རྒྱལ་སྤྱིའི་ཉེས་ཡངས་ཚོགས་པས་༸གོང་ས་མཆོག་ལ་ཆེ་བསྟོད།

༄༅༎སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ད་ལོའི་ཕྱི་ཟླ་ལྔ་པའི་ནང་ཨ་མི་རི་ཀའི་ཀེལིཕོརཎིཡའི་མངའ་སྡེའི་གྲོང་ཁྱེར་ལོང་སྦིཆ་ཁུལ་དུ་ཆིབས་སྒྱུར་གནང་སྐབས་རྒྱལ་སྤྱིའི་ཉེས་ཡངས་ཚོགས་པའི་ངོས་ནས་༸གོང་ས་མཆོག་ལ་Shine Light on Human Rights འམ་ འགྲོ་བ་མིའི་ཐོབ་ཐང་ཐོག་སྒྲོན་མེ་སྤར་བ་ཞེས་པའི་འགྲོ་བ་མིའི་ཐོབ་ཐང་གི་བྱ་དགའ་འབུལ་ལམ་ཞུ་རྒྱུ་ཐུགས་གཏན་འཁེལ་ཡོད་པ་རེད་

གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ད་ཕན་སྤྱི་ཚོགས་ཀྱི་བདེན་དོན་དང་འགྲོ་བ་མིའི་ཐོབ་ཐང་ཐོག་རླབས་ཆེན་གྱི་མཛད་འཕྲིན་བསྐྱངས་པ་ཁག་ལ་ཆེ་བསྟོད་ཞུ་བའི་ཆེད་དུ་རྒྱལ་སྤྱིའི་ཉེས་ཡངས་ཚོགས་པ་དབུ་བརྙེས་ནས་ད་ལོ་མི་ལོ་ལྔ་བཅུ་འཁོར་བའི་དུས་ཚིགས་དང་སྟབས་བསྟུན་ཏེ་ ཕྱི་ཟླ་༥ཚེས་༤ཉིན་གྱི་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་ལ་བྱ་དགའ་དེ་འབུལ་ལམ་ཞུ་རྒྱུ་ཡིན་འདུག ༸གོང་ས་མཆོག་ལ་གཟེངས་རྟགས་འབུལ་རྒྱུའི་མཛད་སྒོའི་ཐོག་རྒྱལ་སྤྱིའི་ཉེས་ཡངས་ཚོགས་པའི་ཨ་མི་རི་ཀའི་སྤྱི་ཁྱབ་ངེས་སྟོན་པ་སྐུ་ཞབས་ལན་རིན་ཁོབ་ཀྱིས་དགའ་བསུའི་གསུང་བཤད་གནང་རྒྱུ་དང་ དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་ལམ་སྟོན་བཀའ་སློབ་སྩལ་རྒྱུ་ཡིན་འདུག་ལ་ མཛད་སྒོ་དེ་དང་སྟབས་བསྟུན་འགྲོ་བ་མིའི་ཐོབ་ཐང་གི་ཚོགས་འདུ་ཞིག་ཀྱང་གོ་སྒྲིག་གནང་རྒྱུ་ཡིན་པ་རེད་ རྒྱལ་སྤྱིའི་ཉེས་ཡངས་ཚོགས་པ་དེ་བཞིན་དབྱིན་ཇིའི་རྒྱལ་ས་ལོན་ཌོན་ནང་༡༩༦༡ལོར་གསར་འཛུགས་གནང་བ་ཞིག་ཡིན་ནའང་ ཨ་མི་རི་ཀར་ཡང་ཚོགས་པའི་ཡན་ལག་ཡོད་པ་རེད་ ཚོགས་པ་དེའི་དམིགས་ཡུལ་གཙོ་བོ་རྒྱ་ནག་སོགས་འཛམ་གླིང་གི་རྒྱལ་ཁབ་ཁག་གིས་ཆབ་སྲིད་བཙོན་པ་རྣམས་ལ་ཉེས་པ་སྲོག་ཐོག་གཏོང་བའི་ཁྲིམས་དང་ སྲིད་བྱུས་མཚམས་འཇོག་དང་ ཆབ་སྲིད་བཙོན་པ་རྣམས་གློད་བཀྲོལ་ཐུབ་པའི་སླད་དུ་འགྲོ་བ་མིའི་ཐོབ་ཐང་དོན་དུ་གཉེར་མཁན་སྒྲིག་འཛུགས་ཤིག་ཡིན་པ་རེད།