ཨོ་སི་ལོ་རང་དབང་གླེང་སྟེགས་ཞེས་པའི་ལྷན་ཚོགས་སྐོར།

༄༅༎རེས་གཟའ་ཟླ་བའི་ཕྱི་དྲོ་ནོར་ལྦེའི་རྒྱལ་ས་ཨོ་སི་ལོ་ནང་ཨོ་སི་ལོ་རང་དབང་གླེང་སྟེགས་ཞེས་པའི་འཛམ་གླིང་ནང་ཆབ་སྲིད་ཀྱིས་མནར་གཅོད་ཕོག་པའི་མི་དམངས་ཚོར་དྲན་གསོ་ཞུ་བའི་ལྷན་ཚོགས་དབུ་འབྱེད་མཛད་སྒོའི་དེ་དབྱིན་ཇིའི་རྒྱལ་སྲས་གཞོན་པའི་སྐུ་ཟླ་ཡིན་པ་འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན་ལྕམ་སེ་རའ་ཕཱར་གུ་སེན་གྱིས་གནང་བ་དང་དངོས་གཞིའི་ལྷན་ཚོགས་ཉིན་དང་པོ་དེ་དེ་རིང་རེས་གཟའ་མིག་དམར་ཉིན་ནས་འགོ་བཙུགས་གནང་ཡོད་པ་རེད།

ལྷན་ཚོགས་དེའི་ཐོག་ལ་བོད་ཀྱི་འགྲོ་བ་མིའི་ཐོབ་ཐང་གི་གནད་དོན་ཐོག་ལ་བཙན་བྱོལ་བོད་མིའི་ཁྲོད་ནས་རྒྱ་མིའི་བཙོན་ཁང་ནང་མི་ལོ་སུམ་ཅུ་སོ་གསུམ་ཞུགས་མྱོང་མཁན་སྐུ་ཞབས་དཔལ་ལྡན་རྒྱ་མཚོ་ལགས་དང་ནོར་ལྦེ་བོད་དོན་ཚོགས་པའི་ཚོགས་གཙོ་ཀུ་རིང་ཆུང་བདག་ལགས།དེ་བཞིན་དབྱིན་ཡུལ་ནང་བོད་ཀྱི་འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན་བདེ་ཆེན་སྤེན་པ་ལགས་བཅས་མཉམ་ཞུགས་གནང་སྟེ་བོད་དོན་གོ་རྟོགས་སྤེལ་རྒྱུའི་གོ་སྐབས་བཟང་པོ་ཞིག་ཡིན་པ་ངོས་འཛིན་གྱིས་གཏམ་བཤད་ཀྱང་གནང་བ་དང་ད་དུང་ལྕམ་སེ་རའ་ཕཱར་གུ་སེན་མཆོག་གིས་དེ་སྔོན་བཙན་བྱོལ་བོད་མིའི་ལྟེ་གནས་བཞུགས་སྒར་རྡ་རམ་ས་ལར་འཚམས་འདྲིར་ཕེབས་པ་དང་བོད་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་འཕྲད་ཞུས་པའི་མྱོང་ཚོར།ལྷག་པར་དུ་རྒྱ་མིའི་བཙོན་ཁང་དུ་མི་ལོ་སུམ་སུ་སོ་གསུམ་སྡུག་སྦྱོང་དང་མནར་གཅོད་མྱོང་མཁན་སྐུ་ཞབས་དཔལ་ལྡན་རྒྱ་མཚོ་ལགས་ནི་འཛམ་གླིང་མི་དམངས་ཚོས་འགྲོ་བ་མིའི་ཐོབ་ཐང་ཡར་རྒྱས་ཡོང་ཐབས་གདོང་ལེན་བྱ་རྒྱུའི་མིག་དཔེ་ལྟ་འོས་པའི་གལ་འགངས་ཆེ་བའི་དཔེ་མཚོན་གསལ་ཤོས་ཀྱི་མི་སྣ་ཞིག་ཡིན་པའི་སྐོར་གཏམ་བཤད་གནང་ཡོད་པ་རེད། ད་རེས་ཀྱི་ཨོ་སི་ལོ་རང་དབང་གི་གླེང་སྟེགས་ཞེས་པའི་ལྷན་ཚོགས་དེ་ནི་ཉིན་གསུམ་རིང་ཚོགས་ཏེ་རེས་གཟའ་ཕུར་བུའི་སྔ་དྲོ་མཇུག་སྒྲིལ་རྒྱུ་ཡིན་ཞིང་ལྷན་ཚོགས་དེ་ཨ་མི་རི་ཀའི་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་ཐེབས་རྩ་ཁང་གིས་གོ་སྒྲིག་གནང་སྟེ་ས་གནས་ནོར་ལྦེ་བོད་དོན་ཚོགས་པ་སོགས་གཞུང་འབྲེལ་མ་ཡིན་པའི་ཚོགས་པ་ཁག་ཅིག་གིས་རྒྱབ་སྐྱོར་གནང་བ་དང་ལྷན་ཚོགས་དེའི་ནང་རྒྱལ་ཁབ་ཁག་སུམ་ཅུ་ཐམ་པ་ནས་འཐུས་མི་མཉམ་ཞུགས་གནང་སྟེ་གལ་ཆེའི་མི་སྣ་ཁག་ཅིག་གིས་གསུང་བཤད་གནང་གི་ཡོད་པ་རེད།