བོད་ནང་གི་བོད་མི་ཚོས་ཕྱི་བསྐྱོད་ལག་འཁྱེར་བཟོ་རྒྱུར་རྒྱ་ནག་གཞུང་གིས་མུ་མཐུད་དུ་དམ་དྲག་བྱེད་བཞིན་ཡོད་འདུག

རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བ་དང་། མཚོ་སྔོན་ཞིང་ཆེན། སི་ཁྲོན་ཞིང་ཆེན། ཀན་སུའུ་ཞིང་ཆེན་སོགས་ཀྱི་མངའ་ཁོངས་སུ་ཡོད་པའི་བོད་རིགས་ས་ཁུལ་དུ། བར་ལམ་སྤྱི་ལོ་༢༠༡༩ལོ་ནས་རྒྱ་ནག་གཞུང་གིས་བོད་མི་ཚོའི་ཕྱི་བསྐྱོད་ལག་ཁྱེར་(Passports)་ཕྱིར་བསྡུ་བྱེད་མགོ་བརྩམས་ཡོད་པ་མ་ཟད། དོ་བདག་བོད་མི་ཕྱི་བསྐྱོད་ལག་ཁྱེར་ཡོད་པ་ཚོ་ཉེན་རྟོག་ལས་ཁུངས་དུ་འབོད་འགུགས་དང་འབྲེལ། ཕྱི་བསྐྱོད་ལག་ཁྱེར་ལེན་དགོས་པའི་རྒྱུ་མཚན་དང་། དེ་སྔ་ཕྱི་རྒྱལ་དུ་སོང་མྱོང་བ་ཡིན་ན་འགྲོ་དགོས་པའི་རྒྱུ་མཚན། བལ་ཡུལ་དུ་སོང་བ་རྣམས་རྒྱ་གར་ནང་བསྐྱོད་ཡོད་མེད་སོགས་ཚ་འདྲི་ནན་ཏན་བྱེད་བཞིན་པའི་ཁར། ཉེ་ཆར་བོད་ནང་གི་རྔ་བ་བོད་རིགས་རང་སྐྱོང་ཁུལ་གྱི་ཁོངས་གཏོགས་ནས་བོད་མི་མིང་བརྗོད་འདོད་མེད་པ་ཞིག་གིས། ཨེ་ཤེ་ཡ་རང་དབང་རླུང་འཕྲིན་ཁང་ལ་གནས་ཚུལ་ཁུངས་ལྡན་མཁོ་སྤྲོད་བྱས་པ་གཞིར་བཟུང་ན། སི་ཁྲོན་ཞིང་ཆེན་གྱི་མངའ་ཁོངས་སུ་བོད་མི་ཕྱིར་བསྐྱོད་ལག་ཁྱེར་ཞུ་མཁན་ཚོ། དེ་སྔ་ཐེ་ལཎ་ཌི་ལ་ཕྱིན་ཆོག་པའི་ཆོག་མཆན་ཙམ་ཞིག་རྒྱ་ནག་གི་འགྲིམ་འགྲུལ་ལས་ཁུངས་ཁག་བརྒྱུད་ནས་སྤྲོད་ཀྱི་ཡོད་ནའང་། དེ་ལའང་དོ་བདག་གི་སྤུན་ཉེ་རྒྱ་ནག་གཞུང་གི་ལས་བྱེད་པ་ཞིག་གིས་ཁག་ཐེག་མིང་རྟགས་བཀོད་དེ། ཕྱི་བསྐྱོད་ལག་ཁྱེར་ཞུ་མཁན་གྱི་མི་དེ་ཕྱི་རྒྱལ་གཞན་ལ་བྲོས་བྱོལ་མི་བྱེད་པ་དང་། རྒྱ་གར་དུ་བྲོས་མི་འགྲོ་བ་སོགས་ཁས་ལེན་བྱེད་དགོས་པ་མ་ཟད། ཐ་ན་ཐེ་ལཎ་ཌི་རུ་ཡང་རྒྱ་མི་སྣེ་ཤན་པ་ཚོའི་བཀོད་བྱུས་ཁོ་ནའི་འོག་འགྲོ་དགོས་པ་མ་གཏོགས། སོ་སོ་ཕར་ཚུར་འགྲོ་བསྐྱོད་ཀྱི་རང་དབང་སྤུ་ཙམ་ཡང་མེད་པ་དང་། དེང་སང་དེ་ལས་ཀྱང་དམ་དྲག་ཆེན་པོ་བྱས་ནས་བོད་མི་ཕྱི་བསྐྱོད་ལག་ཁྱེར་ཞུ་མཁན་ཚོར་ཆོག་མཆན་གཏན་ནས་མི་སྤྲད་པའི་ཁར། རྒྱ་རིགས་ཚོར་ཕྱི་བསྐྱོད