༸གོང་ས་མཆོག་ནས་ཉི་ཧོང་ལ་ཐུགས་གསོའི་འཚམས་འཕྲིན།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ད་རེས་ཉི་ཧོང་ནང་ས་ཡོམ་གྱི་གནོད་འཚེ་ཚབས་ཆེ་ཕོག་པར་ཉི་ཧོང་གི་སྲིད་བློན་ན་ཨོ་ཏོ་ཀན་གྱི་མཚན་ཐོག་དུ་ཐུགས་གསོའི་འཚམས་འཕྲིན་ཞིག་གནང་ཡོད་པ་རེད། དེའི་ནང་ཁ་ས་ཉི་ཧོང་ནང་ས་ཡོམ་གྱི་གནོད་འཚེ་ཚབས་ཆེ་ཕོག་པའི་གནས་ཚུལ་གསན་དུས་ཧང་སང་གནང་བ་དང་འབྲེལ་ཐུགས་ཧ་ཅང་གི་སྐྱོ་པོ་བྱུང་གནང་བ་བཀའ་གནང་ཡོད་ཅིང་ ༧གོང་ས་མཆོག་ནས་ས་ཡོམ་གྱི་གནོད་འཚེའི་འོག་རྐྱེན་འདས་སུ་ཕྱིན་པ་རྣམས་ལ་ཐུགས་སྨོན་སྐྱབས་མཇུག་གནང་རྒྱུ་མ་ཟད་ས་ཡོམ་གྱི་གནོད་ཚེའི་འོག་རྐྱེན་འདས་སུ་ཕྱིན་པ་ཚོའི་ནང་མི་སྤུན་ཆེད་དང་དེ་མིན་ས་ཡོམ་གྱི་གནོད་ཚེ་ཕོག་མི་ཚོར་ཐུགས་གསོའི་འཚམས་འདྲི་ཡང་གནང་ཡོད་འདུག ༧གོང་ས་༧སྐྱབས་མགོན་ཆེན་པོ་མཆོག་གིས་སྩལ་གནང་བའི་ཐུགས་གསོའི་འཚམས་འཕྲིན་དེའི་ནང་  ཉི་ཧོང་གཞུང་གིས་ས་ཡོམ་གྱི་གནོད་འཚེ་ཚབས་ཆེ་ཕོག་པའི་འོག་སྲོག་སྐྱོབས་ལས་དོན་ཧ་ཅང་ཚབས་ཚུབ་ཡོད་པར་བསྔགས་བརྗོད་ཡང་གནང་ཡོད་འདུག།