༸གོང་ས་མཆོག་གིས་ཞི་བདེ་བསྐྲུན་ཐབས་ཐོག་བཀའ་སློབ།

༄༅༎སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ནང་ཞི་བདེ་བསྐྲུན་ཐབས་དང་རྡུལ་ཕྲན་གོ་མཚོན་གྱི་དཀའ་རྙོག་སེལ་ཐབས་ཆེད་གླིང་གི་དབུ་ཁྲིད་རྣམ་པས་ཕན་ཚུན་བྱམས་བརྩེའི་འདུ་ཤེས་ཀྱི་ཐོག་བཀའ་མོལ་གནང་རྒྱུ་ལས་ཐབས་ཤེས་གཞན་མེད་ལུགས་བཀའ་བསྩལ་གནང་འདུག

འདི་ཚེས་ཉི་ཤུ་དྲུག་རེས་གཟའ་ཉི་མའི་ཉིན་ནུབ་ཕྱོགས་ཨ་རིའི་གྲོང་ཁྱེར་སྦར་ཀེལི་ནང་ས་གནས་ཀྱི་གཙུག་ལག་སློབ་གྲྭ་ཆེན་མོར་སློབ་ཕྲུག་གཙོས་པའི་ཕྱི་ནང་དད་ལྡན་ཕྱི་མི་མང་བདུན་སྟོང་ཙམ་འདུ་འཛོམས་ཐོག་༸གོང་ས་མཆོག་གིས་ང་ཚོས་གཞན་གྱི་ཁེ་ཕན་ལ་བསམ་ཤེས་དང་བརྩི་བཀུར་གྱི་ཐོག་ནས་ཕན་ཚུན་གྱི་འབྲེལ་ལམ་གོང་འཕེལ་བྱེད་དགོས་ལུགས་གསུང་བཤད་གནང་འདུག

༸གོང་ས་མཆོག་གིས་ལོ་བཞི་བཅུའི་གོང་ཨ་རིའི་ནང་སྨྲ་བརྗོད་རང་དབང་གི་ལས་འགུལ་དབུ་འཛུགས་གནང་ཡུལ་སྦར་ཀེལི་གཙུག་ལག་སློབ་གྲྭ་ཆེན་མོའི་ཚོགས་ཁང་དེ་འདེམས་གནང་གིས་ད་ལྟའི་ཨ་རིའི་སྲིད་འཛིན་སྦ་རག་ཨོ་སྦ་མ་མཆོག་གིས་འཛམ་གླིང་ནང་ཆེས་མི་དགའ་བའི་དཔོན་རིགས་གཙོས་པའི་རྒྱལ་ཁབ་དང་དབུ་ཁྲིད་ཕན་ཚུན་འབྲེལ་ལམ་གནང་རྒྱུའི་གཞི་རིམ་གྱི་ལྟ་བ་འཛིན་པར་བསྔགས་བརྗོད་གནང་འདུག ༸གོང་ས་མཆོག་གཙུག་ལག་སློབ་གྲྭ་འདིར་ཕེབས་ཐེངས་གསུམ་པ་ཡིན་འདུག།