རྒྱ་ནག་གིས་བོད་ནང་མི་འབོར་ལྡབ་ལོག་འཕར་ཚུལ་བཤད་པ།

༄༅༎རྒྱ་ནག་གཞུང་གིས་འདས་པའི་མི་ལོ་ལྔ་བཅུའི་ནང་བོད་ཀྱི་མི་འབོར་ལྡབ་གཉིས་ཀྱིས་འཕེལ་རྒྱས་ཕྱིན་ཡོད་ཚུལ་བཤད་ཡོད་པའི་སྐོར་དེ་རིང་རྒྱ་ནག་གཞུང་འབྲེལ་ཤིང་ཧྰ་གསར་ཤོག་ཐོག་ལ་གནས་ཚུལ་བཀོད་པ་རེད།

དེ་ཡང་བོད་ཀྱི་འཆར་ལྡན་བུ་བཙའི་ལས་དོན་ལྷན་ཁང་གི་མགྲིན་ཚབ་པས། འདས་པའི་དུས་རབས་ཕྱེད་ཀ་དེའི་ནང་བོད་ཀྱི་མི་འབོར་ལྡབས་གཉིས་ལྷག་འཕེལ་རྒྱས་ཕྱིན་ཏེ། ཕྱི་ལོ་༢༠༡༠འི་ལོ་མཇུག་བར་མི་འབོར་ས་ཡ་གསུམ་ཙམ་ཟིན་གྱི་ཡོད་ལུགས་དང༌། དེ་བཞིན་བོད་རང་སྐྱོང་ལྗོངས་ཟེར་བའི་བོད་ཀྱི་ས་ཁུལ་ནང་དུ་ཕྱི་ལོ་༢༠༠༥ ནས་༢༠༡༠འི་འདས་པའི་མི་ལོ་ལྔའི་ནང་ལོ་རེ་བཞིན་མི་འབོར་བརྒྱ་ཆ་༡དང་གྲངས་ཆུང་༡འཕེལ་རྒྱས་ཕྱིན་ཡོད་པ་དེ་ནི། རྒྱལ་ཡོངས་ཀྱི་མི་འབོར་འཕེལ་རྒྱས་ཀྱི་སྤྱི་ཡོངས་ཀྱི་གྲངས་ཀ་ལས་མང་བ་བྱུང་ཡོད་ལུགས་བཤད་ཡོད་པ་ཤིང་ཧྰ་གསར་ཤོག་ཐོག་བཀོད་ཡོད་པ་རེད། ད་དུང་ཤིང་ཧྰ་གསར་ཤོག་དེའི་ཐོག་ལ། འདས་ཟིན་པའི་མི་ལོ་ལྔ་པོ་དེའི་རིང་ལ་བོད་མི་ཚོའི་སྤྱི་ཡོངས་ཀྱི་ཚེ་ཚད་ཀྱང་ལོ་གསུམ་ཅུ་སོ་གྲངས་ནས་༦༧བར་རིང་དུ་ཕྱིན་པ་དང༌། དེའི་རྒྱུ་མཚན་ནི་གཙོ་བོ་སྤྱི་ཚོགས་ཀྱི་འཕྲོད་བསྟེན་ཆ་རྐྱེན་ལེགས་སུ་ཕྱིན་པ་དང་ཆབས་ཅིག་སྤྱི་ཚོགས་ཀྱི་བདེ་འཇགས་ལམ་ལུགས་འཕེལ་རྒྱས་ཕྱིན་པར་བརྟེན་ནས་བྱུང་བ་ཡིན་ཚུལ་བཤད་ཡོད་པ་རེད།།