ལྷ་ས་གྲོང་ཁྱེར་ནང་བཙོག་ཆུ་གཙང་སེལ་གྱི་ལས་དོན་སྤེལ་རྒྱུ།

༄༅༎དེ་རིང་བོད་ཀྱི་རྒྱལ་ས་ལྷ་ས་ནས་རྒྱ་ནག་གཞུང་འབྲེལ་ཤིང་ཧཱ་གསར་ཤོག་ཐོག་གནས་ཚུལ་སྤེལ་བའི་ནང་ལྷ་ས་གྲོང་ཁྱེར་ནང་དུ་ཐེངས་དང་པོ་བཙོག་ཆུ་གཙང་སེལ་གྱི་ལས་དོན་སྤེལ་རྒྱུ་ཡིན་པའི་སྐོར་གྲོང་ཁྱེར་འཛུགས་སྐྲུན་ལས་ཁང་གིས་བཤད་པ་ལུང་འདྲེན་བྱས་ཡོད་པ་རེད།

ཤིང་ཧཱ་གསར་ཤོག་དེའི་ཐོག་མུ་མཐུད་གནས་ཚུལ་སྤེལ་བའི་ནང་ལྷ་ས་གྲོང་ཁྱེར་གྱི་བཙོག་ཆུ་གཙང་སེལ་བྱེད་པའི་ལས་དོན་དེ་ནི་ཕྱི་ལོ་ཉིས་སྟོང་དྲུག་ནས་ཉིས་སྟོང་བཅུ་བར་གྱི་གྲོང་ཁྱེར་གྱི་འཛུགས་སྐྲུན་རྣམ་གྲངས་ནང་གི་གལ་ཆེའི་འཆར་གཞི་ཞིག་ཡིན་པ་དང་འཛུགས་སྐྲུན་གྱི་ལས་གཞི་དེར་རྒྱ་མིའི་སྒོར་མོ་ས་ཡ་བརྒྱ་དང་ཉི་ཤུ་རྩ་གཉིས་ཀྱི་འགྲོ་གྲོན་སྔོན་རྩིས་ཀྱི་འཆར་གཞི་ཡོད་པ་དང་དེ་རྣམས་རྒྱ་ནག་དབུས་གཞུང་གིས་རོགས་སྐྱོར་བྱས་པ་ཞིག་ཡིན་པ་དང་ཐོག་མའི་ལས་ཀའི་འཆར་གཞི་ནི་ཉིན་རེར་བཙོག་ཆུ་ཀྲོན་ཁྲི་ལྔ་ཕྱིར་འདོན་བྱའི་ལས་དོན་ནས་འགོ་འཛུགས་བྱ་རྒྱུ་ཡིན་ལུགས་ད་ལྟའི་བོད་ཀྱི་ལྷ་ས་གྲོང་ཁྱེར་ནང་གི་བཙོག་ཆུ་ཚང་མ་ཐད་ཀར་ལྷ་སའི་སྐྱིད་ཆུའི་ནང་རྒྱུགས་འགྲོ་བ་མ་ཟད་ལྷ་ས་གྲོང་ཁྱེར་ནང་ཉིན་རེ་བཞིན་མི་འབོར་འཕེལ་རྒྱས་དང་དཔལ་འབྱོར་འཕེལ་རྒྱས་འགྲོ་བར་བརྟེན་ནས་བཙོག་ཆུ་གཙང་སེལ་མ་བྱས་པ་ཡིན་ཚེ་ཁོར་ཡུག་ལ་གནོད་འཚེ་དང་ཉམས་ཆགས་འགྲོ་རྒྱུའི་ཉེན་ཁ་བཟོ་གི་ཡོད་པའི་སྐོར་བཀོད་ཡོད་པ་རེད༎