་ལག་ཁྱེར་རག་རྒྱུར་དཀའ་ངལ་ཅུང་ཟད་ཀྱང་མེད་པར་ཐད་ཀར་ཞུས་ཆོག་མོད། ང་ཚོ་བོད་རིགས་ལ་ཆོག་མཆན་མི་སྤྲོད་དོན་ཅི་རེད་ཅེས་དྲི་བ་བཀོད་ཚེ། གལ་ཏེ་ཁྱེད་ཚོར་ལག་ཁྱེར་སྤྲད་ན་ཁ་བྲལ་གྱི་ལས་འགུལ་ནང་ཞུགས་ཉེན་ཡོད་པ་དང་། རྒྱ་གར་དུ་བྲོས་བྱོལ་གྱི་ཉེན་ཁ་ཡོད་པ་སོགས་ལན་འདེབས་བྱེད་ཀྱི་འདུག་ཅེས་འགྲེལ་བརྗོད་གནང་བྱུང་།
དེའི་ཐད་རྡ་རམ་ས་ལའི་བོད་གནས་ལྟ་ཞིབ་ཁང་གི་ཉམས་ཞིབ་པ་པདྨ་རྒྱལ་ལགས་ནས་ཀྱང་། རྒྱ་ནག་གུང་ཁྲན་ཏང་ལ་ཡིད་ཆེས་རྒྱབ་སྐྱོར་ཡོད་པའི་རིགས་དང་། ཡང་ན་ཕྱི་རྒྱལ་དུ་རྒྱ་ནག་གཞུང་གི་ཆབ་སྲིད་དྲིལ་བསྒྲགས་ཀྱི་ལག་ཆར་བེད་སྤྱོད་ཀྱིས། སློབ་ཕྲུག་དང་ཉམས་ཞིབ་པ་སོགས་བོད་མི་ཁ་ཤས་ཕྱི་རྒྱལ་དུ་བཏང་གི་ཡོད་པ་ཁོ་ཚོ་ལའང་ནང་མི་ཉེ་འབྲེལ་གྱིས་ཁས་ལེན་ཁག་ཐེག་དང་། གལ་ཏེ་ཕྱི་རྒྱལ་དུ་ཆབ་སྲིད་ཀྱི་དོན་རྐྱེན་རིགས་ལྷག་ན་ཁག་ཐེག་བྱེད་མཁན་ཚང་མར་འགྲོ་ས་དང་ཐར་ས་མེད་པའི་ལམ་ཁ་ཞིག་བཟོས་ཡོད་སྐོར་འགྲེལ་བརྗོད་གནང་བྱུང་།
བོད་རང་སྐྱོང་ལྗོངས་ཟེར་བའི་ནང་བོད་རིགས་ས་ཁུལ་གཞན་དག་ལས་ཀྱང་དམ་དྲག་ཧ་ཅང་ཆེན་པོ་དང་། རྒྱ་ནག་གཞུང་གིས་མངོན་གསལ་དོད་པོའི་ལམ་ནས་མི་རིགས་དབྱེ་འབྱེད་བྱས་ཏེ། བོད་རིགས་ཚོར་ལག་ཁྱེར་སྤྲོད་ཀྱི་མི་འདུག་པ་དེ། ཚེ་སྲོག་གཏའ་མར་བཞག་ནས་མགོ་ལ་མེ་མདའ་ཚད་བསྡད་པའི་འོག་སྐད་ཆ་བཤད་ཀྱི་ཡོད་ཅེས། བོད་ནང་སྤྱི་ཚོགས་དྲ་ལམ་དུ་བོད་ལྗོངས་སུ་ཡུལ་སྐོར་ལས་དོན་གཉེར་མཁན་ཞིག་གིས་བཤད་འདུག
ཁོང་གིས་བོད་རང་སྐྱོང་ལྗོངས་ཀྱི་ཡུལ་སྐོར་ལས་ཁུངས་ཁག་ལ་གནད་དོན་དེ་ཡར་ཞུ་བྱས་ན། རྒྱ་རིགས་གཙོས་པའི་མི་རིགས་གཞན་ཚོར་ལམ་སེང་ཕྱི་བསྐྱོད་ལག་ཁྱེར་ཞུས་ཆོག་ཆོག་དང་། ཕྱི་རྒྱལ་དུ་འགྲོ་ཆོག་ཆོག་ཡོད་ནའང་བོད་མི་ཚོར་ལག་ཁྱེར་རྩ་བ་ནས་མི་སྤྲོད་པ་མ་ཟད། ལག་ཁྱེར་ཞུ་བར་སོང་བ་ཙམ་གྱིས་དོགས་པ་བྱེད་པ་དང་རྣམ་འགྱུར་མི་ལེགས་པ་སྟོན་པ། ཐ་ན་ཁྱེད་ཚོ་བོད་རིགས་ཡིན་པས་ལག་ཁྱེར་སྤྲད་ཆོག་གི་མ་རེད་ཅེས་ཐད་ཀར་ལན་འདེབས་བྱེད་ཀྱི་འདུག་ཅེས་འགྲེལ་བརྗོད་གནང་འདུག
