༸གོང་ས་མཆོག་དང་ཅེཀ་རྒྱལ་ཁབ་ཀྱི་སྲིད་བློན་མཇལ་འཕྲད།

༄༅༎བོད་མིའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་དྲོ་ཅེཀ་སྤྱི་མཐུན་རྒྱལ་ཁབ་ཀྱི་སྲིད་བློན་མིའི་རེཀ་ཀྲོ་པོ་ལ་ནེཀ་མཆོག་དང་ལྷན་དུ་སྲིད་བློན་མཆོག་གི་ཕོ་བྲང་ནང་མཇལ་འཛོམས་གནང་ཐོག་དུས་ཡུན་ཕྱག་ཚོད་གཅིག་ཙམ་རིང་ཕན་ཚུན་བཀའ་མོལ་གནང་ཡོད་པ་རེད།

དབུ་ཁྲིད་རྣམ་གཉིས་དབར་གནད་དོན་སྣ་ཚོགས་ཐོག་བཀའ་མོལ་གནང་བའི་ཁོངས་སུ་ད་ལྟའི་བོད་ནང་གི་གནས་སྟངས་ཐད་༸གོང་ས་མཆོག་གིས་ཞིབ་ཕྲའི་གནས་ཚུལ་ངོ་སྤྲོད་གནང་ཡོད་པ་རེད། ཅེཀ་སྤྱི་མཐུན་གྱི་སྲིད་བློན་མཆོག་དང་ལྷན་མཇལ་མ་གནང་གོང་དེར་༸གོང་ས་མཆོག་གིས་ཡུལ་དེའི་མི་མང་སུམ་སྟོང་བརྒལ་བར་བྱམས་བརྩེ་ནི་བདེ་སྐྱིད་ཀྱི་གཞི་རྩ་ཞེས་པའི་གླེང་གཞིའི་ཐོག་ལ་བཀའ་སློབ་སྩལ་གནང་མཛད་ཡོད་པ་རེད། བཀའ་སློབ་ཀྱི་སྙིང་དོན་དུ་བྱམས་བརྩེ་དང་སེམས་ཆུང་འདོད་ཕྱོགས་དང་བྲལ་བའི་གཞན་ཕན་གྱི་ཀུན་སློང་བཟང་པོ་སོ་སོའི་རང་རྒྱུད་ལ་འཇགས་པ་བྱ་རྒྱུ་ནི་ནང་སེམས་ཀྱི་བདེ་སྐྱིད་འབྱུང་སའི་ཐབས་ལམ་གལ་ཆེ་ཅན་ཞིག་རེད་ཅེས་དང་གཞན་ཕན་དང་བྱམས་བརྩེའི་ཀུན་སློང་གིས་འཛམ་གླིང་གི་གནམ་གཤིས་འགྱུར་ལྡོག་ཐེ་བས་འཛམ་གླིང་ནང་གི་དཀའ་རྙོགས་སྣ་ཚོགས་སེལ་ཐབས་ལའང་ལས་འགན་ཆེན་པོ་གྲུབ་ཐུབ་ཀྱི་རེད་ཅེས་དེར་འདུས་པའི་མི་མང་ཚོར་༸གོང་ས་མཆོག་གིས་བཀའ་སྩལ་ཡོད་པ་རེད། འཛམ་གླིང་གི་ཁྱོན་ལ་སྙན་གྲགས་ལྡན་པའི་སུད་སིའི་དཔར་པ་མིའི་ཤེལ་ཁོམ་ཀྲི་ཡིས་དེ་རིང་༸གོང་ས་མཆོག་མཇལ་འཕྲད་ཞུས་པ་དང་བཞུགས་སྒར་རྡ་རམ་ས་ལར་རྟེན་གཞི་བྱས་པའི་བོད་གཞུང་སྨན་རྩིས་ཁང་གི་སྐར་དཔྱད་རྩིས་རིག་སྡེ་ཚན་གྱིས་རྡ་རམ་ས་ལའི་ཉེ་འཁྲིས་སུ་གསོ་རིག་དང་རྩིས་རིག་སློབ་གཉེར་ཁང་ཞིག་གསར་འཛུགས་བྱ་རྒྱུའི་ལས་འཆར་ལ་ཁོང་གི་ངོས་ནས་མཐུན་འགྱུར་རོགས་རམ་ཇི་འདྲ་ཞུ་ཐུབ་ཐབས་སྐོར་སྙན་སེང་ཞུས་ཡོད་པ་རེད། སྐབས་དེར་ཧང་ག་རི་དང་ཨོ་སི་ཏྲི་ཡ་སོགས་ནང་གནས་བཞིན་པའི་བོད་མི་ཚོ་དང་རྒྱལ་ཁབ་དེ་དག་ནང་གི་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་གིས་༸གོང་ས་མཆོག་མཇལ་འཕྲད་ཞུས་ཡོད་པ་དང་བོད་དོན་རྒྱབ་སྐྱོར་བ་ཚོས་བོད་ཀྱི་རྩ་དོན་ལ་ཕན་པའི་རྒྱབ་སྐྱོར་གནང་བར་༸གོང་ས་མཆོག་གིས་ཐུགས་རྗེ་ཆེ་ཞེས་གསུང་ཡོད་པ་རེད།