༸གོང་ས་མཆོག་རིང་མིན་ཕེ་རན་སིར་ཆིབས་བསྒྱུར་གནང་འཆར།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རིང་མིན་ཕྱི་ཟླ་དྲུག་པའི་ཚེས་ཤར་མཚམས་སུ་ཕེ་རན་སིའི་པཱེ་རི་སི་ནང་ཆིབས་བསྒྱུར་བཀྲིན་བསྐྱང་གནང་རྒྱུ་ཡིན་པ་རེད།

རྒྱ་ནག་གཞུང་གིས་ཇི་ལྟར་གནོན་ཤུགས་སྤྲོད་མིན་ལ་མ་ལྟོས་པར་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཟླ་དྲུག་པའི་ཚེས་དྲུག་ནས་བདུན་བར་ཉིན་གཉིས་རིང་ཕེ་རན་སིའི་རྒྱལ་ས་པཱེ་རི་སི་ནང་ཆིབས་བསྒྱུར་བཀྲིན་བསྐྱང་གནང་རྒྱུ་ཡིན་ཞིང་སྐབས་དེ་དུས་དེ་སྔ་ཕྱི་ལོ་ཉིས་སྟོང་བརྒྱད་ལོའི་ནང་ཕེ་རན་སིའི་གྲོང་ཁྱེར་སྲིད་གཞུང་གིས་གཏན་འབེབས་གནང་བའི་ཁྲིམས་གཞི་ལྟར་༸གོང་ས་མཆོག་ལ་གྲོང་ཁྱེར་དེའི་མི་སེར་གྱི་མཚན་ཐོངས་ཕྱག་འཁྱེར་འབུལ་ལམ་ཞུ་རྒྱུ་དགྱེས་བཞེས་གནང་རྒྱུ་ཡིན་པ་རེད། དེ་སྔ་པེ་ཅིང་ཨོ་ལིམ་པིག་གི་དཔལ་འབར་པཱེ་རི་སི་ནང་བསྐྱོད་པའི་སྐབས་ཡུལ་དེའི་ནང་ངོ་རྒོལ་གྱི་ལས་འགུལ་ཤུགས་ཆེ་ཞིག་སྤེལ་བར་བརྟེན་རྒྱ་ནག་དང་ཕེ་རན་སི་ཡུལ་གྲུ་གཉིས་དབར་གྱི་འབྲེལ་བའི་ཐད་གནོད་འཚེ་བྱུང་ཡོད་པ་རེད། ཡིན་ནའང་རིམ་བཞིན་ཡུལ་གྲུ་གཉིས་དབར་འབྲེལ་ལམ་ཡར་རྒྱས་གཏོང་རྒྱུའི་ཆེད་དུ་ཕེ་རན་སིའི་སྲིད་འཛིན་སཱར་ཀོ་ཛི་མཆོག་གིས་ཕེ་རན་སིའི་གཞུང་འབྲེལ་གྱི་མཐོ་རིམ་དཔོན་རིགས་སོགས་པའི་སྐུ་ཚབ་ཚོགས་པ་ཁག་ཅིག་རྒྱ་ནག་ཏུ་འཚམས་འདྲིར་བཏང་གནང་སྟེ་ཡུལ་གྲུ་གཉིས་ཀྱི་འབྲེལ་ལམ་བསྐྱར་གསོ་བྱུང་ཡོད་པ་རེད། གནས་ཚུལ་ནང་མུ་མཐུད་བཀོད་དོན་ལྟར་ན་ཕེ་རན་སིའི་གྲོས་ཚོགས་ནང་ཡོད་པའི་བོད་དོན་རྒྱབ་སྐྱོར་ཚོགས་པས་བོད་ཀྱི་གནད་དོན་དེ་ནི་རྒྱ་ནག་ནང་སྲིད་ཀྱི་གནད་དོན་ཞིག་ཆགས་ཀྱི་མེད་པ་དང་བོད་མིའི་འཐབ་རྩོད་དེ་ནི་ཕེ་རན་སིའི་གཞུང་དང་མི་མང་གི་སྐུ་ཚབ་ཚོའི་ངོས་ནས་ཧ་ཅང་གི་གལ་འགངས་དང་རྣོ་ངར་ཆེན་པོ་ཞིག་ཆགས་ཀྱི་ཡོད་པ་རེད་ཅེས་གསུང་ཡོད་པ་རེད།