གཞན་ཡང་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་གྱི་ཁོངས་གཏོགས་བོད་མི་ཞིག་གིས་ཐད་ཀར་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་རྒྱུར། “བོད་རིགས་ཚོར་སྤྱིར་བཏང་ཕྱི་བསྐྱོད་ལག་ཁྱེར་བཀག་སྡོམ་བྱས་ཡོད་པའི་ཐོག དམིགས་བསལ་དེ་སྔ་ཕྱི་བསྐྱོད་ལག་ཁྱེར་བླངས་ཏེ་རྒྱ་གར་དུ་འགྲོ་མྱོང་བ་ཚོ་ནི། རྒྱ་ནག་གཞུང་གིས་ཐོ་གཞུང་ནག་པོ་ཟེར་བའི་ནང་བཅུག་ནས། གློ་བུར་གློ་བུར་དུ་ཉེན་རྟོག་ལས་ཁུངས་དང་གསང་བའི་ལས་ཁུངས་སུ་སྐད་བཏང་ནས་འདྲི་ཞིབ་དང་བསྔོག་བཤེར་སོགས་བྱེད་པ་མ་ཟད། ས་གནས་སུ་དོན་རྐྱེན་ཆེ་ཆུང་ཅི་ཞིག་བྱུང་ནའང་། ཐོག་མའི་དོགས་པ་བྱེད་ས་དང་སུན་གཙེར་བྱ་ས་གཙོ་བོ་ནི། རྒྱ་གར་དུ་འགྲོ་མྱོང་བ་དང་རྒྱ་གར་དུ་བསྡད་མྱོང་བ། ལྷག་པར་ཕྱི་བསྐྱོད་ལག་ཁྱེར་བླངས་ཏེ་རྒྱ་གར་དུ་སོང་བ་ཚོར་ངོས་འཛིན་གྱིས། རྒྱ་གར་ནས་བོད་ནང་ལོག་པ་ཚོ་ཧ་ལམ་དུས་རྒྱུན་བཙོན་པ་ལྟ་བུའི་ངོ་བོར་གནས་ཡོད་”ཅེས་འགྲེལ་བརྗོད་གནང་བྱུང་།
རྒྱ་ནག་གཞུང་གིས་སྤྱི་ལོ་༢༠༡༧ལོར་སི་ཁྲོན་དང་མཚོ་སྔོན། ཀན་སུའུ་ཞིང་ཆེན་མངའ་ཁོངས་ཀྱི་བོད་མི་མང་པོ་ཞིག་ལ་ཕྱི་བསྐྱོད་ལག་ཁྱེར་སྤྲད་ནས་རྒྱ་གར་དང་བལ་ཡུལ་གནས་སྐོར་གནང་ཐུབ་ཡོད་ནའང་། ལོ་དེར་གནས་མཆོག་རྡོ་རྗེ་གདན་དུ་༧གོང་ས་མཆོག་གི་དུས་འཁོར་དབང་ཆེན་ལ་བོད་མི་གཅིག་ཀྱང་འགྲོ་མི་ཆོག་པ་དང་། གལ་ཏེ་མགྱོགས་པོར་ཕྱིར་ལོག་མ་བྱས་ན། བོད་མི་ཚོའི་ས་ཞིང་དང་འབྲོག་ས་ཁག་རྒྱ་ནག་གིས་གཞུང་བཞེས་བྱེད་རྒྱུ་ཡིན་ཚུལ། ཁྱིམ་ཚང་རེ་རེར་སོང་ནས་འཇིགས་སྐུལ་བྱས་པར་བརྟེན། སྐབས་དེར་བོད་ནས་ཡོང་བའི་བོད་མི་ཕལ་ཆེ་བའི་དུས་འཁོར་དབང་ཆེན་ཞུ་མ་ཐུབ་པར་ཕྱིར་ལོག་གནང་ཡོད་པ་མ་ཟད། ཁོ་ཚོ་ཕར་ལོག་མ་ཐག་ཏུ་ཕྱི་བསྐྱོད་ལག་ཁྱེར་བཙན་འཕྲོག་དང་འདྲི་ཞིབ་ཚ་ནན་བྱས་པའི་གནས་ཚུལ་བྱུང་ཡོད་པ་རེད།

གསར་འགོད་པ། བློ་བྷེ།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།