར་བའི་ལོ་རྒྱུས་ནང་དམག་འཁྲུག་བྱུང་བའི་དུས་ཚོད་ཡོལ་ཟིན་པ་དང༌། ད་ལྟའི་འཆར་ཚང་མས་མཐུན་སྒྲིལ་ལྡན་པའི་འཛམ་གླིང་ཞིག་སྐྲུན་ཐབས་བྱ་དགོས་པའི་བཀའ་སློབ་གནང་བའི་མཐར། ཀངྒ་རའི་རྒྱལ་སྲས་མཆོག་གིས་༧གོང་ས་མཆོག་ལ་ ཀངྒ་རའི་སྙན་གྲགས་ཅན་གྱི་སྒྱུ་རྩལ་བ་ཞིག་གིས་བྲིས་པའི་པར་རིས་ཤིག་ཕྱག་རྟགས་སུ་འབུལ་ལམ་ཞུས་འདུག།