༸གོང་ས་མཆོག་ནས་ལི་ཧཡི་ཁུལ་གྱི་མཛད་འཕྲིན་ལེགས་གྲུབ།

༄༅༎བོད་མིའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཨ་རིའི་པེན་སིལ་ལྦེ་ནི་ཡའི་ལི་ཧཡི་ས་ཁུལ་དུ་ཉིན་དྲུག་རིང་གསུང་ཆོས་དང་བཀའ་སློབ་གསུང་བཤད་ཀྱི་མཛད་འཕྲིན་ལེགས་གྲུབ་ཟིན་ཡོད་པ་དང་ ༸གོང་ས་མཆོག་ནས་ཁུལ་དེའི་མང་ཚོགས་ལ་བླང་དོར་གྱི་བཀའ་སློབ་གསུང་བཤད་སྩལ་གནང་མཛད་པ་དེས་ཚོགས་བཅར་བ་ཡུལ་མི་ཚོ་ལ་སེམས་འགུལ་གྱི་བག་ཆགས་ཆེན་པོ་བྱུང་ཡོད་པའི་གནས་ཚུལ་བཀོད་འདུག་།།

ལི་ཧཡི་གཙུག་ལག་སློབ་གྲྭའི་གཙོ་འཛིན་ཨེ་ལིསི་གིསི་ཞུ་བས་ ༸གོང་ས་ཏཱ་ལའི་བླ་མ་མཆོག་གཙུག་ལག་སློབ་གྲྭ་དེའི་ནང་མཛད་འཕྲིན་སྐྱང་གནང་མཛད་སྐབས་ ཁོང་༸གོང་ས་མཆོག་དང་ཐད་ཀར་མཇལ་འཕྲད་ཞུ་རྒྱུའི་གོ་སྐབས་བཟང་པོ་བྱུང་ཞིང་ ༸གོང་ས་ཏཱ་ལའི་བླ་མ་མཆོག་ནི་འཛམ་གླིང་ནང་ཆེས་སྙན་གྲགས་དང་རླབས་ཆེན་གྱི་དབུ་འཁྲིད་ཅིག་ལ་ཡོངས་གྲགས་ངོས་འཛིན་ཡོད་ནའང་ ཁོང་ནི་སྐྱེ་བོ་ཕལ་བ་ནང་བཞིན་ཐུགས་སེམས་ཆུང་ལ་ ཞི་ཞིང་འདུལ་བ་ཞིག་འདུག་པ་དང་ ཁོང་ནི་ང་ཚོའི་གཙུག་ལག་སློབ་གྲྭ་དེའི་ནང་གྲགས་ཆེན་གྱི་སྐུ་མགྲོན་གཙོ་བོ་ཞིག་བྱུང་ཡོད་པའི་དགའ་སྤོབས་ཆེན་པོའི་ངང་འགྲེལ་བརྗོད་གནང་འདུག ཡང་མེ་ལི་ས་ཤེ་ཕར་ཞུ་བས་བེུད་ཡི་ཤུའི་ཆོས་དཔོན་ཞིག་གིས་ ༸གོང་ས་ཏཱ་ལའི་བླ་མ་མཆོག་ཁུལ་དེའི་ནང་ཆིབས་བསྒྱུར་གྱི་མཛད་འཕྲིན་ཐོག་ནས་ འཛམ་གླིང་གི་ཆོས་ལུགས་ཚང་མའི་ནང་བྱམས་དང་སྙིང་རྗེ་ལ་སོགས་པའི་རྩ་འཛིན་གཅིག་མཚུངས་ངོས་འཛིན་བྱེད་པའི་གོ་རྟོགས་གཏིང་ཟབ་ཀྱི་ཕན་རླབས་ཆེན་པོ་བྱུང་ཡོད་པ་དང་ ༸གོང་ས་མཆོག་གིས་ སྐྱེ་བོ་སུ་འདྲ་ཞིག་ཡིན་རུང་ དུས་དང་རྣམ་པ་ཀུན་ཏུ་སེམས་བཟང་བྱེད་དགོས་པའི་བཀའ་སློབ་ནི་ཚང་མའི་ཡིད་ལ་བཅངས་འོས་པའི་རླབས་ཆེན་གྱི་བཀའ་སློབ་དང་ལྷག་པར་དུ་དཀའ་ངལ་ག་འདྲ་ཞིག་དང་འཕྲད་རུང་ ཞི་འདུལ་གྱི་ལམ་ནས་གདོང་ལེན་བྱ་དགོས་པའི་ལམ་སྟོན་གསུང་བཤད་ནི་རླབས་ཆེན་གྱི་བཀའ་སློབ་ཁྱད་དུ་འཕགས་པ་ཞིག་བྱུང་བའི་མྱོང་ཚོར་འགྲེལ་བརྗོད་གནང་འདུག དེ་དང་དེ་བཞིན་ལི་ཧཡི་གཙུག་ལག་སློབ་གྲྭ་ཆེན་མོའི་ནང་སློབ་སྟོན་སྡེ་ཚན་གྱི་འགན་འཛིན་ ཨི་ཡེན་སྦར་ཀི་ ཞུ་བས་ ༸གོང་ས་མཆོག་གི་ཉིན་དྲུག་གི་མཛད་འཕྲིན་སྐབས་ ལོ་ངོ་༣༠༠༠ལྷག་གི་ལོ་རྒྱུས་ལྡན་པའི་ནང་ཆོས་ཀྱི་ལྟ་གྲུབ་དང་ནང་ཆོས་ཀྱི་སེམས་ཁམས་རིག་པའི་སྐོར་གསུང་བཤད་གནང་སྐབས་ ནུབ་ཕྱོགས་པའི་སེམས་ཁམས་རིག་པའི་ལྟ་གྲུབ་ལས་ནང་ཆོས་ཀྱི་སེམས་གཙོ་རིག་པ་གཏིང་ཟབ་ཆེ་བའི་ཚོར་སྣང་ཆེན་པོ་བྱུང་ཞེས་གསལ་སྟོན་གནང་འདུག་༎