འགྲོ་བ་མིའི་ཐོབ་ཐང་འཐབ་རྩོད་མཁན་དབུ་ཁྲིད་ཀྱི་བྱ་དགའ།

༄༅༎ཨ་མི་རི་ཀའི་ནུབ་ཕྱོགས་མངའ་སྡེ་ལོ་སེ་ཨེན་ཇེ་ལེ་སི་ནང་ལ་རྟེན་གཞི་བྱས་པའི་ཤར་ཞི་བདེ་རྒྱ་མཚོའི་འགྲོ་བ་མིའི་ཐོབ་ཐང་ཐེབས་རྩ་ལྷན་ཚོགས་ཀྱིས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འགྲོ་བ་མིའི་ཐོབ་ཐང་འཐབ་རྩོད་གནང་མཁན་གྱི་དབུ་ཁྲིད་ཞུ་བའི་བྱ་དགའ་ཞིག་སྤྱི་ཟླ་༨པའི་ཚེས་༢ཉིན་ཕུལ་ཡོད་པ་རེད་

ཤར་ཞི་བདེ་རྒྱ་མཚོའི་འགྲོ་བ་མིའི་ཐོབ་ཐང་འཐབ་རྩོད་གནང་མཁན་གྱི་དབུ་ཁྲིད་ཞུ་བའི་བྱ་དགའ་དེ་བཞིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་རྒྱ་ནག་གི་མང་གཙོ་དོན་གཉེར་བ་གྲགས་ཅན་བ་ལྦེ་ཅེང་ཧྲིན་གཙོས་པའི་གྲགས་ཅན་མི་སྣ་ ༦ ལ་ཕུལ་ཡོད་པ་རེད། ཡིན་ནའང་བོད་མིའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བྱ་དགའ་བཞེས་པར་ཆིབས་བསྒྱུར་གནང་ཐུབ་མེད་ཀྱང་དཔལ་ལྡན་སྐུ་སྒེར་ཡིག་ཚང་ནས་ཨ་རིའི་གྲོང་ཁྱེར་ནིའུ་ཡོག་ཏུ་ཡོད་པའི་བཙན་བྱོལ་བོད་གཞུང་སྐུ་ཚབ་དོན་གཅོད་རྒྱུད་ལོ་སེ་ཨེན་ཇེ་ལེ་སི་ནང་ཡོད་པའི་དེ་སྔོན་བཙན་བྱོལ་བོད་གཞུང་གི་བདེ་སྲུང་གི་བཀའ་བློན་བཀའ་ཟུར་པད་མ་ཆོས་འབྱོར་ལགས་སུ་བྱ་དགའ་དེ་བཞེས་པར་ཕེབས་དགོས་པའི་བཀའ་ཕེབས་ཡོད་པ་ལྟར་བཀའ་ཟུར་པད་མ་ཆོས་འབྱོར་ལགས་དང་བྱང་ཨ་མི་རི་ཀའི་ཁུལ་གྱི་བོད་མི་དམངས་སྤྱི་འཐུས་བསྟན་འཛིན་ཆོས་ལྡན་ལགས་གཙོས་པའི་གནད་ཡོད་བོད་མི་ ༡༡ ཕེབས་ཡོད་པ་རེད། ད་རེས་བོད་མིའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕུལ་བའི་བྱ་དགའ་དེ་གལ་འགངས་ཆེན་པོ་ཇི་ཡིན་སྐོར་བདེ་སྲུང་བཀའ་ཟུར་པད་མ་ཆོས་འབྱོར་ལགས་ཀྱིས་ངོ་སྤྲོད་གནང་དོན་ལ། ད་རེས་ཀྱི་འགྲོ་བ་མིའི་ཐོབ་ཐང་འཐབ་རྩོད་ཀྱི་དབུ་ཁྲིད་ཞུ་བའི་བྱ་དགའ་ཕུལ་བའི་མཛད་སྒོ་དེའི་ཐོག་ཨ་རི་དང་ཡོ་རོབ། དེ་བཞིན་ཨེ་ཤི་ཡ་ཁུལ་བཅས་ནས་གནད་ཡོད་རྒྱ་མི་རིགས་ལྔ་བརྒྱ་ལྷག་ཙམ་ཞིག་མཉམ་ཞུགས་གནང་ཡོད་པ་དང༌། ད་རེས་ཀྱི་རྒྱ་མི་རིགས་ ༥༠༠ ལྷག་ཙམ་ཞིག་མཉམ་འཛོམས་ཐོག་༸གོང་ས་༸སྐྱབས་མགོན་ཆེན་པོ་མཆོག་ལ་བྱ་དགའ་ཕུལ་བ་དེ་ནི་༸གོང་ས་མཆོག་གི་དགོངས་གཞི་དབུ་མའི་ཐབས་ལམ་ལ་ངོས་འཛིན་དང་བོད་ཀྱི་བདེན་པའི་འཐབ་རྩོད་ལ་རྒྱ་ནག་མི་དམངས་མང་ཆེ་བའི་རྒྱབ་སྐྱོར་ཡོད་པའི་རྣམ་པར་ཞིག་མཚོན་གྱི་ཡོད་པ་མ་ཟད་ཉེ་ཆར་རྒྱ་ནག་གཞུང་གིས་༸གོང་ས་མཆོག་ལ་མཚན་དམས་ཞུས་པ་དང་བོད་མི་དང་རྒྱ་མི་རིགས་གཉིས་བར་ལ་འགལ་ཟླའི་གཏམ་བཤད་མང་པོ་སྤེལ་བ་དེར་ལན་འདེབས་ཞིག་ཡིན་པ་བོད་མི་ཚོས་ངོས་འཛིན་བྱེད་ཀྱི་ཡོད་པ་རེད།